Ŋwa' wvu bokaŋ bofɛɛ wvu
Bita
Fiɛɛ fì nu ɛ̂ Ŋwa' Bita wvu bokaŋ bofɛɛ wvun e
Ŋwa' Bita wvu bokaŋ bofɛɛ wvun nu ɛ wvú to saŋ fô bonyii bo mbee le bo fwele le, ɛ bó ɛ ce ɛ kɛnɛn woŋ tfuu. Shiee ŋwa' wvun baay to nu keediu lemme dì bonyii bo n'yɛɛyi le bo mbiay e to ghane gee, bô keediu nce nnyɛn kenjaŋ wvù n'yɛɛyi bonyii ban to too dvú le lɛ wvú eka. Bita saŋ ŋwa' wvun baay taale ɛ ɛ̀ nu fiɛɛ fì bonyii bo n'yɛɛyi le bo mbiay e ban to duu lɛ kɛ Jisos bɛɛ ke ebvuu ekase eto kɛ. Wvú jemyi lɛ fiɛɛ fì gee ɛ Jisos sɛ dvuyte keeto nu njefo kɛ Nyo' gomte lɛ wee mvu ke ela kɛ.
Bikuu bi mwɛɛm e ɛ̂ ŋwa' wvun e
1:1-2 Keŋkɛwcɛ
1:3-21 Nce bonyii bo Klistu le
2:1-22 Ɛkumɛ keŋge ke bonyii bo n'yɛɛyi le bo mbiay e noo ŋgɛw wvù nu ke eto fô bó le
3:1-18 Diuu dì Klistu nu ke ekase eto
1
1 Ɛ̀ nu me wvù Semon Bita, waa lemme Jisos Klistu noo waa we ntum. Me nsaaŋke ŋwa' wvun fô ben bò kɛŋke mbee wvù kuuke lɛŋlɛŋ diɛwɛ wvù bese kɛŋke le. Jisos Klistu wvù nu Nyo' noo Mboyse wesebeene ké no gee mwɛɛm teytey. Ɛ̀ nu nje fifin wvù ben kɛŋke mbee ɛ wvú nu lɛŋlɛŋ diɛwɛ wese le. 2 Jut 2Nyo' ebvuu ebuw ben bô kembonɛn naa ntay, ebvuu enya ben bô mvuntelem mvù lɛɛtene naa ntay, njefo ben kee wvú wvù Nyo' bô Jisos wvù nu Tata wesebeene.
Nce bonyii bò Nyo' nu ɛ tee wase ɛ caw e
3 1:16-17; Ɛfɛ 1:3Mvuŋgay mwew mvù ɛ̀ nu mvu Nyo' le nu ɛ ge wase beene ɛ kɛŋkɛ mwɛɛm mvunciim mvù nulo ege ɛ́ beene ekɛŋke nshii wvù mɛy lo, noo keecee nce bonyii bo Nyo' le. Mvú ge nonɛn no beene nu ɛ kiɛɛ Nyo' wvù nu ɛ tee beene keeley bvukukɛ bô bvujoŋkɛ bvù ɛ̀ nu bwew e. 4 Lum 5:2; Jɛm 1:14-15No wvú ge nonɛn, beene ɛ mum ɛ kɛŋkɛ mwɛɛm mvù kuuke baay bvuu jee fele mwɛɛm mvunciim ɛ ɛ̀ nu mvù wvú to kawɛɛ. Mwɛɛm mvun nu keege wvu lɛ ben elewtè mwɛɛm mvu yî woŋ wvun e mvù nyam ye shieele mvù beete bô bonyii. Nonɛn ɛ́ ben emum ekɛŋke nce ɛ ɛ̀ nu we wvù Nyo'. 5 Tay 2:11-12No fí nu nonɛn ben emum emom ntay keebise nce wvù jee yî fitele fì ben lese yî Klistu le. Yî nce wvù jee le, ɛ́ ben ebise bvufee bvu Nyo' le. 6 Gal 5:22-23Yî bvufee bvu Nyo' le ɛ́ ben ebise bikuu bì kemsɛɛn. Yî bikuu bì kemsɛɛn e, ɛ́ ben ebise shém yì kuulɛɛn. Yî shém yì kuulɛɛn e, ɛ́ ben ebise nce wvù ɛ̀ nu wvu bonyii bo Nyo' le. 7 Gal 6:10Yî nce wvù ɛ̀ nu wvu bonyii bo Nyo' le, ɛ́ wee ekɛŋke shen fô waa bwee le. Yî shen e fô waa bwee wee le, ɛ́ ben ebise keŋkoŋɛn. 8 Me ŋgayte nɛn njefo, ɛ́ ben kɛŋke wvun nce, ɛ no gɛne dvú fwe fwe, ɛ́ wvú ege ɛ́ ben saa ebvuu enu kɛ lo nɛn ncɛw kɛnɛɛ enu diɛwɛ bonyii bò nulo saa ege fiɛɛ diɛwɛ bonyii bò kee fiɛɛ ɛkumɛ Tata wesebeene wvù Jisos Klistu le kɛ. 9 Ben ekeè lɛ ɛ́ wee baa ekɛŋke wvuwvun nce tu wvú nu ɛ fefe wase yî mwɛɛm mvu Nyo' le, ɛ wvú yaa bvuu yɛne mwɛɛm e ncejole kɛ. Wvú nu ɛ daayɛ wase lɛ bibefɛ biew bì wvú to shee gee fwele nu ɛ Nyo' to cukɛ wase.
10 Boom bo bwɛɛm e, fí ɛ mum ɛ no nu lɛ ben emum emomtè ntay keegee mwɛɛm ɛ ɛ̀ nu mvù duŋci lɛ Nyo' to nu ɛ tee wase ben, caw. Ɛ́ ben gee nonɛn ben saa ke eyuu egbwe yî mbee wene le kɛ. 11 2Tim 4:18; 2:20; Tay 3:6Nonɛn ɛ́ bó ke eyene je fô ben e ɛ yì kuuke nɛn gbwuuu, ɛ́ ben eley bvunfon bvù mɛy lo bvu Tata wesebeene wvù Jisos Klistu wvù Mboyse le.
12 Jut 5Me ŋkee lɛ ben kee wase mwɛɛm mvun, leeme tɛn yî kecɛɛy kè ben to yuwɛɛ le tɛmyi, geenɛn ɛ me ŋgomte kɛ keembvuu ŋkumyi ben ɛkumɛ mvú sekecii. 13 Me n'yɛne lɛ fí nu lɛŋ nonɛn lɛ me eŋkamsè ben ɛkumɛ mwɛɛm mvun no me mbɛɛ dvú n'yoyte wvu lɛ ben ekumyi, 14 2Kol 5:1; 2Tim 4:6; Jon 21:18-19njefo me ŋkee lo lɛ ɛ̀ shɛɛte wase caan ɛ́ keyoy ecinɛ nyam ye le no Tata wesebeene wvù Jisos Klistu nu ɛ ge wase me ɛ ŋkiɛɛ le. 15 Me ɛ mum ɛ no ŋgomte keemom naa ntay lɛ seke me ɛ ŋgɛn wase ɛ́ ben enu wvù ɛ̀ nulo ɛ́ ben ekumyi mwɛɛm mvun sekecii.
Saaka wvu ɛkumɛ nto Jisos nu fiɛɛ fì bonyii nulo egɛɛ bvufee yî dvú le
16 Mat 17:1-8Ben ekeè lɛ kɛ mwɛɛm mvun mvù bese to jemyɛɛ ɛ̂ ben ɛkumɛ mvuŋgay mvu Tata wesebeene wvù Jisos Klistu le noo nto we wvù wvú nu ke ekase eto, to nu kɛ lo mvumaŋgaan ɛ bonyii ɛ bosɛn ɛ seyse ɛ bese maa ɛ̂ ben kɛ. Bese to nu ɛ yɛn naa bvukukɛ bwew e bô ɛjisɛ ɛyese. 17 Ɛ̀ to nu seke Nyo' Ice to buwɛɛ wvú bô mbense noo bvukukɛ, ɛ diɛw buy fô wvú wvù nu Nyo' Bvukukɛ le jemyi lɛ, “Wvun nu Waa wɛm, wvù nu fitele fiem. Me n'yuuke njoŋ bô wvú baay.” 18 Bese kebɛɛ to nu ɛ yuw diɛw yin no yí shiile too we seke bese to nu bee bo Jisos yî kum Nyo' le. 19 Mben 119:105; Lum 1:2; 13:12; 1Bi 1:10-11No bese yuw nonɛn, mum mɛse kiɛɛ kecɛɛy ke fiɛɛ fì bonyii bo ntum Nyo' le to jemyɛɛ ɛ ɛ̀ bɛɛ naa lo. Ɛ fí jee lɛ ben egɛɛ bvufee yî fiɛɛ fidvu le ntay, njefo fí nu diɛwɛ ken'yeese le kè baa ɛ̂ ɛjiwɛ le egɛn ebuy Diuu dì ɛkfuŋ nu ke eyuu, ɛ́ Jisos ebaa fô mvuntelem mvunɛn e diɛwɛ law e. 20 Fiɛɛ fì kuuke fele mwɛɛm mvunciim nu lɛ ben ekeè lɛ, kɛ ntum Nyo' mvu nu dvú ɛ̂ Ŋwa' Nyo' le wvù wee nulo eteete bô bwew bvufee kɛ. * Kɛnɛɛ lɛ, “Kɛ wee ntum Nyo' to nu ɛ jeme fiɛɛ fì ɛ̀ nulo ɛ́ wee cɛɛ kinyi kedvu bô bwew bvufee kɛ.” 21 2Tim 3:15-16Kɛ wee ntum Nyo' to baa jemyi naa lo fiɛɛ fì ɛ̀ nu ŋkpwawcɛ wee wvu wum kɛ. Ɛ̀ to gee Keyoy ke Yuule ɛ bó sɛ jemyi diɛw yì buyte fô Nyo' le.
1:2 Jut 2
1:3 1:16-17; Ɛfɛ 1:3
1:4 Lum 5:2; Jɛm 1:14-15
1:5 Tay 2:11-12
1:6 Gal 5:22-23
1:7 Gal 6:10
1:11 2Tim 4:18; 2:20; Tay 3:6
1:12 Jut 5
1:14 2Kol 5:1; 2Tim 4:6; Jon 21:18-19
1:16 Mat 17:1-8
1:19 Mben 119:105; Lum 1:2; 13:12; 1Bi 1:10-11
*1:20 Kɛnɛɛ lɛ, “Kɛ wee ntum Nyo' to nu ɛ jeme fiɛɛ fì ɛ̀ nulo ɛ́ wee cɛɛ kinyi kedvu bô bwew bvufee kɛ.”
1:21 2Tim 3:15-16