1 Hesi sionoho baeromo Festus-ro saꞌaho muebeꞌi rovadeje. Rueromo majae niöꞌi gemu barëjamu Caesarea amore jioromo Jerusalem ajiomadeje. 2 Ajiomamu Jew rajo priest masijohuꞌo Jew rajo a masijo ioroꞌiorohuꞌo ëho jaburo Paul-are jö sisëho huruoho majahijareje Festus-ro hejöro. Paul-are jö sisëho majahinugoromo Festus uavareje: 3 Jero huë baeromo ajamuiromo vaꞌo Paul nugöꞌöjego Jerusalem rojomoꞌirajo. Ëhi ua gavare hesi bëhoho urimëꞌi Paul öri ahore anoꞌi saginiëri atëꞌëro ëhuni uavareje: Nugöꞌöjego Jerusalem rojomoꞌirajo. 4 Rojomoꞌirajamu Festus-ro uëvadeje: O-ajo. Paul Caesarea amore savoji gagore jiëꞌëro rojomoꞌiröhoho bogo eni jiajëjo. Röhu na aviae vejöꞌe vejöꞌe Caesarea vuonoröꞌöꞌejöjo. 5 Ëhuni jemesi masijohuro Caesarea amoro naꞌo öꞌoromo Paul-are jö sisë rabe rabe jiëꞌoho court vaeromo majehijego na heꞌiröjo.

6 Ëhi uënugoromo Festus-ro Jerusalem hiromo majae göꞌo 8 o 10 rabuꞌe barëjamu Caesarea amore vuonoröꞌö abuejadeje. Abuejëꞌëro nërö court vaeromo Paul huꞌirae ruejöro uvadeje. 7 Paul huꞌirae rovamu Jew raje mamiꞌe Jerusalem jioromo ruvebijaroho jaburo Paul-are bëhire gagovo rovaꞌoromo sareriꞌe jö masijoho ahoꞌobëhe Festus majahiromo uavareje: Paul-ro ëhi jiëꞌe ëhi jiëꞌe mu sisëho vaejade höjo. Paul-are jö sisëho ëhi majahiromo röhu jö bëhi majahego mae uehorovoꞌiröhoho jabesi öriroho bogojiadeje. Bogojiëꞌe ma-nibejahareje. 8 Ma-nibejahamu Paul-ro Festus uavadeje: Na sisëho bogo vaejëꞌe jevajëjo. Jew rajo nosi jögoroho God-are osa börömoho Rome a börömehu no muebejavuajoho na jabesi jöho bogo ahoromo jabesi muoho bogo ijumëhëꞌe jevajëjo. 9 Ëhi majahijamu gavëꞌi Festus-ro Jew rajo ariböviohuro hu mae uehorovojöro nimamu Paul uavadeje: Na ja nagajëjo Jerusalem ajiomoromo ë amore nasi nunire namiromo jasi jö sisë jabuhu ataruoho mevoꞌiro. 10 Ëhi uavamu Paul-ro uavadeje: Bogajo. Na aviae Rome a börömo hesi court-re namijajëjo. Ëhuremu gemu iae maho höjo. Jaꞌo iae gavanuëjo Jew rajo aribövioho na bogo sisë vaejëvode höjo. 11 Na mu sisë vaejëꞌëro guomevoröhe bëhoho jioꞌibejajo na bogo nijioꞌiraejëvego jabesi anegego guomevoꞌibejajo. Aꞌi ë Jew rajo ariböviehu nasi jö sisë ëma barueromo nibejehiromo uavaruoho: Paul-ro ëhi ëꞌade hö uavaruoho aho Jew rajo jabesi övoroho bogo ëma bojëmiꞌarujëjo court vaejevoromo iꞌue bojemiꞌiröhego. Ëhuni na negajëjo Rome vaꞌoromo muebejavuaje a börömo hesi nunire namiꞌiro. 12 Ëhi uavamu Festus-ro hesi jö ajamiromo mevarue aribövi jabesi jöho heromo Paul uavadeje: Jero uevanuëjo: Na negajëjo Rome vaꞌoromo a börömo hesi nunire namiꞌiro. Ëhuni iae vaꞌoromo hesi nunire namiꞌaꞌanuëjo.

13 Ëhiꞌamu vaꞌo ririvanovamu evare a böröme Agrippaꞌo Berniceꞌo jaburo niöꞌiro Festus jejamiꞌi rovareje. 14 Rueromo majae bisemu ëge huꞌo arijareje. Arijamu Festus-ro Paul-are jöho Agrippa majahiromo uavadeje: Ae gemu aviae höjo mamiꞌe Felix-ro savoji gagore baꞌamoromo nugo vaꞌëꞌëro. 15 Na Jerusalem ajio hijodevare evare Jew rajo jabesi priest masijohuꞌo a duvaho ömoꞌömohuꞌo ëho jaburo hesi jö sisëho huruoho majehiromo uevare höjo naro hu iꞌue bojamiꞌirodego. 16 Ëhi uevamu uëvode höjo: Rome aribövioho no ëhi jiëꞌe muoho bogo vaejarue höjo. No bogo aho a jabesi övoroho ëma bojëmijarue höjo iꞌue bojëmiꞌiröhego. Aꞌi urimo iho sisëꞌe ahuꞌo hesi jö sisë majahuijarue ariböviohuꞌo gemuore jioꞌiramu jaburo hesi jö sisëho majahuiꞌiramu huro mana hesiroho majahuiꞌajëjo. Hujeji hesi jöe bejëꞌohuro ëhuro iꞌuoho bojamiꞌejarëjo. 17 Ëhi uëvode höjo. Röhu ë Jew rajo ariböviohuro Paul-are jö sisëho huruoho majehiꞌi ruvebijamu gëgorovo na bogo örisanuovoꞌi nëröho nasi aribövioho uëvode höjo: Paul huꞌirae ruehego court vaejöjo. 18 Ëhi uëvamu huꞌirae rovamu Jew rajo ariböviohuro riꞌöromo Paul-are jö sisëho majahuijare höjo. Majahuijamu naro uvode höjo: Nani jaburo Paul-hu mu sisë bëhe vaejade jöho majahuiꞌaruëjo. Röhu bogo ëhioho majahuijare höjo. 19 Aꞌi Jew rajehu jabesi beroharue jöhuremu Paulꞌo jö ahoꞌahamirovare höjo. Jö ahoꞌahamirovoromo jabesi sareriꞌe aruꞌaho hesi mu jöhuꞌo guomëꞌe a hesi ihe Iesu ë a hesi jöhuꞌo jö ahoꞌahamirovoromo Paul-ro uëvade höjo: Ëaho Iesu bogo guomëꞌe iae hijajëjo. Ëhi jiëꞌe jöhuremu court-re barovare höjo. 20 Ëhi barovamu hegorovo naro uvode höjo: Ëhi jiëꞌe jöho bogo avoho hejëꞌëro na bogo mevo varijënoho jevajëjo. Bogo mevo varijënoho jevajëromo ëhuni Paul uavode höjo: Na ja nagajëjo Jerusalem ajiomoromo Jew rajo jabesi nunire namijego jaburo ë jöho mevoꞌiröhego. 21 Ëhi uavamu Paul-ro uevade höjo: Na bogo ajiomoꞌejöjo. Na negajëjo jemëro na muebejevego hujeji na Rome amore vaꞌego muebejavuaje a börömohuro nasi jöho mevoꞌiröhego. Ëhi uevamu naro nasi muorovo aribövioho uëvode höjo: Paul avoho muebejego bogo roriꞌoho vaꞌirajo hujeji naro Paul nugöꞌöjego vaꞌo Rome rajo a börömo hesi nunire namiꞌiröhe höjo. 22 Festus-ro jöho ëhi majahijamu hegorovo Agrippa-ro uavadeje: Paul-ro jöho jövego naꞌo nasi hiaꞌëro heꞌi negajëjo. Heꞌi negajëjamu uavadeje: Jöho nëri jövoꞌiramu heꞌaꞌanuëjo.

23 Ëhi uavëꞌëro nërö Agrippaꞌo Berniceꞌo rovamu ae ahoꞌobëhe jaburo riꞌöromo jabesi ihoho döro bamoromo rajëhijareje. Rajëhijamu gavëꞌi jaburo niöꞌiro muorovo a masijohuꞌo amo rajo a masijohuꞌo gemu mae gagovarue osa börömore rueruomadeje. Rovamu gagorovo Festus-ro ae uëvamu Paul huꞌirae rovareje. 24 Huꞌirae rovamu Festus-ro jöe majëhiromo uëvadeje: Agrippa a börömohajo. O a ioroꞌiore ave gemuore gagovarijohumë ave aho Paul aviae namiꞌego gavarujëjo. Ëa hesi jö sisëho Jew raje ae ahoꞌobëhe ave raromaruohuꞌo Jerusalem raromaruohuꞌo ëho jaburo nasi örire majehijarue höjo. Majehiromo jöꞌe dadovoromo ma-darugoꞌo ueruomaje höjo: Ave saꞌare ëgoꞌo ma-hijëꞌoho bogo maehu höjo. 25 Jabuhu ëhi uevarue höjo röhu anego guomoröhe hesi bëhoho bogo birohëꞌe jevajëjo. Röhu Paul-ro hesi uevade höjo: Remöꞌöjego naro Rome vaꞌego ë a börömohuro nasi jöho mevoꞌirajo. Ëhi uevamu ëhuni uvode höjo: Naro Paul nugöꞌöꞌejöjo Rome a börömo hesirire vaꞌiröhego. 26 Iae na nugöꞌöꞌejöjo röhu Paul-are mu sisë jö jajivoromo a börömo hesi örire nugöꞌöꞌirodoho bogojevajëjo. Bogojevëꞌego ëhuni naro uëvode höjo Paul huꞌirae rovego huro ae ahoꞌobëhe jemesi nunire o Agrippa jasi nunire namijego noro hesi jöho heromo mevoromo bëhoho garomo eni jiego evare jöho jajivoromo nugöꞌöꞌirodëro. 27 Ëhesi bëhoho naro uvode höjo: Tövëꞌe a hesi jö sisë bogo jajivëꞌe ma-nugöꞌöjëꞌoho ëhi jiëꞌoho bogo maehu höjo.