1 Eto amita ambota Bada na embo tapa 72 ainge siriketo umbuto Iesu pambasuja degi ai ta embo heriso heriso ikenu da ari na ue kiti pambara 2 ke enu pambasi uo enana ta degi ke einge ena, “Be na pupusumbeto beto mitie sari ere ua rate ondeto umbari embo isapamane mane avoeto i be mamo ta degi penunu evujo pure embo nei ikau be ondare. 3 Ungo pambuvujo. Na ungo o ‘sheep’ meniundi avo isoro ino ta ikarako ere ona 4 Eto koro jurukari goru te eti savo te utu goru te mane umbuto pambasova, eto degi ta pahue embo ga ke ijie pekitie iji aijaja mane aisova 5 Eto embo ta bande ta toritie, ‘Peka ungota degi iroi’ ainge avo 6 pekari embo ai ta mitima kito no pekari avo amita degi iresuja te peka embo mane kito pekari avo no degi ta egerembasuja. 7 Eto bande ari na mane aisova rate bande vahai ai ta pere irivujo. Eto pure embo na mine umbasuja amo javotohora avoeto bande ai ta indari do ikasora amo ungota mine ra, indivujo. 8 Eto da nainge toravo ungo pekitie indari do ikasora tapa avo indito 9 embomeni avo konditie, ‘God na tohota embomeni siriketo umbuto titi jigesuja iji avo ungota degi puvuto ere hua,’ ainge evujo, 10 Rate ungo da nainge toravo pekae uroro kito amo da tambuta pambuto embomeni ta degi ke einge evu ingore 11 ‘Ungota da ta oniho nangota utu ta bitari avo torovikaro bovurou ungota degi hajire ikasuja. Rate kivujo God na embomeni titi jigesuja iji avo auvetija,’ ainge evujo. 12 Eto ungota degi erena, iji kombu te ari sirikari iji te embomeni amita degi God na hajire ngahia be ngahia na ikau da Sodom ta embomeni na osaga isapa kesora aingeko mane kesora.

13 Oio da Chorazin te da Bethsaida te ta embomeni ungota degi osaga pajire be puvuresuja. Eto ari sovera nei te nei te ungo keva avo da Tyre te Sidon te ta jo ta ari ainge aetena amo amita embomeni na ari sasapura matu toasi bo baike na kajari avo asuketo amisa na kutaetera rate ungo na ari sasapura toari uje aera 14 Rate God na ari siriketo hajire ikari iji te ungo na hajire ngahia be avo kesova da Tyre te da Sidon te ta embomeni na osaga kesora aingeko mane kesova. 15 Ungo Capernaum embomeni na God ta degi bitesi ere ova te God na au Satan iresuja degi ai beto pambasova. 16 Eto embo amuna ke no ingesuja amo ke nau ingesuja eto ke no toasuja ainge ke nau toasuja eto na toasuja. Ainge eto amina God na ikari embo amite tapa toasuja,” ke ainge enu irae enu

17 Embo tapa 72 amo pambuto pure tapa eo irae enu tunga javotoho te egerembeto puvutuhue ke einge ea, “Bada, ahihi sasapura amite ambure neite neite te tapa amina no javo ta ke ere agi etera,” ainge eo, 18 Iesu ingito ke einge ena, “Pipiri utu ta sariambu eto enda ta beuja ainge nombo Satan na vovuoi kogovona 19 Eto kivujo, na ungota degi sovera ikitana amo o juhiri hatiresova vuvusi hatiresova te memenga mane kesova eto ungotenau kitoho embo ta sovera amo sovera ungota nanena iketena amina nembarira. 20 Rate ahihi sasapura na ungota ke agi uroro ungo tunga javotoho mane aisova te ungota javo Utu i ta kajari mitia avoeto tunga javotoho evujo,” ke ainge enu

21 Iji amikote Ahihi Otohu na tunga javotoho ari ikenu God ta degi pari einge eto ena, “Mama God utu te enda te ta Bada, ari erevi tapa amo kiari hotembari embomeni ta degi ikae harikae rate kiari umbae embomeni ta degi iketea, Mama amo no uje na ere oa avoeto osa ere ona. 22 Eto nau Mama na kiari tapa sovera tapa nau ingeni ta iketo toarira eto Mamo na vahai Meni kiarira eto Meni na vahai Mamo kiarira eto Meni na embo siriketo umbuto au Mamo kesora,” ke ainge eto 23 ahereketo ambotani ta pere ke einge ena, “Ungo titi na ere kogova ari avo embo amuna kesuja amina tunga javotoho aisuja 24 ungota degi erena peroveta isapamane eto enda ta ‘king’ isapamane na ungo ari do ere kogova avo kesi uje isapamane ere uaetera te kiae eto ungo ere ingihova avo ingesi uje ere uaetera te ingae,” ainge enu

25 Ke pepeni kiari embo vahai na ereto heteto Iesu eto kesi ue ke einge ena, “Ate poekari Embo, na ari do ue irari daroho hoteto umbano avo ejo ingone,” ainge enu 26 Iesu na ke mine einge ena, “God ta ke do ke pepeni ta kajari mitia avo umo eteketo kogoe?” ainge enu 27 Embo amina ke einge ena, “God ta ke pepeni amo umo no Bada God avo no jo tapa na ahihi tapa na sovera tapa na eto hotembari tapa na osa ue no hamo simba ue osa eoa ainge nombo no namei kamei tapa osa ejo,” ke ainge enu, 28 Iesu na einge ena, “Umo ke be erea. Umo ari ainge avo ue irari daroho ta iresoa,” ainge enu 29 embo amina amita hamo orekitie Iesu ta degi ke einge eto ingina, “Aravora te nau namei kamei amo amunure?” ainge enu, 30 Iesu na ke mine timu hatirari ke na einge ena, “Judea embo vahai amo Jerusalem eto da Jericho degi ta pahunu pegene embopo na puvuto embo avo teo beto degi ta ahunu amita donda tapa oreto umbuto embo amo toto pambua 31 Eto pahuo Judea ta priest vahai na degi ta puvutuhumite embo avo kito degi ovitiho ta embuto seniketo pahunu 32 Judea ta clan javo Levi embo vahai degi ta puvuto embo avo kito tiumbeto pahunu, 33 (Samaria embomeni amo Judea ta kitoho ra.) enda Samaria embo vahai amo puvutuhumite embo tea avo kito jo enu 34 ‘oil’ te ‘wine’ te amina sasaga egeto bo na sorereketo tigito ohimbeto umbuto amita o ‘donkey’ hamo ta ikenu arumbenu umbuto pambuto isa pambuora embo ta evari bande ta toreto embo simba ue evunu 35 iho bujenu Samaria embo na koro heriso umbuto bande mamo ta ikitie ke einge ena, ‘Embo erevi simba ururo no bande ta mine doinge aisuja amo nane egerembeto puvuto no mine ikasona,’ ainge eto pambuna,” ke ainge Iesu na enu irae enu 36 ke pepeni kiari embo ta degi ke einge eto ingina, “Embo pegene embo na tea amita namei be amo amuna enu,” ainge enu 37 embo na, “Jo ari embo amo amita namei be ra,” ainge enu Iesu na, “Ari ainge nombo eto pambuto ejo,” ainge ena.

38 Eto Iesu te amita ambotani te aingeto degi ta pahumite da vahai ai puvuto toreo pamone javo Martha amina amita bande ta indora oru enu toreo 39 amita jao Mary na Iesu ta utu ta arumbeto amita ate poekari ke ingihe mitinu 40 Martha na embomeni unduresi donda agari jivari eonga ere umite osaga kito Iesu ta degi pambuto ke einge ena, “Bada, na eonga agari jivari ngahia ere ona avoeto umo jo ari embo kito ejo nau jao hoeto hondate ai,” ainge enu 41 Iesu na ke mine einge ena, “Martha, Martha, no osaga na no oti pe ere vivitia rate 42 Mary ere ua vahai ainge aetea amina no osaga irae aetija te Mary na javotoho ere ue avo embo na mane taekasuja.”