1 Tɔ, nʼyaabɛ, li poknh mɛn Yonbdaan bo. Nì yé ń liɛbe kí kɛle nɛ n là kpiɛ' ki kɛle' nɛ nà nnɔ nɛ la, na ŋaabeh nʼyɛnm, kimɛ nɛn nɛ li cère ní ñɛ kinunbɔnk ni. 2 Liike mɛn niʼyul bo nin bitonsɔnbiɛrb; i ya sɛngbɛle jɛh ki bungreh iʼba nɛ ki yih nɛ̀ upunjiɛ. 3 Tinbi ya punjiɛ nɛ yé upunjiɛmɔ̀n, kimɛ *Uwien ya Fuoñaanm nɛ cèreh ti pukeh wɔ, ki jɛbnh tiʼba *Yesu Kristo bo, ka du tiʼtiɛma tuɔm bo. 4 Nin nɛn kɛ ŋɔ min ŋmɔbe usɛn ń li du nʼtiɛma tuɔm bo. Unil ye u ŋmɔbe usɛn wɔ ń li du uʼtiɛma tuɔm bo la, n ŋmɔbe usɛn ki cɛn' wɔ. 5 Bi maa' nni, wienniin daali nɛ bi jiɛ' nʼpunl. N yé Israyɛl ya bol ya nil nɛ, ki yé Bɛnsamɛn ya yaabil. Nʼbaambɛ kɛ yé Ebrembɛ nɛ. Yiko ya sɛn ni wɔn, n yé *Farisiɛnmbɛ ya cɛkl yɔ nɛ ki pɛ uʼbo mɔnmɔnm. 6 Nʼtùon ya sɔnm ni, nʼnun là mɔ́n ń jɛ̀nde Kristo ya taanl yaab nɛ. Yiko ya sɛn ni mɔ la, ma là ŋmɔbe biil yiko uba bo.

7 N là maaleh ki teh nɛn kɛ yé nʼbo kpɛle nɛ. Ama Kristo bo n laa' nì yé fɛnm nɛ. 8 Imɔ̀n nɛ, n yin' nibonn kɛ fɛnm kimɛ n bɛnde' *Yesu Kristo nʼYonbdaan ma nnɔ, nɛn nɛ cɛn' nibonn kɛ. Wɔn bo nɛ n dàan' nibonn kɛ, ki ye niʼkɛ yé tibint ŋɔ ń li yé wɔn Kristo yɔ nɛ, 9 kí li tɛ nin wɔ kí tì gben. Na yé n pɛ *yiko bo ma nnɔ nɛ ki yé ugbɛmɔ̀ndaan. N teke' Kristo ki jin' ma nnɔ, nɛ ki yé ugbɛmɔ̀ndaan. Uwien bùh binib bigbɛmɔ̀ndɛnb kí ñɛ mitekjim bo nɛ. 10 N yíe nibonbaabn nà si: ń li bɛn Kristo nɛ, kí li bɛn u mɛkrm ya tuɔm, kí taan nin wɔ uʼjɛnd ni, kí tì kpo tɛn wɔn, 11 ŋɔ kí li daan ki ye nʼmɔ li mɛkre bitɛnkpiib ni.

12 Na yé n ye n baa' lisuul nnɔ ya bùol ŋɔ nɛ, ka yé n ye n yé wà niba ŋa ji pɔre' wɔ nɛ. Ama n mɔ̀ndeh ki tiinh ń nɛ̀nde lɛ̀ nɛ, kimɛ *Yesu Kristo nɛ cuo' nni ki tien' uʼyɔ. 13 Nʼyaabɛ, ma ye min nɛ̀nde' lisuul nnɔ ŋɔ nɛ. Nʼnun mɔ́n nibonn nà bo si: ń sunde nà tien' nʼpuoli bó nɛ, kí li bɔ minɔnm bo ki joh inun bó. 14 N tiinh ki cuube lisuul ya bùol nɛ, ŋɔ *Yesu Kristo bo ń lɛ Uwien yin' tɛ wɔ ń de tɛ lisuul là paaki bó nnɔ. 15 Tinbi bà kɛ tien' binicekrkaab mitekjim ya sɛn ni nnɔ, cère mɛn tí li maaleh nnɔ. Ni tí ŋmɔbe iyɛnmaale iʼba ì bore' nin yii la, Uwien li wuɔn nɛ iʼtingi. 16 Nì te ma kɛ la, cère mɛn tí li tuu ki kpe usɛn wà ti lì là kpe wù ki lá baa' fɛnfɛnnɔ nɔ.

17 Nʼyaabɛ, niʼkɛ ń tɛkn nʼtaal ni, kí li tùɔreh ki sekndeh binib bà teh ti là wuɔn' nɛ ki ye ní li teh ma bo nnɔ. 18 Kimɛ n là kpiɛ' ki tɔke' nɛ ŋɔ, ki tí tɔkeh nɛ fɛnfɛnnɔ wuɔ nin tinunsiir ki teh binib bà yɛbe nɛ ŋmɔbe mitetem mà cère' bi yih Kristo ya kuum udɔpɔnpɔn bo fɛnm. 19 Bi li tì fɔre kí juore fɛnm nɛ. Biʼbent nɛ yé biʼWien. Bi jɛbnh biʼba biʼfɛ ya tùon bo nɛ. Biʼyɛnmaale kɛ pɛ uŋɛndun ya bont bo nɛ. 20 Tinbi wɔn, ti yé paaki bó yaab nɛ. Nɛn bo nɛ ti gu nin inunmɔ́n lidaali là Yonbdaan *Yesu Kristo tiʼŊmiɛnl li ñɛ niʼbó kí baa ní, 21 kí lèbre tiʼgbɛnɛnt tà ŋa ŋmɔbe sel nnɔ kí nɛnge uʼyaar tà ŋmɔbe ukpiɛke nnɔ, kimɛ u ŋmɔbe mituɔm wɔ ń cère tibont kɛ ń tuo uʼñɔbu bó.