10
Iri Isra-el tana iri kandriyen ta Kindrei bwe
1 Aha nadu tine, jo badeh, bolo ndrinek aseken handru, ta Kindrei kakohok iri lau tek Isra-el kame hamon ma iri samak. Eme ma jo asolom i ta Kindrei ta aseben iri na len mari. 2 Tasah, jo tanan iri mwasin labai, ma jo winiyan asehek i buku doh: Budon tiri badeh, ta amekes lahou ta Kindrei. Arile, budon tiri doh badeh, bamwenen ta tanan ta Kindrei bwe. 3 Ya eme iri bala tanan ta saba san handru Kindrei aloh iri lau mwasin mara-ei ta madan bwe. Ma eme iri amekes na budon ma boto-on tiri laleyah, ya eme iri batehei iri bala baha Kindrei baloh iri mwasin ta madan bwe. 4 Tasah, Krais ndraweneyani batanau malen ta Moses kabwe, ya eme are lau oro atehei budon handru le badeh, Kindrei aloh iy mwasin mara-ei ta madan.
5 Moses asehek kandriyen toro lau nane anya ka-en hamon ta batanau malen; buku none oro anya Kindrei kaloh oro mwasin mara-ei ta madan, Moses tiye oro badeh, kamekes ki buku doh:
“Are lau le, iy in hamon ta lakou mari batanau malen asehek, iy kameh akohok kohan ha-un ta udu le buku doh.” Lebitikus 18:5
6 Arile, ndramak in hamon ta kandriyen ta budon handru, eme Kindrei aloh iy mwasin mara-ei ta madan, iy ndramak doh in hamon ta sahou doh, “Ndrinem badeh, satiye anya,
‘Are lau winiyan ili bolo kandrah?’ ” Dutoronomi 30:12
ma kandrei Krais keme andri katiye sahou mwasin keme tataha. 7 “O,
‘Are lau winiyan ili bolo lek ndrahu lau amak?’ ” Dutoronomi 30:13
kamete-ei Krais keme loken katiye sahou mwasin keme tataha. 8 Arile kati sahou nane i buku doh:
“Sahou mwasin asah udu mirihik hawe aha; ma udu boho aha hawe ndrine aha badeh.” Dutoronomi 30:14
Sahou doh badeh, sahou mwasin le nane dah aso atiye anya iri lau katehei budon tiri handru ki-in ta Krais.
9 Ya, i buku none ou asehek na bohom eme lewan anya, “Handru, Jises badeh, iy Laban,” ma ou atehei budon tam handru na ndrinem katiye ta Kindrei badeh, mete-ei Jises ta imek handru, idah kameh, iy akohok ou ame hamon. 10 Tasah, ou badeh, atehei budon tam handru na ndrinem, ya eme Kindrei aloh ou mwasin mara-ei ta madan. Ma ou asehek sahou na bohom eme lewan, ma eme iy akohok ou ame hamon. 11 I le buku none buk ndrabun mene ndrasehek anya,
“Are lau atehei budon tan handru in tan kameh iy winiyan bani bwilima bwe.” Aisaya 28:16
12 Tasah, iri Juwis ma hawe iri lau badu leheleh badeh, ari ndrokowa iri aliy bwe. Laban turu ma lubuk badeh, Laban le ari, iy Laban tiri mari. Ma iy edeu nyosowan solo-an mwasin i tiri mari ala aloh nyaran i san ta asolom ma ndremenya iy ta seben. 13 I buku buk ndrabun ale ndrasehek anya,
“Lau amekes salom na nyara Laban ma ndremenya iy ta seben kameh, iy winiyan sebenei iri.” Jowel 2:32
14 Ya, buku none iri batehei budon tiri handru ba-en tan bwe, na saba san handru kameh iri aloh nyaran i san ta salom ma ndremenya iy ta seben? Ya, i buku none iri banuhun sahou ta nyalan bwena bwe, na saba san handru kameh iri atehei budon tiri handru in tan? Ya, i buku none iri lau batiye sahou mwasin bala tiri bwe, na saba san kameh iri anuhun? 15 Ya, i buku none ndramak basuni oro lau rayah bala len bwe, na saba san kameh oro lau nane atiye sahou doh? I buku ndratorowenei udu bolo buk ndrabun,
“Lau sekesek handru ta anyolom ma anuhun ndramak atiye sahou mwasin.” Aisaya 52:7
Iri lau solo-an badu Isra-el baseken sahou mwasin bwe
16 Arile, iri lau solo-an badu Isra-el baseken sahou mwasin bwe, oro rayah le. Aisaya amwenen asehek i buku doh,
“Laban, are lau handru atehei budon tan in ta sahou tam aso ndrasehek.” Aisaya 53:1
17 Eme ma, taha tanan, taha anuhun sahou ta Kindrei, ya sahou tan badeh, tiyani budon tataha handru asahan. Ma sahou asehek doh badeh, sahou ta nyala Krais.
18 Ya eme jo lelen i buku doh, iri ndranuhun sahou mene deh bwe? Ehe, iri ndranuhun oh! Buk ndrabun tiye,
“Sahou badu boho oro ndraseker bolo munyak mari,
ma sahou badu boho oro, lau badu len loboho heh, loboho heh ndranuhun kabwe.” Wari 19:4
19 Eme ya jo lelen ja, iri Isra-el kede-eh, ndratana iri deh bwe? Ehe, iri ndratanan oh! Ma mwena mene Moses tiye i buku doh,
“Jo kameh akohok iri lau laleyah, nyara iri bwe, ma kandriyen tek doh kameh mesekei mada aha alikis iri;
Jo kameh akohok iri lau tana iri lakou bwe, ma idoh kameh amekes ndrine aha irih.” Dutoronomi 32:21
20 Ano Aisaya mene tiye sahou nyarahan i buku doh,
“Iri lau ala basilah jo bwe, iri ame ndratakalahei jo;
Ya, iri lau ala balomondra ta akohok tanan ta nyalak bwe, jo kameh leheya jo aleu i mada oro.” Aisaya 65:1
21 Arile, Aisaya abudon iri Isra-el ma iy asehek iri badeh, i buku doh,
“Udu bolo len mari mari jo indrek iri, ta iri katehei budon tiri handru ki-in tek ma kanuhun sahou tek, arile batu iri boto-on; iri atehei le kona iri eme tek ma banuhun sahou tek bwai.” Aisaya 65:2