1 Na Peter, Iesu Keriso ta apostero nanena ungo God na siriketo umbari embomeni ungota enda toto hari tumbuto pambuto enda Pontus ta enda Galatia ta Cappadocia ta Asia ta eto Bithynia ta mitovova avoeto ungo ta degi ahari erevi ere kaitona. 2 Eto ungo amo God Mamo na uje amita na siriketo umbuna eto ungo Iesu Keriso ta sasaga na kuteto javotoho ue ke amita avo agi ava Ahihi Otohu na ungota jo ta pure amita oi Otohu ereova. Eto God ta hondate ari te peka te isapamane ungota degi iroi.

3-4 Eto ungotenau Bada Iesu Keriso ta Mamo God avo osa aro amina jo ari amita na vasiri eha iketei God ta meniundi be ere ora amita be amo Iesu Keriso ambuto erena avoeto ungotenamote tapa vasiri eha umbera avoeto daroho iresora avo simba ereora eto donda javotoho ikasi ere ua amo amburari irae sapura ari irae eto irae ari mane donda avo God na ungota degi ikasi utu i ta simba ere ua. 5 Eto ungo God tumota ere ova avoeto sovera amita na ungo simba ere uma iji kombuta ungo naingeto oreketo umbasuja avo au kesova. 6 Avoeto ungona ari avo hotembitie tunga javotoho ere ova te eha oroho emina iji isapa memenga osaga kogue mitovova.

7 Eto ungo memenga osaga kogova amita be amo ungo God tumota be ere ovetemo ae re avo be kesi embo na ‘gold’ i bevere ta boreore eveketo tongopa irae eto javotoho euja aingeko amina memenga osaga na ungota degi etokiari ere ikitia. Rate God tumota eora ainge mane ra ‘gold’ amo irae aisuja te iji kombu te Iesu Keriso ikau puvurou ungo God tumota ari embomeni avo God na kogue otohu usasa te ke ijie ungo jakeka aisuja.

8 Eto Iesu amo ungo titi na kiae rate osa ueva eto eha amo mane kiova rate hotembitie ke be ijie tunga javotoho isapamane be ere ova, 9 amita be amo ungo iji kombu te umbasi tumota ere ova amo God na ungota Ahihi oreketo umbasuja. 10 Eto God na ungo oreketo umbasuja amita ke amo peroveta na hande ere uaetera te ke amita be amo deire avo mana mana ue jombure ngahia ere uaetera. 11 Eto Keriso na osaga te memenga te kito amita usasa ta torasuja amita ke avo Ahihi Otohu na enana ta siro ta harikenu ingito ari amo iji deina eto naingeto puvuresuja avo jombure ere uaetera. 12 Rate ke amo God ta peroveta avoeto ikae rate ungoembo ikari avo God na enana ta degi harikenu kito ke hande ere uaetera eto duru javotoho avo God ta ke hande ari embomeni na Ahihi Otohu utu i ta eto ikari puvurari amita sovera na ungota degi iketere ingeva, ke eremita be amo God ta anera te tapa na be kesi uje ere ora.

13 Avoeto hotembari neite neite tapa avo toto hotembari vahai avo be jigito God na Iesu Keriso iji kombu te ikau puvuto ungota hondate ari isapamane ikasuja avo jo tapa na hotembu hotembu ue irivujo. 14 Ungo God ta ke agi ari meniundi avoeto ungo kiae ue hamo ta ujeje isapamane ere uaeteva avo tovu. 15 Amita be amo ungo siriketo umbuna embo God amo otohu avoeto vasiri tapa otohu ue evujo 16 Amita ke ta amo einge kajari mitia “Na otohu avoeto otohu evujo” ke ainge God na ena. 17 Eto God na embo tapa amita ari sapura davore ari javotoho davore amo teka vahai amina sirikeuja eto ungo na God ta degi “Nau Mama” ke eova avoeto hari da ei mitie vasiri tapa avo be simba eto kogoeto irivujo. 18 Eto ungota ahihi ta ari sasapura avo oreketo ungo umbasi God na Iesu Keriso ta sasaga javotoho amina ungo ombuto umbuna, amo ‘gold’ te ‘silver’ te sapura euja aingeko amina ombae 19 rate Keriso ta sasaga javotoho amo God ta o sheep meni aingeko amina ungo ombuto umbuna.

20 Eto God na utu te enda te ae pekota amita Meni Iesu Keriso ikasi sirikena avo iji tutumo puvija emite ungoembo iketei puvuto ambunu 21 God na jiginu erenu amita degi sago kiari isapamane ikena avoeto ungo na God ke be ijie tumota ue ambota do puvuresuja avo simba ere ova. 22 Eto ungo God ta ke agi eova amina jo tongopa irae avoeto namei kamei osa ere ova te jo tapa na namei kamei osa peni vahai evujo.

23 Eto ungo vasiri eha umbari embomeni amo embo na be ikari amina vasiri eha umbae rate amo irae euja avoeto, vasiri eha umbeva amo God ta ke vasiri te daroho iriuja ai ta umbeva. 24 Amita ke amo God ta ke ta einge kajari mitia, “Embo bisi te amo sasaha ainge eto embo ta sago kiari amo sasaha ta koru ainge ra. Eto sasaha giroro au amita koru karaun eto beto irae aisuja rate 25 Bada ta ke avo daroho iresuja” ainge kajari mitia eto ke javotoho aravo amo ungota degi hande ikari ra.