3
Kindrei badeh, in hamon ta sahou tan
1 Buku sahou nane jo atorou ndrawek taha i handru, ya, sebwe iri lau badu Juwis ndrakohok iri lakou mwasin labai tiri lau badu leheleh ja nadeh? Ya saba lakou mwasin kameh asahan tiri Juwis i buku none kasan ku-i iri? 2 Seben solo-an solo-an udu aliy oh! Ya, ari ma bwena badeh, i buku doh: Kindrei mene atehei sahou tan amwenen i tiri Juwis ta atondrok ma aseben iri mwan ma badih winiyan atanan ta iri sahou tan marakon.
3 Handru labai! Iri rayah batehei budon tiri ba-en hamon ta sahou dah bwe. Arile aha abudon i buku sah bah? Sebwe budon ndra-in nane iri a-en hamon ta aliy kameh amekes Kindrei tubuni budon ma karuwani sahou tan ai? 4 Winiyan bwe! Buku lau marakon kamekes kandriyen ta wasai, Kindrei le ari badeh, bwe! Iy badeh, asehek le sahou handru len marakon, i buku none ndratorowenei,
“Kindrei, na saba len ou asehek, idah kameh, ou aleben sahou, ndra handru le;
ya buku none ari ndramak anya katuw ou a ta mada sahou, idah kameh, ou winiyan bakunoh bwe, iy le kameh kakunoh mara-ei.” Wari 51:4
5 Taha kasehek ki buku sah bah? (Jo asehek sahou dah i buku taha ndramak asehek). Ki buku kandriyen ndra-in taha ale amekes, idoh badeh, leheyani iri mwan ma badih ta kandriyen mwasin ta Kindrei, ya idah kameh, taha kasehek saba sahou bah? Taha katiye anya ja, Kindrei edeu maha-an eme la-u taha le badeh, ari katin bwe? 6 Bwe handru en! Buku Kindrei, iy bamwenen bwe, ya barala buku sah ja handru, iy kameh kaleben kandriyen tataha mwan ma badih mari? Iy winiyan bwe, neh? 7 Ya, buku sahou wasai tek ili aseben iri mwan ma badih nane atanan sahou handru ta Kindrei, ma buku wasai doh bwidi nyaran i tinan labai ja, ya buku sah ja iy aloh jo ndramak ta amekes kandriyen ndra-in, ma iy edeu maha-an eme bwele-ek ta aliy? 8 Buku sahou doh handru, sebwe taha kasehek ki buku doh ja ai, “Abo, taha kamekes kandriyen ndra-in, tasah kandriyen mwasin kameh winiyan asahan ta lakou doh.” Sebwe kandriyen i buku doh mwasin, nadeh? Bwe handru! Arile, iri lau mwan ma badih rayah anya, “Handru, sahou ta Pol buku baden eh.” Are oro mwan ma badih orou sahou ndra-in buku doh, Kindrei kameh edeu maha-an i la-u oro.
Lau mari ndra ndra-in le
9 Sendrehendreh ta aliy taha kasehek ki buku sah bah? Sebwe taha lau badu Juwis badeh, are mwasin labai ja tiri lau mwan ma badih rayah ja nadeh? Bwe handru en! Tasah, taha mene ndrasehek, iri Juwis hawe iri lau badu leheleh mari badeh, ado bahandra tondrok ta kandriyen ndra-in mari. 10 Sahou dah handru, i buku none ndratorowenei,
“Lau mari badeh, ndra ndra-in le ai, ari mwasin ja bwai;
11 Ari ndramak badeh, tanan mwasin udu tan ja bwai,
ma hawe ari ndramak batakaleh tekedek ta Kindrei bwai.
12 Iri mara-ei ndramani san mwasin, ma iri mara-ei ndrasahan lau ndra-in labai.
Ari ndramak bamekes se kandriyen mwasin bwai.” Wari 14:1-3; 53:1-3; Leheya 7:20
13 “Boho iri badeh, i buku lek ta lau amak bohon apwa le,
tasah iri sihi boho iri ta amekes sahou wasai.” Wari 5:9
“Iri amekes sahou solo-an labai ta bokoro-ei ndramak ari ja, i buku mada lihi mwak ndra-in ta atoh ndramak imek.” Wari 140:3
14 “Boho iri badeh, ndrarahak le aten, ma ndra losen le.” Wari 10:7
15 “Kati iri edek suwi anya ta kidi ndramak kimek le;
16 Bolo len mara-ei iri abo gok ta bokoro-ei lakou solo-an, ma adeu maha-an ili tiri mwan ma badih.
17 Iri tana iri kandriyen ta manyah ado le hawe iri lau rayah ja bwe.” Aisaya 59:7-8
18 “Ma iri banoh se Kindrei bwe.” Wari 36:1
19 Ya nadah, taha ndratanan, iri sahou mari, batanau ta Kindrei amekes, idoh badeh, i tiri ado bahandra tondrok ta batanau doh. Eme ma, ari mwan o badih ja winiyan basehek anya, “Jo mwasin mara-ei,” bwe. Taha mwan ma badih badu kon marakon amekes lakou ndra-in i ta mada Kindrei, eme ma batanau tan kameh atehei taha mara-ei a ta mada sahou. 20 Tasah, Kindrei atehei batanau tan eme tataha, ta leheya taha ta kandriyen ndra-in tataha i buku sah. Batanau tan le doh, winiyan bamani kandriyen ndra-in tataha bwe. Eme ma, ari ndramak winiyan basahan mwasin ta mada Kindrei na lahou iy amekes in hamon ta batanau malen, bwe.
Ndramak atehei budon tan handru in ta Krais, Kindrei kameh aloh iy mwasin ta madan
21 Arile, nadah, Kindrei ndraleheyaniy ndrame tataha ta san rasan ja, ta taha ka-en hamon ta aliy, ma iy kameh aloh taha lau mwasin. Iy basahan ta san ta a-en hamon ta batanau Kindrei edeu i ta Moses, bwe. Arile, buk nane Moses atorou ma buk iri propet atorou ale, iri asehek sahou i san doh, ta Kindrei ki-in hamon ta amekes taha kasahan mwasin. 22 San i buku doh: Buku are mwan o badih iy atehei budon tan handru in ta Jises Krais, Kindrei kameh aloh iy ndramak mwasin. Kindrei bamekes san rasan tiri Juwis, ya san rasan tiri lau badu leheleh ja, bwe. Iy bwidi san rasan le kabwe. 23 Tasah, taha mari badeh, ta amekes kandriyen ndra-in, ma taha asahan i le randra. Taha ataras mara-ei ta kalem mene Kindrei atehei ma taha winiyan bala bolo lomadan tan bwe. 24 Arile, Kindrei tikisi taha, ma i san ta Krais Jises akohok taha ame hamon, iy edeu ndramas tan laleyah eme tataha. Ya, na ndramas tan le doh, iy aloh taha mwasin mara-ei ta madan. 25 Kindrei atehei Jises eme mada lau mari, iy imek i nyara salom ta sikine kandriyen ndra-in ta are atehei budon tan handru i ta ndrayen. Kindrei amekes doh, ta leheya iy badeh, in hamon le ta kandriyen mwasin. Tasah, ndra bwena ndra-au eme taku nadah, iri lau amekes kandriyen ndra-in, arile Kindrei amekes kandriyen amunum mara-ei ili tiri mwan ma badih marakon, ma iy badeu maha-an laba tinan suwi bala ta kandriyen ndra-in nane iri amekes bwe. 26 Arile, na len dah ja, Kindrei suni Jises eme imek i nyara salom ta akunoh kandriyen ndra-in taha mene amekes. Handru, iy amekes i buku doh ta taha winiyan atanan, iy le ari badeh, mwasin mara-ei. Ma iri mwan ma badih marakon atehei budon tiri in ta Jises imek ta akunoh iri ame hamon, Kindrei winiyan aloh iri mwasin ta madan.
27 Ya, i buku Kindrei amekes lakou doh ta aseben taha, ya saba madasan handru kameh taha katudun nyara taha le amwenen? Kameh bwe nadeh! San doh ndraso mara-ei. Arile, ta saba katin handru san doh ndraso mara-ei? Sebwe taha ba-en hamon ta batanau Kindrei edeu i mine Moses mene bwe, eme ya, idoh le badeh, sokei san ta atudun nyara taha le nadeh? Bwe! Kandriyen ta adeu budon handru i ta Jises, idoh le adeh, sokei san mara-ei ta atudun nyara taha. 28 Eme ma, taha atanan, buku mwan o badih atehei budon handru in ta Jises imek ta sikine kandriyen ndra-in tan mara-ei iu, Kindrei winiyan aloh iy mwasin mara-ei. Arile, are mwan o badih in hamon le ta batanau Kindrei mene edeu i mine Moses, Kindrei kameh winiyan basehek anya, iy mwasin mara-ei, bwe. Winiyan bwe! 29 Ya buku sah bah? Sebwe Kindrei badeh, Kindrei tiri Juwis le ai? Ya iri lau badu leheleh bwai? Bwe, iy Kindrei tiri lau badu leheleh ale. 30 Tasah, Kindrei ari le doh kabwe. Iy le kameh anyolom kandriyen tiri lau asan ku-i iri, ma iy anyolom kandriyen tiri lau basan ku-i iri bwe; buku iri ma lubuk atehei le budon tiri handru in ta Jises imek ta sikine kandriyen ndra-in tiri, iy winiyan aloh iri ma lubuk mwasin mara-ei. 31 Ya, buku iri mwan ma badih atehei budon tiri handru in ta Jises ma Kindrei aloh iri mwasin mara-ei, sebwe budon tiri handru doh badeh, akohok ta ano ma tubuloh batanau mene Kindrei edeu ili mine Moses nadeh? Bwai! Kandriyen ta budon handru doh, leheya taha i buku batanau badeh, boto-on le gwek.