8
Jisos nu ɛkolɛ ke bocee ncese le ke moŋkan mo monfɛm e
1 4:14; 1:3, 13; 7:25; 10:12; 12:2, 25; Mben 110:1; Mat 22:44; Lem 2:33; Lum 8:34; Ɛfɛ 1:20; Kolo 3:1Ɛkolɛ ke fiɛɛ fì beene jemyi ɛkumɛ fí le nu kɛ lɛ, beene kɛŋke kfuu ɛkolɛ ke bocee ncese le ɛ ɛ̀ nu wee ɛ wvú ɛ shii ɛ̂ ɛbo ke ɛcɛɛy ke kawla Nyo' Bvukukɛ le fowe. 2 8:5Wvú nu wee lemme fô Nyo' nu, lemte cun dvù ɛ̀ nu cɛɛy cɛɛy cun yi wvú wvù Nyo' le, ɛ ɛ̀ yaa kene bonyii kɛ. Ɛ̀ kene wvú wvù Tata Nyo' cun yidvu. 3 Ɛkolɛ ke bocee ncese le kecii nu ɛ Nyo' ké baa gɛɛ lɛ wvú ejoò nnyá yi bonyii feese ɛ̂ Nyo' bvuu gee tɛn boncese fô Nyo' le. Nonɛn, fí ɛ no nu shiee le fô wvuwvun cee ncese le keekɛŋke tɛn fiɛɛ fì wvú nulo ege ncese dvú fô Nyo' le. 4 Ɛ́ wvú be nu fokuse fɛn, wvú saa enu naa lo cee ncese kɛ, njefo bocee ncese nu wase dvú bò nyaa nnyá bii no nci Muses gomte. 5 9:9; 10:1; Kolo 2:17 Ksm 25:9, 40Lemme dì bó lemte fokuse fɛn nu kɛ lo nfieesɛn bô kenjiŋjiŋ ke di yew dvu Nyo' le fowe. Ɛ̀ nɛɛ fiɛɛ fì ɛ̀ to nu seke Muses to nu keekene cun Nyo' yi fokuse fɛn, ɛ Nyo' tefe wvú gay lɛ,
“Yɛnɛ lɛ wo nu ɛ kene fiɛɛ ficii fí ɛ no nu kɛ lɛŋlɛŋ
diɛwɛ fì me nto nduŋcɛɛ ɛ̂ wo yî kum e.”
6 7:22; 8:2, 6, 13; 9:11, 15; 12:24; Yɛsa 55:3; Yɛli 31:31-33; Ɛsek 37:26; 1Kol 11:25Geenɛn Jisos nu ɛ bó ɛ nya lemme ɛ̂ wvú ɛ dí kuuke fele di bocee ncese bo fwele le, kɛ lɛŋlɛŋ no moŋkan mò wvú leeme fwe wvudvu ɛntelɛŋ jo Nyo' bô wee wvu wum kuuke tɛn fele mo moyvuum. Mó fele lo njefo moman bii ɛ ɛ̀ nu boŋkawma bò fele bo fwe le. 7 Ɛ́ moŋkan mo fwele to nu sɛ mó kɛŋke jay ŋkuuŋ, tu kɛ shiee momew to bee ebvuu enu dvú kɛ. 8 Yɛli 31:31-34; Ibu 10:16-17Nyo' to nu ɛ yɛn lɛ jay nu dvú bô bonyii, mum gay lɛ,
“Me wvù Tata ŋgayte lɛ diuu too lo
dì me nu ŋke eŋgbwo moŋkan mo monfɛm
bee yew Islael noo yew Juda.
9 Ɛ kɛ moŋkan man nu diɛwɛ mò me nto ŋgbwolɛɛ
bee bo'icee cee bó
diuu dì me nto njicɛɛ bó le yî kebo le,
njo mbuy bô bó woŋ wvù Ijiw e kɛ.
Moŋkan modvu man nu ɛ bó to baa emɛy eleeme yî dvú le kɛ.
Nonɛn, ɛ me mum mbase jim ɛ̂ bó le. Fifin jemyi me wvù Tata.
10 Me wvù Tata mbvuu njemyi lɛ, kefew nu ke eto ekocɛn,
ɛ́ me embvuu eŋgbwo momew moŋkan bee yew Islael.
Mó nu ke enu lɛ, me nu ŋke enlese lo bonci bem
ɛ̂ boŋkpwawcɛ bobole,
ensaŋ ɛ ɛ̀ nu ɛ̂ mvuntelem mvubole.
Me nu ŋke enu Nyo' wvubo, ɛ bó nu bonyii bem.
11 Kɛ wee bɛɛ ke ebvuu eyɛɛyi lo wee we woŋ mvu
kɛnɛɛ waa bwee gayte lɛ wvú ekeè Tata Nyo' kɛ,
njefo wee tfuu nu ke ekee me
ɛ kɛw yî wee wvu caan e ɛ gɛn ɛ buy yî wvu baay e.
12 Me nu ŋke encam shen fô bó le,
nlɛɛshɛ mwɛɛm mvubole mvù befe.
Kɛ me mbɛɛ ŋke embvuu eŋkumyi bibefɛ bibole kɛ.”
13 8:6No Nyo' to jemyɛɛ lɛ moŋkan mo monfɛm nu ke enu, tu wvú to yɛne wase lɛ mo fwele ma nu fiɛɛ fi fiyvuum. Ɛ fiɛɛ yvuumene kɛnɛɛ lune wase, tu ɛ̀ shɛɛte caan ɛ́ fí ela ɛ̂ bonyii ɛjise.