1 Aha badeh, ndrasahan nadu Kindrei, ma iy aso-ok aha labai. Eme ma, aha ka-en hamon ta kandriyen, iy amwenen amekes. 2 Kandriyen ta aso-ok iri mwan ma badih badeh, katondrok koha aha, buku iy mene atondrok koha Krais. Iy mene tikisi taha, ma iy atehei kohan amwenen eme ta aseben taha. Iy imek, ma atehei kohan ili ta Kindrei i nyara salom manahu buburen labai.

3 Eme ma, kandriyen ta karei, ma lomondra ndra-in marakon, ma hawe kandriyen ta madalakis sasahan ndrokowa aha. Aha mwan ma badih ta Kindrei, kora-on aha kasihi san tiri mwan ma badih, korou sahou kewek taha amekes kandriyen i buku doh. 4 Ma aha ale samekes sahou ndra-in, ma sahou konen bwe, ma sahou nyorei ndra-in. Idoh bamwenen bwe. Ndri-iy labai! Kindrei ndraruwi aha ndrame len ta kandriyen ndra-in, eme ma aha kadeu wurah kili tan, ta iy talawei aha are mine iri kandriyen doh. 5 Jo asehek amwenen ewek taha. Iri mwan o badih, a-en hamon ta kandriyen ta karei, o, a-en hamon ta kandriyen bolo-an, o, a-en hamon ta kandriyen ta madalakis (idoh i buku le kandriyen ta atudun iri kindrei ta wasai); iri mwan ma badih doh kameh, winiyan bame bolon hawe iri lau ta Krais, ma Kindrei kameh winiyan batondrok iri, bwe.

6 Aha katondrok aha kamwenen. Kora-on aha ka-en hamon ta sahou wasai tiri lau anya kariu aha ta a-en hamon tiri kandriyen ndra-in doh, jo mene ndrasehek ta aliy. Tasah, ndrine Kindrei irih tiri mwan ma badih nane tebelese sahou tan, ma a-en hamon tiri kandriyen ndra-in buku doh. 7 Eme ma, aha sabwilibwik ma samekes kawas hawe iri. 8 Tasah, bwena mene aha are ndra bolo kandriyen ta lulik. Arile, na dah, aha ndrasahan iri mwan ma badih ta Laban, ma aha ndrame ta lomada sun, ma iy sihi mada aha ndrasak ta atanan iri kandriyen ndra-in mene aha amekes. Eme ma, aha ka-en hamon ta kandriyen mwasin, buku iri mwan ma badih are ta lomada sun. 9 Sun ta Kindrei badeh, udu hawe aha, ma iy amekes iri kandriyen mwasin, iri kandriyen amwenen, ma kandriyen ta sahou handru asahan eme lewan. Aha badeh, ka-en hamon tiri kandriyen doh. 10 Ma, aha kabadok ta atanan iri kandriyen, ta Laban aso-ok, ma aha ka-en hamon ta aliy. 11 Aha sabwilibwik hawe iri mwan ma badih nane amekes kandriyen ndra-in ta bolo lulik. Iri kandriyen buku doh winiyan bato-ou salin mwasin bwe. Mwasin, ta aha kaleheya iri mwan ma badih, buku iri kandriyen doh ndra-in, 12 ma, hawe iri kandriyen nane aton, ma amekes ndra-in labai! Bwilik ama ta asehek taha ta lakou iri amekes. 13 Arile, sun ta Kindrei doh badeh, nyowonyani kati iri kandriyen marakon. Ma sun ta Kindrei ale winiyan tubuni koha iri mwan ma badih are bolo lulik, ma iri kameh winiyan arek na le lomadan. 14 Sun anya, ma lomadan lomotani lakou marakon ere le lewan. Eme ma, iy asehek i buku doh:

15 Eme ma, bale aha kudu taha, ta kandriyen ta tekedek taha. Aha sadek buku iri mwan ma badih tana iri Kindrei bwe, arile aha kadek buku iri lau ta tanan. 16 Na dah badeh, len tataha ta amekes kandriyen mwasin ta Kindrei. Tasah, len taha are aliy dah badeh, ndrandra-i mara-ei ta kandriyen ndra-in ta balik. 17 Eme ma, aha sala buku iri lau bale iri bwe, arile aha badeh, katanan kamwenen ta so-ok ta Laban, ma ka-en hamon le ta aliy.

18 Aha sa-un waen solo-an ta amekes aha abo lolo-ou. Arile aha badeh, kadih mara-ei na le Malawin Ndrabun. 19 Ma aha kayah wari hawe iri lau ta Kindrei. Aha kayah wari ta Debit,* Wari ta Debit badeh, udu bolo buk Wari ta Sahou Randra Le Malen. ma iri wari rayah ja ta atudun Kindrei, ma kayah bolos ta Malawin Mwasin ta Kindrei atehei udu bolo ndrine aha kili ta Laban. 20 Na bolo len marakon, aha kadeu wurah kili ta tama taha Kindrei, ta iri lakou marakon, udu bolo nyara Laban tataha Jises Krais.

21 Aha marakon ka-en bahandra iri mwan ma badih ari ari ta Kindrei rayah ja, ma ka-en hamon ta sahou tiri. Tasah, aha marakon badeh, a-en bahandra Krais, ma ta kandriyen doh aha kameh amekes ta atudun nyaran.

22 Aha badih tasou marakon, aha ka-en hamon ta boho iri mwan taha, i buku le aha a-en hamon ta Laban. 23 Tasah, mwan udu bwele-en ma atondrok udun, i buku Krais badeh, udu bwele-e iri mwan ma badih ta Kindrei. Ma iri badeh, badu bada Krais, ma iy mene andrei iri ndrame hamon. 24 Mwan ma badih ta Kindrei, iri badeh, are bahandra Krais. I buku le, aha badih ale, len marakon aha kado bahandra iri mwan taha.

25 Aha lau mwan, aha kaso-ok udu aha iri, i buku le Krais aso-ok iri mwan ma badih ta Kindrei, ma iy atehei kohan amwenen ta aseben iri. 26 Iy amekes i buku doh ta atehei kalem i tiri mwan ma badih ta Kindrei ta iri tan amwenen. Ta sahou tan amwenen iri atehei budon tiri handru in aliy, ma alomwa iri na gwa, eme ma Krais badeh, bwidi iri asahan ha-un handru. 27 Tasah, iy anya kamekes iri mwan ma badih ta Kindrei kasahan mwasin handru ta madan, ma iri kameh ari ndraka-an, ma ari bakuwa, ma iri lakou buku doh bwe. Iri kameh asahan lau ta Kindrei, ma ari ndra-in bwe. 28 Eme ma, aha mwan badeh, kaso-ok udu aha iri i buku le aha aso-ok bada aha amwenen. Are lau mwan aso-ok udun badeh, iy aso-ok ma atondrok iy amwenen. 29 Taha tanan, buku taha badeh, winiyan basumukok bada taha amwenen bwe, arile taha anyohan ma atondrok bada taha iri, i buku le Krais amekes i tiri lau ta Kindrei. 30 Taha mwan ma badih badeh, badu hawe bada Krais. 31 Idoh i buku buk ndrabun asehek: