Rom.
10.
Aku taina, i roto te hatu manava anau ia ma na lotu anau i TeAtua raa, anau e hihai roo ma te kanohenua Israel raa ki ora! 
Anau e lavaa te meatu te hakamaoni pera ma na tama raa ku hakattina hai mahi roo i TeAtua; e meia na hakattina na tama raa se isi te tuurana i te vahi te atamai hakamaoni raa. 
Na tama raa ni se illoa te ara TeAtua e mee na tama ki ttonu ma Aia raa, e meia na tama raa e hahaivi ma ki hakammoe koi na hakataakoto laatou hokolaatou, tena na tama raa ku se hihhai ki tauttari te ara tera TeAtua e mee na tama ki ttonu ma Aia raa. 
Maitaname Krais e taa mate na Tuaa raa, tena na tama e hakattina Aia raa e me ki ttonu ma Aia. 
Moses ni taataa na tattara nei pera ma na tama e tauttari na Tuaa raa e me ki ttonu ma TeAtua: “Te tama e tautari na tattara na Tuaa raa e me ki ora.” 
Emeia hea te Launiu Tapu raa e tattara mai i te vahi kootou e me ki ttonu ma TeAtua i na hakattina kootou raa e mee peenei: “Akoe se lavaa te vahiri hokkoe ma, ‘Koai te tama e me ki haere i aruna i te vaelani?’ ” (ki kou mai Krais i raro). 
“Akoe se lavaa hoki te vahiri ma, ‘Koai te tama e me ki haere i te maarama i raro raa?’ ” (ki hakamahike Krais i taha ma te mate). 
Hea te Launiu Tapu raa e tattara raa e mee peenei: “Na tattara TeAtua raa ku tappiri atu kootou, ia ku mmau na maihu kootou, ia ku mmoe i roto na hatu manava kootou,” teenaa ko na tattara i te vahi te hakatina tera maatou ni takutaku atu raa. 
Kame akoe e tattara te hakamaoni ma na maihu akoe raa pera ma Jisas ko TeAriki, tena akoe ku hakatina hakamaoni pera ma TeAtua ni hakamahike Tama raa i taha ma te mate, tena akoe e me ki ora. 
Maitaname taatou e me ki ttonu ma TeAtua kame taatou e hakattina, tena taatou e me ki ora hoki kame taatou e tattara hakamaoni ma Krais ko TeAriki taatou. 
Te Launiu Tapu raa e tattara mai ma, “Te tama e hakatina i te TeAtua raa e me ki se lavaa te napa.” 
Te mee nei e haere i na tama hakaatoa, maitaname na Jiu raa se kkee i taha ma na tama seai ma ni Jiu raa; TeAtua ko TeAriki hokotahi na tama hakaatoa, tena Aia e hakatapu hai mahi roo na tama tera e kainno ake Aia raa. 
Pera ma te Launiu Tapu raa e tattara mai ma, “Na tama hakaatoa e kainno ake TeAtua ki tokonaki laatou raa e me ki ora.” 
Kaa na tama raa e me ki lavaa peehee te kainno ake kame laatou se hakattina? Kaa na tama raa e me ki hakattina peehee kame laatou se llono na tattara raa? Kaa na tama raa e me ki llono peehee kame na tattara raa se ttae ake laatou? 
Tena kaa na tattara raa e me ki ttae ake peehee kame se hai tama e kauna ria ki oo no takutaku na tattara raa? Pera ma te Launiu Tapu raa e tattara mai ma, “Te oo mai na tama e hahaere ma te Rono Tauareka raa e tauareka roo!” 
Emeia se mee ma na tama hakaatoa e hakattina i te Rono Tauareka raa. Aisaia hokoia ni tattara mai ma, “TeAriki, koai na tama e hakattina na tattara maatou raa?” 
Tena kootou e me ki hakattina kame kootou e llono na tattara raa, tena na tattara raa e me ki ttae atu i na takutaku i te vahi Krais raa. 
Emeia anau e vahiri atu kootou: E hakamaoni pera ma na tama se llono na tattara raa? Na tama ni too na tattara raa, maitaname te Launiu Tapu raa e mee mai ma: “Na reo na tama raa e ttae na kina hakaatoa i roto te maarama nei; tena na tattara na tama raa e ttae na kina e mmao i roto te maarama nei.” 
Tena anau e vahiri atu hakaraoi: Na tama Israel raa se illoa na tattara raa? Moses hokoia ko te tama kaamata e mee na tattara aia ma: “Anau e me ki tokonaki na tama se nnoho hakapaa raa ki mee te kanohenua Anau raa ki manava kkere; Anau e me ki tokonaki te kanohenua na tama se atamai raa, ki mee te kanohenua Anau raa ki lloto.” 
Tena Aisaia ni hakamakkau mai i te vahi aia te saaita aia ni mee mai ma, “Na tama se sesee Anau raa e oo mai no kkite Anau; Anau e tuu ake i na tama se vahihhiri Anau raa.” 
Emeia Tama raa e tattara mai i te vahi na tama Israel raa ma, “Anau e hihai ki huri ake te laoi Anau raa i na tama se tauttari no hakataukaa ma Anau raa.”