1 Ado nadu tine ta budon handru badu hawek i san ta Kindrei. Ado badeh, jo winiyan bakahei ado bwe! Ya jo aseken labai ta kudu hawe ado! Tasah, ado badeh, ndra ari buruwen hawe Krais Jises, ma eme kandriyen tado doh, mesekei jo sekesek labai hawe jo masiye ado handru! Tasah, na ado aseben jo, lahou tek udu ndrokowa ado ba-au laleyah bwe. Eme ya ado nadu tine badu hawek i san ta Kindrei, ado samani sahou tek jo atorou ma asehek ewek tado mene doh. Ado kales boto-on ta budon handru tado i ta Laban. Ma ado badeh, budon tado ki randra le.

2 Eme ya ah badih ma la-uh badeh, Yuwodiya hawe Sintiki, ah kanuhun sahou. Jo aseken ah kase ta budon randra le, ya ah sasobobo ndri-iy. Tasah, ah ma la-uh badeh, nadu tine ah le, badu hawe Laban le. 3 Ehe, ou en, Sisikos, tasah nyaram badeh, moson ndramak ta lahou badu hawek. Jo aseken ou ala aseben budon turu badih ma la-uh badeh, ma ou tiye turu sasobobo uru. Tasah, uru mene are hawek aseben jo ta atiye sahou mwasin. Uru ma la-uh doh mene hawe Klemen ma oro lau rayah aseben jo ta amekes lahou; oro doh mene Kindrei ndratorowenei nyara oro mari ndra bolo buk tan hawe nyara iri lau kameh koha iri udu le buku doh.

4 Eme jo katandra-un tado ja, ado kasekesek Laban kudu le buku doh. Tasah, ado ndra ari buruwen hawe Laban. 5 Ya bale ado samaniy, Laban mirihik eme ai. Eme kandriyen mwasin tado ta ado le, badeh, ado kamekes ki ta lau mari. 6 I buku none ado bwese maha ta abudon solo-an, ado satikisiy ndri-iy. Arile, udu bolo maha mari badeh, ado kasolom ki ta Kindrei ya ado kasehek bolo maha tado ki tan hawe kadeu wurah ki tan ta aliy. 7 Eme na salom tado le, Kindrei kameh mesekei tikisiy tado iu. Arile, ado kameh winiyan bala tanan bala mwasin bwe le, aliy ado atona i buku doh. Eme ya Kindrei badeh, winiyan tawiy, ma winiyan tondrokei budon tado, tasah ado badeh, ahas hawe Krais Jises.

8 Eme ya ado nadu tine badu hawek ta budon handru. Ta sendrehendreh ta aliy, iri lakou doh ado katawiy kihis: Iri lakou ndra handru le, kandriyen mwasin ta amekes iri lau kasekesek, ma kaseben bolo manyah tiri in hamon ta sahou randra le, ma hawe lakou mwasin kameh iri lau asehek ta aliy. Iri lakou doh badeh, ado kabudon ta aliy solo-an. 9 Eme ya saba lakou le mene ado ndratou jo ndramekes, ya ado ndratanan ta aliy, ado katehei ki ta lahou ma kamekes. Ya, i buku none ado amekes kameh, Kindrei, ndramak ta edeu tataha kandriyen ta ado le, kameh udu hawe ado aseben ado.

10 Jo sekesek laba tinan labai i ta Laban ta ado badeh, abudon jo ja, ta lakou. Handru labai, ado abudon jo laba tinan labai. Arile, ado, ado mirihik ndraheh? Ta aseben jo ja i buku bwena. 11 Eme ya jo asehek doh ta anya jo andriliu ta lakou, bwe. Tasah, jo ndraselen ta bolo iri maha doh. 12 Jo tanan ta jo kameh andriliu ta lakou ma jo ale tanan ta jo kameh bandriliu ta lakou bwe. Jo ndraselen ta aliy ta bolo maha-an mari. I buku none ndrinek idih deh, jo imeson o, jo andriliu ta lakou deh, jo bandriliu bwe, jo badeh, ndraselen ma sekesek le. 13 Tasah, jo winiyan amekes lahou mari na boto-on tan iy edeu eme tek.

14 Eme ya jo baseken ta ado kanyohan jo na lakou na len jo udu ta maha-an bwe, arile jo sekesek ta seben tado. 15 Ma laba tinan labai badeh, ado lau badu Pilipai mene tana ado, ma mwena handru, kabatana jo atiye sahou mwasin udu Masadoniya eme len. Idoh mene ado lau ma mwena handru ta budon handru i ta Kindrei are hawek aseben jo ta lakou ili eme, ili eme ta adeu lakou ta aseben. 16 Na len jo mene udu Tesalonaika ya jo aseken lakou, ado baruwani jo bwe. 17 Idoh ta tiye anya ja, jo aseken lakou, bwe. Arile, jo aseken labai ta takaleh rayah lakou ta Kindrei ja kewek la-u lakou rayah mwasin tado mene ado ndrakohok. 18 Eme ya ado ki tanan ta lakou mene ado suni Ipaproditus atiye eme, badeh, solo-an labai tek. Lakou doh i buku none iri lakou asun i ta salom mahu buburen labai eme Kindrei sekesek ta aliy handru. 19 Eme ya Kindrei tek kaweleyani ado na lakou ado aseken ta aliy i san ta Krais Jises. Tasah, iy badeh, tan lakou solo-an labai udu aliy.

20 Eme ya taha mari kamasiye ma hawe katudun tama taha Kindrei kudu le buku doh. Handru.

21 Jo edeu sahou ta sekesek tek ewek tado lau ta Kindrei ari ari ado badeh. Ado ki nyara jo kedeu sahou sekesek i buku none lau ta Krais Jises. Ma oro lau ta aseben ta lahou ado hawek kada-ah, tiye sahou sekesek toro ewek tado ale. 22 Ma hawe oro lau ta budon handru, oro ateu lahou ado asiu tinan ta Sisa hawe oro lau ta budon handru ado kon tinan Rom kada-ah, tiye sahou sekesek i tado.

23 Eme ya udu bolo salom tek i ta Laban Jises Krais hawe tikisiy tan kamekes mwasin kewek tado mari. Handru.