Saaka wvù Jee wvu ɛkumɛ Jisos no
Luka
to Saŋɛɛ
Fiɛɛ fì nu ɛ̂ Ŋwa' Luk wvun e
Ŋwa' Luk wvun duŋci lɛ Jisos nu Mboyse wvù Nyo' to kawɛɛ bonyii bo Islael dvú, bvuu nu Mboyse ɛŋgokɛ ke bonyii bocii le. Wvú jemyi mwɛɛm mvumew ɛkumɛ Jisos ɛ mvú nu kɛ ɛ ɛ̀ nu ɛ̂ ŋwa' wvudvu wvun e maaŋ. Wvú jemyi no bó to bokɛɛ Jisos ɛ bonceendaa bo Nyo' le no yemte, ɛ boncɛy njée gɛn taa wan, jemyi tɛn no wan wvù Jisos to shɛɛtɛɛ yew ncese le, jemyi ŋgan wvù Jisos to maɛ ɛkumɛ wee wvù jee wvu Samalia bô wvu ɛkumɛ wan wvù to laɛ. Wvú jemyi baay ɛkumɛ bunle ɛ̂ ŋwa' wvun e bô ɛkumɛ Keyoy ke Yuule noo ɛkumɛ bokɛnɛ. Wvú jemyi no Nyo' lɛɛshi bibefɛ bi bonyii le, fì ɛ̀ nu shiee wvù Jisos to toɛ fokuse fɛn e.
Bikuu bi mwɛɛm e ɛ̂ ŋwa' wvun e
1:1-4 Keŋkɛwcɛ
1:5–2:52 No bó to bokɛɛ Jon Nleseɛjoo bô no bó to bokɛɛ Jisos ɛ bó no kuu
3:1-20 Lemme di Jon Nleseɛjoo le
3:21–4:13 No bó to lesɛɛ Jisos ɛ̂ joo bô no Satan to momte wvú
4:14–9:50 Ɛkumɛ lemme di Jisos e Galilee
9:51–19:27 No Jisos to nɛn'yɛɛ Galilee no gɛne Jɛlusalɛm
19:28–23:56 Ɛkumɛ kemaa ke Jisos e ke kemɛse le Jɛlusalɛm
24:1-53 No Jisos to buyɛɛ yî kpwe le, buynɛn ɛ̂ bonyii ɛjise, ke ben we
1
Keŋkɛwcɛ
1 Wee wvu baay wvù Teofilus, bonyii nteen nu ɛ mom wase keesaŋ ɛkumɛ mwɛɛm mvù to koyɛɛ ɛntelɛŋ jo bese. 2 Bó to saaŋke mwɛɛm kɛ lɛŋlɛŋ mvù bese to yuwɛɛ ɛ̂ bonyii bò to yɛnɛɛ bô ɛjisɛ ɛbo bvuu no fewci saaka wvudvu no mvú to kɛwɛɛ. 3  Lem 1:1No me nu ɛ njo wase kefew ɛ ntasse mwɛɛm mvun mvunciim ɛ kɛw foŋkɛw, ɛ mum ɛ n'yɛn lɛ fí jee lɛ me embaancɛ ensaŋ tɛn ɛ̂ je yi lɛŋ e ɛ̂ wo. 4 Me ŋge fin lɛ wo ekiɛɛ kecɛɛy ke mwɛɛm mvù bó nu ɛ fewcɛ wase ɛ̂ wo le.
Ɛ nceendaa Nyo' tefe lɛ bó nu ke eboo Jon Nleseɛjoo
5  1Klo 24:7-19 1Klo 24:10Seke Nfon 'Ɛlod to saake woŋ wvù Judea, cee ncese mvu to nu ɛ bó teŋe lɛ Sakalia. Wvú to lemte ɛ̂ ŋgoo bocee ncese bo Abija le, ɛ bwee yew we to buy tɛn ɛ̂ kfuu di Ɛlon e, ɛ bó teŋe wvú lɛ Ɛlisabɛn. 6 Bonyii bo bofɛɛ ban to nu bonyii bo teytey ɛ̂ Nyo' ɛjise, gɛɛle bonci bo Tata le bocii, yaa kɛŋke jay kɛ. 7 Geenɛn, bó to baa kɛŋke wan kɛ, njefo Ɛlisabɛn to nu kase, ɛ bó bocii to nu ɛ bó ɛ lunkɛn wase.
8 Ɛ kefew ke to kocɛn, ɛ ŋgoo Sakalia no lemte yew ncese Tata le. Ɛ̀ to nu wvú cee ncese ɛ̂ Nyo' ɛjise ɛbvubwɛ, 9  Ksm 30:7-8ɛ bó to baa wvú bii no bó to ké no baale bocee ncese ɛ̂ nce wvubole. Ɛ wvú mum ley yew ncese le keeton jiin. 10 Ɛ kefew ke kocɛn keeton jiin, ɛ bonyii bocii bò to nu ɛkfuŋ no bunlee.
11 Ɛ nceendaa Tata sɛsɛ buynɛn ɛ̂ wvú ɛjise leem ɛ̂ ɛbo ke ɛcɛɛy ke ketaŋ ke jiin e. 12 Seke Sakalia to yɛnɛɛ wvú le, ɛ kedvum gbwo wvú, ɛ wvú kɛŋkɛ nfan baay. 13  1:60, 63Geenɛn, ɛ nceendaa wvudvu gay ɛ̂ wvú lɛ, “Fo wo efanè kɛ. Nyo' nu ɛ yuw wase bunle yo. Bwee yew wo wvù Ɛlisabɛn nu ke eboo wan diemsɛn ɛ́ wo ecu diee lɛ Jon. 14 Wvú nu ke eto bô nlaŋlaŋ fô wo le, ɛ bonyii nteen nu ke eyuuke njoŋ nje boo diew. 15  Ktŋ 6:3; Biku 13:4-5; Luk 7:33Wvú nu ke enu wee wvu baay ɛ̂ Nyo' ɛjise. Fo wvú ke ewuù mbvuum kɛ, sɛ ge mò tɛmyi. Keyoy ke Yuule nu ke eyiŋsɛn yî ye le seke bó ɛ boo wvú. 16 Wvú nu ke ege ɛ́ bonyii bo Islael nteen ekumɛn mvuntelem mvubole ekase etu bô bo Tata wvù Nyo' wvubo. 17  Mala 3:1; Mat 17:10-13; Mak 9:13; Jon 1:21Wvú nu ke egɛn fwe jo Tata bô fitele noo mvuŋgay mvu Ɛlayja le, keekumɛn mvuntelem mvu bocee boom e, ɛ́ mvú enu yî boom bobole. Wvú nu ke ege ɛ́ bonyii bò tɛmyi bikuu ecinɛ bikuu bì tɛmyɛɛn e, ekumɛn bonce bobole, ekɛŋke boŋkpwawcɛ ɛ ɛ̀ nu bo bonyii bo lɛŋ e. Wvú nu ke ege nonɛn wvu lɛ bonyii enù ɛ bó ɛ seyse keecɛyte Tata.”
18  Keŋ 17:17; 18:11Ɛ Sakalia bife ɛ̂ nceendaa Nyo' lɛ, “Fiɛɛ fì nu ke ege ɛ́ me eŋkiɛɛ ɛ bee bwee yew wɛm nu ɛ bó ɛ lunkɛn wase nɛn nu la?”
19  Dan 8:16Ɛ nceendaa Nyo' tfuse lɛ, “Ɛ̀ nu me wvù Gabliya, ɛ me nleeme ɛ̂ Nyo' ɛjise sekecii, ɛ ɛ̀ tum wvú me lɛ me ento ensee saaka wvù jee wvun ɛ̂ wo. 20 Taa eyɛn, no wo baa ebee saaka wvun e, ɛ kefew nu ke eto ekocɛn ɛ́ fí ekɛŋke keekooy, wo nu etu kencife, saa ejemyi kɛ, egɛn ebuy seke fiɛɛ fin nu ke ekooy.”
21 No fí to kooyi nonɛn, ɛ bonyii bò to nu ɛkfuŋ cɛyte Sakalia no kɛŋke lo ŋghaw laa ɛ̀ sɛ kooyi la fì wvú she dvú baay nɛn ɛ. 22 Seke wvú to buyɛɛ dvú, wvú to baa kiɛɛ keejeme ɛ̂ bó kɛ. Ɛ bó mum kiɛɛ lɛ Nyo' nu ɛ duŋcɛ fiɛɛ fi ŋghaw e ɛ̂ wvú dvú. Ɛ wvú mum no feeke lo mwɛɛm ɛ̂ bó bô can, yaa jemyi kɛ. 23 Ɛ Sakalia ke mɛse lemme diew yew ncese le mum kase tu jim fô yew e fo wvú. 24 Ɛ ɛdiuw ke fey, ɛ kpwɛse wvù Ɛlisabɛn leem bô fue, mum no nu kɛ ɛ ɛ̀ nu yew yî kee le tin. 25  Keŋ 30:23Ɛ Ɛlisabɛn mum gay lɛ, “Keseen Tata nu ɛ koo wase shen fô me le, ɛ cake keŋ'wuumɛn yî ɛkolɛ kem e.”
Ɛ nceendaa Nyo' tefe lɛ bó nu ke eboo Jisos
26 Ɛ fue di Ɛlisabɛn e ke buy kee soocaan, ɛ Nyo' tum nceendaa we wvù Gabliya ntɛw mvu wvu Galilee le ɛ bó teŋe lɛ Nasalɛt. 27  Mat 1:16Wvú to gɛn bô ntum fô ŋgon kpwoon mvu le ɛ bó teŋe lɛ Maalia, ɛ ɛ̀ bɛɛ wan wvu tfu. Wvú to nu ɛ bó ɛ seyse wase lɛ wvú nu ke enu kpwɛɛ Yosɛw wvu ɛ̂ kfuu di Nfon Dawe le. 28 Ɛ nceendaa Nyo' wvudvu gɛn yɛn Maalia le gay wvú le lɛ, “Me ŋgayte wo le. Nyo' nu ɛ buw wase wo ɛ no nu ben ɛ wvú.”
29 Ɛ Maalia yuw ɛ fí ghaw wvú baay, ɛ wvú no maa laa kfuu wvun ŋgayma sɛ nu wvù nɛɛ lɛ. 30 Geenɛn, ɛ nceendaa Nyo' gay ɛ̂ wvú lɛ, “Maalia fo wo efanè kɛ. Nyo' nu ɛ buw wase wo. 31  Yɛsa 7:14; Mat 1:21; Luk 2:21; Lem 4:12Taa eyɛn, wo nu ke eleem bô fue, eboo wan diemsɛn, ecu diee lɛ Jisos. 32  Yɛsa 9:6-7; 2Sam 7:16; Mat 20:30-31Wvú nu ke enu wee wvu baay, ɛ bó nu ke eteŋe wvú lɛ Waa Nyo', Nyo' wvù nu Ɛkolɛ ke Mwɛɛm Mvunciim e. Tata wvù Nyo' nu ke eshike wvú yî kawla Nfon Dawe wvù icee kfuu dibole. 33  Dan 7:14Wvú nu ke esaake kfuu di Yakow e sekecii, ɛ kɛ bvunfon bwew nu ke ekɛŋke kemɛse kɛ.”
34 Ɛ Maalia bife ɛ̂ nceendaa Nyo' lɛ, “Fifin nu ke eghan nɛɛ le, ɛ me mbɛɛ wan wvu tfu.” 35  Mat 1:18; Luk 4:18Ɛ nceendaa Nyo' tfuse ɛ̂ wvú lɛ, “Keyoy ke Yuule nu ke eto yî yo le, ɛ́ mvuŋgay mvu Nyo' wvù nu Ɛkolɛ ke Mwɛɛm Mvunciim e eyiŋsɛn yî yo le. Nonɛn, wan wvù wo nu ke eboo nu ke enu wvù yuule, ɛ́ bó emum eteŋe wvú lɛ Waa Nyo'. 36 Taa eyɛn, wayco wvù Ɛlisabɛn wvù nu ɛ wvú ɛ loocɛ wase ɛ lun ɛ bó se teŋe wvú lɛ kase, nu keseen bô fue kee soocaan, ɛ wvú nu ke eboo wan diemsɛn. 37  Keŋ 18:14; Mat 19:26; Mak 10:27; Luk 18:27Kɛ fiɛɛ nu dvú fì nulo eghaw Nyo' kɛ.” 38 Ɛ Maalia mum gay lɛ, “Me wvun fɛn wvù waa lemme Nyo'. Wvú ege ɛ́ fí ekooy bô me no wo gay.” No wvú jeme nonɛn, ɛ nceendaa Nyo' mum nɛ.
Ɛ Maalia laa ghane ɛ̂ Ɛlisabɛn e
39 Kɛ ɛdiuw yodvu le, ɛ Maalia seyse nɛ no yaŋsene gɛne ntɛw mvu wvù woŋ kum wvu Judea le, 40 gɛn buy jó, ley yew dvu Sakalia gay bwee yew we wvù Ɛlisabɛn e. 41 No Ɛlisabɛn to yuwɛɛ ŋgayma wvu Maalia, ɛ wan sɛsɛ ɛ̂ wvú ɛshem baay. Ɛ Keyoy ke Yuule yiŋsɛn yî ye le. 42 Ɛ wvú mum wvule foweɛwe, gay lɛ, “Kembonɛn ke Nyo' le nu yî yo le fele bokɛnɛ bocii, ɛ kembonɛn kew nu yî wan wvù wo nu ke eboo le. 43 Fin fiɛɛ fi baay nɛn ghan nɛɛ le, lɛ bwee Tata wɛm nu ɛ laa ghane ɛ̂ me le? 44 Taa eyɛn, seke me mbe n'yuw ŋgayma wo, wan ɛ sɛsɛ ɛ̂ me ɛshem bô nlaŋlaŋ wvu baay. 45 Njoŋ wvu baay nu fô wo le, njefo wo nu ɛ bee lɛ ŋkawma wvù Nyo' to kawɛɛ wo dvú nu ke eto ekocɛn.”
Ɛ Maalia bense Nyo'
46  1Sam 2:1-10Ɛ Maalia gay lɛ,
“Fitele fiem bensee Tata Nyo',
47 ɛ me n'yuuke njoŋ nje Nyo' wvù nu Mboyse wɛm.
48  1Sam 1:11Wvú nu ɛ kume me, ɛ me nu kɛ lo waa we lemme wvu ncɛw.
Ɛ kɛw yî keseen e ɛ gɛn lo, ɛŋgokɛ kecii nu ke egayte lɛ,
Nyo' nu ɛ laŋ kembonɛn yî yɛm e,
49 njefo Nyo' Mvuŋgay Mvunciim nu ɛ ge wase mwɛɛm
mvu baay baay nteen fô me le.
Kɛ diee diew kɛŋke kenfewsɛn kɛ.
50  Mben 103:13, 17Wvú camte shen fô bonyii bò wvumte wvú le.
Ɛ shen yin nu yî ɛŋgokɛ kecii le.
51  Dito 5:15; 26:8Wvú nu ɛ duŋcɛ mvuŋgay mvu ɛbo kew e,
ɛ tawse bonyii bò saale ye, bontaŋ bobole ɛ bvuŋ.
52  Job 5:11; 12:19; Mben 75:7; Mat 23:12; Jɛm 4:6, 10Wvú nu ɛ shwaw wase bonfon bo baay baay yî bokawla le,
ɛ bense ɛ ɛ̀ nu bonyii bo ncɛw.
53  Mben 107:9; 34:11Wvú nu ɛ nyaŋe wase bonyii bò jeŋ yuu bó,
bó ɛ ffuu bô mwɛɛm mvù jee,
ɛ kuŋ bo kpwaw e cancan.
54-55  May 7:20; Mben 98:3; Keŋ 17:7; 22:17Wvú nu ɛ ficɛ wee we lemme wvù Islael,
ɛ kume keecam shen fô Abla'am bô kfuu diew e,
egɛn emɛse kɛ no wvú to kawɛɛ ɛ̂ bo'icee cee bosɛse.”
56 No Maalia jeme nonɛn, ce bô Ɛlisabɛn kee tɛ mum kase tu jim fô yew e.
Ɛ Ɛlisabɛn boo Jon Nleseɛjoo
57 Ɛ kefew kè Ɛlisabɛn ke eboo ke to kocɛn, ɛ wvú boo wan diemsɛn. 58 Ɛ kfuu diew noo bonyii bò to cee keleŋ kedvu le yuw lɛ Nyo' nu ɛ duŋcɛ shen fô wvú le naa baay, ɛ bó mum no laŋlaŋe.
59  Keŋ 17:12-13Ɛ ɛdiuw ke to buy nyaŋ, ɛ bó to keetfuse wan yew, mum no gomte keecu diee lɛ Sakalia kɛ diɛwɛ di ice le, 60  1:13geenɛn ɛ bwee ma lo, gay lɛ bó eteŋè wvú lɛ Jon.
61 Ɛ bó gay ɛ̂ wvú lɛ, “Kɛ wee nu dvú ɛ̂ kfuu dinɛn e bô diee din kɛ.” 62 Ɛ bó mum nɛ no feeke bô can ɛ̂ cee wan, keekiɛɛ laa wvú be gomte lɛ bó ecu diee di wan e lɛ yɛɛ lɛ.
63 Ɛ wvú mum few tɛn lɛ bó eto bô fiɛɛ ɛ́ wen esaŋ yî dvú le. Ɛ bó to dvú ɛ wvú mum saŋ lɛ, “Diee diew nu Jon.” Ɛ bó yɛn nonɛn ɛ dew yum bó. 64 Kaŋ mwaaŋ, ɛ diuw Sakalia mum yene ye, ɛ leme diew yaatɛn, ɛ wvú bvuu kase no jemyi. Ɛ wvú mum kɛw no tumte moŋkum mo Nyo' le. 65 Ɛ bonyii bo ntɛw wvudvu le kɛŋkɛ ŋghaw baay. Ɛ saaka mwɛɛm mvun mvunciim saaŋkɛn gɛn woŋ kum wvu Judea wvudvu le tfuu. 66 Ɛ bonyii bocii bò to yuwɛɛ mwɛɛm mvun mvunciim kɛŋkɛ ŋghaw mum no biite laa wvun wan nu ke enu wvù nɛɛ lɛ, njefo fí to looci duŋci lɛ kembonɛn ke Nyo' le nu yî ye le.
Ɛ Sakalia tefe ntum Nyo'
67 Ɛ Keyoy ke Yuule nɛ yiŋsɛn yî Sakalia wvù icee Jon e, ɛ wvú mum nɛ no jemyi kɛ diɛwɛ wee ntum Nyo' le, gayte lɛ,
68  Mben 41:13; 72:18; 111:9; Luk 4:18-21; 7:16; 19:44“Beene ebenseè Tata wvù nu Nyo' bonyii bo Islael.
Wvú nu ɛ to wase keesum bonyii bew yî ŋgɛw e.
69  Mben 132:17; Mat 20:30-31Wvú nu ɛ gɛɛ wase ntɛmemvuŋgay wvù nu ke eboyse beene,
ɛ wvú buy ɛ̂ kfuu di wee we lemme wvù Nfon Dawe le.
70  Lum 1:2; Yɛsa 9:1-6; May 5:1-3Fifin nu no wvú to kawɛɛ diuw bonyii bew bo ntum e bò yuule
ɛ ɛ̀ bɛɛ lo bvuyvuum e bò wvú to gɛkɛɛ,
71  Mben 106:10lɛ wen nu ke eboyse beene can bonyii bò gomte keefiwsɛ beene le,
noo bonyii bosɛɛbeene bo bvuban e.
72  Mben 106:45; 105:8-9; Lɛw 26:42Wvú to nu ɛ kaw lɛ wen nu ke ecam shen fô bo'icee cee bosɛɛbeene le
mum no shee kumyi kelew kew kè wvú wvù Nyo' to dieɛ.
73  Keŋ 22:16-18Wvú to nu ɛ kaw ɛ̂ icee bo'icee bosɛɛbeene wvù Abla'am lew lɛ,
74  Tay 2:12, 14wen nu ke ebvuse beene can bonyii bosɛɛbeene bo bvuban e,
wvu lɛ ɛ̀ nulo ɛ́ beene elemte wvú le sɛ nfan,
75 eceè nce wvù yuule bô wvu teytey ɛ̂ wvú ɛjise
ɛdiuw ɛcii yî nshii wesebeene le.
76  Mala 3:1; Mat 11:10; Mak 1:2; Luk 7:27Ɛ wo waa wɛm nu ɛ bó nu ke eteŋe wo lɛ wee ntum Nyo',
Nyo' wvù nu Ɛkolɛ ke Mwɛɛm Mvunciim e,
njefo wo nu ke esa fwe dvu Tata
keeseyse je ye.
77  Yɛli 31:34Wo nu ke efewci ɛ̂ bonyii bew je yì ɛ̀ nulo ɛ́ bó ekɛŋkɛ mboyma jó,
wvù ɛ̀ nu nlɛɛshɛ wvù Nyo' nu ke elɛɛshɛ bibefɛ bibole,
78  Ksm 34:6; Yɛsa 60:1-2; Mala 3:20nje shen yi baay yì wvú koole fô bonyii le.
Wvú nu ke eciinse Mboyse ɛ́ wvú eshiile too we
kɛ diɛwɛ diuu fò dí ɛ san e.
79  Yɛsa 9:1-5; 42:6-7; Mat 4:16Wvú nu ke enya n'yuu ɛ̂ bonyii bò nu yî ɛjiwɛ le
noo bò nu diuw kpwe le,
emum eleke beene ɛ̂ je kembonɛn e.”
80 Ɛ waa Sakalia wvudvu mum no kuu yî nyam ye le, kuu tɛn ɛ̂ keyoy e. Ke mum nɛ gɛn no cee ɛ ɛ̀ nu ŋkpwaante, gɛn buy diuu dì wvú to buyɛɛ keeduŋcɛ ɛkolɛ kew ɛ̂ bonyii bo Islael.

1:3 Lem 1:1

1:5 1Klo 24:7-19

1:5 1Klo 24:10

1:9 Ksm 30:7-8

1:13 1:60, 63

1:15 Ktŋ 6:3; Biku 13:4-5; Luk 7:33

1:17 Mala 3:1; Mat 17:10-13; Mak 9:13; Jon 1:21

1:18 Keŋ 17:17; 18:11

1:19 Dan 8:16

1:25 Keŋ 30:23

1:27 Mat 1:16

1:31 Yɛsa 7:14; Mat 1:21; Luk 2:21; Lem 4:12

1:32 Yɛsa 9:6-7; 2Sam 7:16; Mat 20:30-31

1:33 Dan 7:14

1:35 Mat 1:18; Luk 4:18

1:37 Keŋ 18:14; Mat 19:26; Mak 10:27; Luk 18:27

1:46 1Sam 2:1-10

1:48 1Sam 1:11

1:50 Mben 103:13, 17

1:51 Dito 5:15; 26:8

1:52 Job 5:11; 12:19; Mben 75:7; Mat 23:12; Jɛm 4:6, 10

1:53 Mben 107:9; 34:11

1:54-55 May 7:20; Mben 98:3; Keŋ 17:7; 22:17

1:59 Keŋ 17:12-13

1:60 1:13

1:68 Mben 41:13; 72:18; 111:9; Luk 4:18-21; 7:16; 19:44

1:69 Mben 132:17; Mat 20:30-31

1:70 Lum 1:2; Yɛsa 9:1-6; May 5:1-3

1:71 Mben 106:10

1:72 Mben 106:45; 105:8-9; Lɛw 26:42

1:73 Keŋ 22:16-18

1:74 Tay 2:12, 14

1:76 Mala 3:1; Mat 11:10; Mak 1:2; Luk 7:27

1:77 Yɛli 31:34

1:78 Ksm 34:6; Yɛsa 60:1-2; Mala 3:20

1:79 Yɛsa 9:1-5; 42:6-7; Mat 4:16

© 2011 WBT