10
1 9:1-3Boom bo bwɛɛm e, fiɛɛ fì me nshieele bô fitele fiem ficii, noo bunle yɛm ɛ̂ Nyo', nu lɛ bonyii bem bo Islael ban ke eboy. 2 Lem 22:3Fiɛɛ fì me ŋkee, ɛ ɛ̀ nulo ɛ́ me enjeme nu lɛ, bó kɛŋke naa shiee wvu baay fô Nyo' le. Geenɛn ɛ bó yaa kee kɛ je yi lɛŋ yì bó ebiì wvú le jó kɛ. 3 1:17No bó baa kee je yì Nyo' joo lɛ wee ké no nu teytey ɛ̂ wvú ɛjise jó, bó ɛ mum ɛ no gomte wase keegɛɛ yibo je, ɛ faŋɛ yaa bvuu nya bikuu bibole keebii yiyɛ je yì Nyo' joo lɛ wee nu teytey ɛ̂ wvú ɛjisɛ jó le kɛ. 4 Gal 3:24-25No Klistu to toɛ wase, ɛ je yi bonci yì bonyii to bii dvú keenu teytey ɛ̂ Nyo' ɛjise mum ka, wvu lɛ keenu teytey ɛ̂ Nyo' ɛjise keseen enù wase keelese fitele yî Klistu le.
Mboyma nu ɛ to fô wee tfuu le
5 Lɛw 18:5; Gal 3:12Muses to nu ɛ saŋ ɛkumɛ je keenu teytey ɛ̂ Nyo' ɛjise yì bii ɛ ɛ̀ nu bonci le lɛ, “Wee wvù gee no bonci gayte nu ke ecee nje wvú gɛɛle bonci bodvu bocii.” 6 Dito 30:12-14Fi ɛkumɛ je yi lɛ wee nu teytey ɛ̂ Nyo' ɛjise bii fitele fì wvú lese yî ye le nu ɛ bó ɛ saŋ lɛ,
“Fo wo ebiitè ɛ̂ fitele fiew e lɛ laa ɛ̀ nu eben yɛɛ fowe lɛ?”
Fì nu lɛ laa ɛ̀ nu eben yɛɛ eto bô Klistu lɛ. 7 Kɛnɛɛ lɛ,
“Fo wo ebiite lɛ laa ɛ̀ nu ebow yɛɛ woŋ boŋkfu le lɛ?”
Fì nu lɛ laa ɛ̀ nu ebow yɛɛ eto bô Klistu lɛ. 8 Geenɛn fí jemyi lɛ la? Fí jemyi lɛ,
“Diɛw Nyo' nu naa mbew yo le.
Yí nu diuw wo le, noo ɛ̂ fitele fiuw e.”
Ɛ ɛ̀ nu yí yì bese fewci ɛkumɛ keelese fitele yî Klistu le. 9 1Kol 12:3; Fili 2:11Ɛ́ wo jeme bô diuw wo lɛ Jisos nu Tata, ɛ bee fô fitele fiuw e lɛ Nyo' to nu ɛ bvuse wvú yî kpwe le, ɛ́ wo ke eboy. 10 Fí nu nonɛn njefo wee beŋe ɛ ɛ̀ nu bô fitele fiew ɛ Nyo' sɛ jo wvú lɛ wvú nu sɛ jay. Ɛ wee jemyi ɛ ɛ̀ nu bô diuw we ɛ Nyo' sɛ boyse wvú. 11 9:33Ŋwa' Nyo' jemyi lɛ,
“Kɛ wee wvù nu ɛ bee wvú le nu ke ekɛŋkɛ ken'wuumɛn kɛ.”
12 3:22Ben ekeè lɛ kɛ kejɛɛy jɛɛy nu dvú ɛntelɛŋ jo wee Juu bô wee wvù yaa nu kɛ wee Juu kɛ. Tata wvù nu Tata bonyii bocii nu kɛ mwaaŋ. Ɛ wvú ké no yen'yi can ye nyaa mwɛɛm ɛ̂ wee tfuu wvù beele fô wvú le. 13 Juɛ 2:32Fí nu no bó saŋ ɛ̂ Ŋwa' Nyo' le lɛ,
“Wee tfuu wvù beele teŋe diee di Tata le,
nu ɛ wvú nu ke eboyse wvú.”
14 Geenɛn ɛ̀ nulo ɛ́ bonyii eghan nɛɛ sɛ no beele teŋe wvú sɛ bó nu ɛ lese fitele yî ye le? Ɛ ɛ̀ nulo ɛ́ bó eghan nɛɛ sɛ lese fitele yî ye le sɛ bó ke nu ɛ yuw wase ɛkumɛ wvú? Ɛ bó nulo eghan nɛɛ sɛ keeyuw sɛ wee nfewcɛ wvù efewcɛ ɛkumɛ wvú ɛ̂ bó. 15 Yɛsa 52:7Ɛ ɛ̀ nulo ɛ́ bonyii eghan nɛɛ sɛ gɛn efewci sɛ bó nu ɛ tum bó? Fí nu ɛ bó ɛ saŋ lɛ,
“Bonyii ké yuuke ncín bikaa bi wee wvù too bô saaka wvù jee,
no yuuke njoŋ baay.”
16 Yɛsa 53:1; Jon 12:38Geenɛn, kɛ bonyii bo Islael bocii nu ɛ bee wase saaka wvù jee wvun e kɛ. Kɛ lɛŋlɛŋ no Ŋwa' wee ntum Nyo' wvù Yɛsaya jemyi lɛ,
“Tata, ɛ̀ nu yɛɛ dvú wvù nu ɛ bee saaka wvù bese fewci le?”
17 Jon 17:20Fí ɛ mum ɛ no nu lɛ keelese fitele yî Klistu le nɛn'yi yî fiɛɛ fì wee nu ɛ yuw e. Ɛ fiɛɛ fì wee yuw nɛn'yi fô fì bó fewci ɛkumɛ Klistu le. 18 Mben 19:4Me ɛ mum ɛ no mbiite lɛ laa bó to baa yuw ɛ? Kecɛɛy bó to nu ɛ yuw. Ŋwa' Nyo' gayte lɛ,
“Diɛw yibo to nu ɛ gɛn yî ɛkolɛ ke nshɛ le kecii,
ɛ njeme wvubo gɛn buy yî ɛbuw ɛ woŋ e ɛcii.”
19 Dito 32:21; Lum 11:11Me ɛ mbvuu ɛ no mbiite lɛ laa fí nu lɛ bonyii bo Islael to dioo yuw, faŋɛ yaa yuw ntay ɛ? Muses to nu ɛ yaw gay lɛ Nyo' gayte lɛ,
“Me nu ŋke eŋge ɛ́ kendoŋ ebene ben bô ketum
ke bonyii bo ɛcici le,
eŋge ɛ́ shém eton'yì ben bô ketum ke bonyii bò nu biyuŋ e.”
20 Yɛsa 65:1; Lum 9:30Ɛ Yɛsaya bvuu jeme lo sɛ nfan lɛ Nyo' gayte lɛ,
“Bonyii bò se baa egomte me nu bò nu ɛ yɛn me le.
Ɛ me ɛ nduŋcɛ ɛkolɛ kem ɛ̂ bonyii bò se baa ebiite me kɛ.”
21 Yɛsa 65:2Geenɛn fi ɛkumɛ bonyii bo Islael nu ɛ Nyo' to gay lɛ,
“Ɛdiuw ɛcii nu kɛ no me nshee ɛ me ɛ nɛke can keenfiisɛn bonyii,
geenɛn ɛ bó tɛmyi kɛ ɛ ɛ̀ nu bikuu gɛne ɛ̂ yibo je le.”
10:1 9:1-3
10:2 Lem 22:3
10:3 1:17
10:4 Gal 3:24-25
10:5 Lɛw 18:5; Gal 3:12
10:6 Dito 30:12-14
10:9 1Kol 12:3; Fili 2:11
10:11 9:33
10:12 3:22
10:13 Juɛ 2:32
10:15 Yɛsa 52:7
10:16 Yɛsa 53:1; Jon 12:38
10:17 Jon 17:20
10:18 Mben 19:4
10:19 Dito 32:21; Lum 11:11
10:20 Yɛsa 65:1; Lum 9:30
10:21 Yɛsa 65:2