1 JON.
2.
Rəhak nɨsualkələh mɨn, iatəte natɨmnat mɨn u kəm itəmat, matən-iəhau itəmat məmə onəsotolən nat tərat. Məto okəmə suah kit otol nolən rat, rəhatat kit əh-ikɨn etəm tatəghat rəhatat lan kəm Tata Uhgɨn, inu Iesu Kristo in Etəm Tətuatɨp. 
In un, itəm təmol sakrifais atɨp e rəhan nəmegəhən o rəhatat nolən rat mɨn, kən o nat u, neməha otəsol mɨnən Uhgɨn. Kən təməsolən o rəhatat pɨsɨn əm nolən rat mɨn, məto rəha netəmim rafin agɨn-əh e nətueintən. 
Kitat okotɨtun əsas məmə kotɨtun Uhgɨn okəmə kitat koatol nəwian. 
Etəm u tatən mə “Ekɨtun Uhgɨn,” məto təsolən nəwian, in ieiuə, kən nɨpahrienən tɨkə lan. 
Məto etəm un tatol rəhan nəghatən, nolkeikeən rəha Uhgɨn təmatɨg mɨnɨp wɨr pahrien e nɨkin. Etəm u itəm tatən məmə tatəper-ipən lan, otəkəike mətəp suatɨp kitiəh əm itəm Iesu təmɨtəp. Nolən u tatəgətun əsas məmə kitat koatatɨg lan. 
Nɨkik keike mɨn, io esəteən nəghatən wi kit kəm itəmat məmə onəkotol, kən məto iatəte in oas itəm nəmotos rəkɨs e nətuounən, nian nəmotəto namnusən təwɨr; nəghatən oas u in nəghatən nɨnəmotɨtun. 
Məto e nehmən kit mɨn, nəghatən u itəm iatəte tatɨmnə otəmat məmə onəkotol, in tatəuhlin məmə nəghatən wi, məto-inu kɨnəplan e suatɨp wi kit e nəmegəhən rəha Iesu ne rəhatəmat. Məto-inu roiu, napinəpən tɨnatagɨm, kənu nəhag-əhagən pahrien tɨnatasiə rəkɨs. 
Kən etəm u tatən mə in tətatɨg e nəhag-əhagən məto tatetəhau pian, in tətatɨg əh e napinəpən. 
Etəmim u itəm tolkeike pian, in tatətul e nəhag-əhagən, kən nat kit tɨkə e nɨkin məmə otapitətəl lan, morin. 
Məto etəmim u itəm tetəhau pian, in tətatɨg e napinəpən, kən mətan e napinəpən, kən məruru ikɨn tatuwɨn-pən ikɨn, məto-inu napinəpən tatohamɨs nɨganəmtɨn. 
Rəhak nɨsualkələh mɨn, iatəte naoa u kəm itəmat, məto-inu Uhgɨn təmafəl rəkɨs nolən rat mɨn rəhatəmat o nat u itəm Iesu təmol. 
Tata mɨn, iatəte nat u kəm itəmat, məto-inu itəmat nəmotɨtun in, itəm təmaupən matɨg e nətuounən. Netəm aluə mɨn, iatəte nat u kəm itəmat, məto-inu itəmat nəmotol win e etəm rat, Setan. 
Nɨsualkələh, eməte nat u kəm itəmat, məto-inun nəmotɨtun Tata Uhgɨn. Tata mɨn, eməte nat u kəm itəmat, məto-inu itəmat nəmotɨtun in, itəm təmaupən matɨg e nətuounən. Netəm aluə mɨn, eməte nat u kəm itəmat, məto-inu itəmat nakotəsanən, kən nəghatən rəha Uhgɨn tətatɨg e nɨkitəmat, kən nəmotol win e etəm rat, Setan. 
Sotolkeikeən nətueintən o natɨmnat mɨn rəha nətueintən. Okəmə suah kit tatolkeike nətueintən, kən nolkeikeən rəha Tata Uhgɨn təsatɨgən e nɨkin. 
Məto-inu natɨmnat rafin e nətueintən u, təsɨsɨ-pənən o Tata Uhgɨn, məto rəha nətueintən əm. Natɨmnat u rafin rəha nətueintən, ilat u, naumɨsən o natɨmnat rəha nɨpətɨtəm əm, kən naumɨsən o natɨmnat itəm tatiuw rəkɨs nɨganəmtɨtəm, ne nausitən o rəhan nautə mɨn ne nepətən. 
Kən nətueintən u otəpanɨkə. Kən naumɨsən o nautə mɨn otəpanɨkə. Kən naumɨsən o nolən mɨn rəha nətueintən itəm koatiuw nətəlɨgən rəha netəmim otəpanotɨkə. Məto etəmim itəm tatol nəwia Tata Uhgɨn, in otətatɨg lilɨn. 
Nɨsualkələh, kotegu-pən e namnun nian. Nəmoatəto məmə tɨkɨmɨr kit rəha Kristo otuwa. Kən roiu tɨkɨmɨr mɨn rəha Kristo tepət, kɨnotuwa rəkɨs. Tol nəhlan, kitat kotɨtun məmə inu, kɨnoategu-pən e namnun nian. 
Netəm mɨn u, kəmotapəs rəhatat niməfak mɨn məto-inun ilat sənəmə rəhatat agɨn-əh mɨn. Okəmə rəhatat agɨn-əh mɨn, kəməsotietən etat. Məto ilat kəmotiet etat, məmə otəgətun məmə ilat sənəmə rəhatat mɨn. 
Məto itəmat un, Etəm Tətuatɨp, in təmətəfiə kəm itəmat e Narmɨn Rəha Uhgɨn, kən itəmat rafin nəkotɨtun nat u. 
Iatəte nat u kəm itəmat, sənəmə nəkotəruru nɨpahrienən, məto itəmat nɨnotɨtun rəkɨs nɨpahrienən, kən motɨtun məmə nɨpahrienən təsoe-inən neiuəən. 
?Pah u in ieiuə? Etəmim u itəm tatən məmə Iesu sənəmə in Kristo itəm Uhgɨn təmən məmə otahl-ipa. Etəmim u inu, in tɨkɨmɨr rəha Kristo. In təsənən nɨpahrienən e Tata Uhgɨn ne Nətɨn. 
Etəm təsənən nɨpahrienən e Nətɨn təruru nosən Tata. Etəm tatən nɨpahrienən e Nətɨn, in tatos mɨn Tata Uhgɨn. 
Pəs nat naka nəmotəto e nətuounən, nian nəmotəto namnusən təwɨr, otatəper-ipən əh etəmat tiəkɨs. Okəmə nat naka nəmotəto e nətuounən otatəper-ipən etəmat, kən itəmat onakoatəper-ipən e Nətɨn, ne Tata Uhgɨn. 
Kən nat u inu, nəmegəhən itulɨn, in təmən-iəkɨs məmə otos-ipa kəm kitat. 
Iatəte nəghatən mɨn u kəm itəmat matən-iarəp netəm mɨn u itəm okotiuw rəkɨs itəmat. 
Məto itəmat u, nətəfiəən rəha Narmɨn Rəha Uhgɨn itəm nəmotos e Kristo, in tətatɨg əh e nɨkitəmat. ?Tol nəhlan, pah mɨn tɨtun nəgətunən nat wi kit kəm itəmat? Narmɨn Rəha Uhgɨn tatəgətun natɨmnat rafin kəm itəmat, kən nətəfiəən əh rəhan, in nɨpahrienən, sənəmə neiuəən. Tol nəhlan, otəper-ipən əskasɨk lan, tahmen-pən əm məmə in təməgətun itəmat məmə nəkotol. 
Kən roiu əh, nɨsualkələh, otəper-ipən lan, məmə nian in otuwa kən kitat kəsotəgɨnən məsotaulɨs-inən nɨganəmtɨn e rəhan nuwamən. 
Okəmə nəkotɨtun məmə in tətuatɨp, onəkotɨtun əsas məmə netəmim rafin itəm koatol nolən ətuatɨp, ilat u, nenətɨn mɨn.