1 Aha ndranuhun ma ndratanan ta ndramas, ahi bwese anya kili ta aseben iri mwan ma badih ta Kindrei. Eme ma, jo batorou sahou lawe-en ta nyala aliy bwe. 2 Tasah, jo ndratanan, aha badeh, aso-ok ta amekes gok dah, ta atukum ma adeu luk ta aseben iri. Eme ma, len mara-ei jo atudun nyara aha, ma tiye iri lau ta Kindrei badu kon tinan Masadoniya. Jo tiye tiri i buku doh: “Na jaha mene ndra-au, iri lau badu Akaya lokowani iri ta amekes gok ta atukum luk.” Ma iri anuhun sahou ta aha amekes gok dah ta aseben iri lau badu Judiya, ma suri ndrine iri lau solo-an badu Masadoniya amekes ale. 3 Arile, jo bwalek sahou ahi amekes ta atudun nyara aha asahan buku sahou laleyah. Mwasin ta aha kalokou le, buku jo mene asehek tiri. Jo abudon ta aliy, eme ma jo tiye nadu tine to oro awek hawe aha. 4 Ehe, ahi abudon handru, aha kameh alokou ta adeu lakou. Eme ma jo abudon, kora-on iri lau ta Kindrei rayah badu Masadoniya kala hawek ale ta atou aha, ma aha balokowani luk bwe, bwilima kameh eme hamon ta to ja. 5 Eme ma, jo abudon ta tiye nadu tine oro ma taloh doh kawek kasahan hawe aha kalokowani ndramas nane aha tandrakan ta adeu ili. Jo kameh in hamon ewek, ya buku iri lau kame hawek iri winiyan atanan, aha amwenen sekesek ta adeu luk doh. Bala buku jo ewek ariu budon taha, ma bwili aha ama ta atukum luk doh.

6 Ya, aha kabudon kamwenen ta sahou dah: Ndramak batah nyamon sola bwe, iy kameh bakohok sali nyamon solo-an bwe. Ya, ndramak atah nyamon solo-an, iy kameh akohok sali nyamon solo-an. 7 Eme ma, aha ari, ari kabudon ndrinem le amwenen op, ma ou tanam ta saba lakou, aha anya kadeu. Kora-on ari mwan o badih, ndrinen basekesek ta edeu lakou bwe, ma iy abudon i buku doh: “Iri mwan ma badih abadok labai ma aruwi jo, ma bwilik ama buku jo badeu rayah luk bwe.” Kora-on iri budon solo-an doh udu taha, ma aha adeu luk. Kindrei badeh, aso-ok ndramak, iy sekesek ma edeu lakou na so-ok ma na budon tan amwenen. 8 Ma Kindrei kameh winiya edeu taha lakou solo-an handru. Ma aha kameh taha lakou solo-an labai ja, ta winiyan aseben manyah taha. Ma lakou solo-an doh kameh udu aliy ta aseben aha ta amekes iri gok mwasin. 9 Udu bolo buk ndrabun, Kindrei asehek i buku doh:

10 Kindrei amwenen kameh edeu buwa kei ta atah ili tiri mwan ma badih. Ma iy ale kameh edeu nyamon ili niri mwan ma badih mara-ei. Eme ma iy kameh edeu taha lakou ili le winiya aha. Ma aha winiyan adeu ili tiri lau ta Kindrei rayah ja. Ma kandriyen taha kameh asahan mwasin mara-ei, i buku ndramak atah buwa kei, ano ato-ou salin solo-an labai. 11 Ya, Kindrei kameh edeu lakou solo-an ewek taha, ma aha kameh winiyan adeu solo-an ale ili ta nadu tine aha iri mwan ma badih ta Kindrei. Aha amekes i buku doh ta ahi bwese ndramas doh iu, ma iri mwan ma badih kameh adeu wurah ili ta Kindrei ta gok aha amekes. 12 Sahou mara-ei dah handru. Gok aha amekes ta adeu luk, kameh aseben iri lau rayah ta Kindrei, iri lakou bwe. Ma idah kameh bwidi iri adeu wurah tinan labai mara-ei ili ta Kindrei. 13 Gok aha amekes dah ta aseben iri lau mwan ma badih ta Kindrei, kameh leheya i buku doh: Aha badeh, aso-ok labai ta aseben iri lau rayah ja. Eme ma, iri kameh atudun nyara Kindrei. Tasah, iri kameh atanan aha badeh, a-en hamon le ta sahou ta Kindrei, ma atiye sahou mwasin ta Krais. Ma ale, udu bolo iri lau ta Kindrei badu Judiya akohok ndramas dah, ma iri kameh winiya atanan aha anya kadeu luk ta aseben iri rayah ale. Iri kameh atudun nyara Kindrei iu ili loken mara-ei.

14 Ma iri kameh atanan Kindrei badeh, amekes kandriyen mwasin labai handru ewek taha. Eme ma, iri kameh aso-ok aha labai, ma iri winiya asolom ili ta Kindrei, iy edeu nyosowan laba tinan ewek taha. 15 Ndramas, Kindrei edeu eme tataha badeh, tinan labai, ma taha winiyan basehek na boho taha bwe. Taha badeh, kadeu wurah kili ta Kindrei ta ndramas tan.