1 Eto donda tapa amita hamo ta amo embo osa ari avo aisi uje ue Ahihi Otohu ta sovera ari neite neite hande ikaguja avo humbasi uje evujo. Eto dombo be amo sovera ari humbuto God ta ke na embomeni oje kahasi uje evujo. 2 Eto ivivi ta ke hajire Ahihi Otohu na embo ta degi hande ikaguja avo embo na humbuto ke aisuja te ke ainge amo embo ta degi ae rate God ta degi aisuja, amita be amo embo amuna ingae rate God na vahai ingaguja. Eto ke ainge amo Ahihi Otohu ta sovera na ahihi ta ke ojikari avo eagora. 3 Rate embo na God ta ke na embo oje kahasuja amo embo na arahata ingito sovera ari humbuto tunga javotoho ue iresuja. 4 Eto embo na Ahihi Otohu ta hondate ari na ivivi nei na ke eaguja amo umo oenga sovera ari humbaguja, eto oje kahasuja embo amina ekalesia tapa ta degi sovera ari ikaguja. 5 Eto ungo tapa ivivi ta ke hajire nei Ahihi Otohu ta degi umbava uje ere ona te dombo be amo embo oje kahevujo. Eto ivivi nei na asoa amo isapa rate oje kahari ke asoa amo peni be avoeto ke ai ta amo ekalesia na sovera humbari haitera. Eto ivivi nei na ke aisuja embo amina ke avo jandireketo au embomeni ingito sovera ari humbasora. 6 Eto nau namei kamei ungo ke erevi be hotembevujo. Eto na Ahihi Otohu ta degi ivivi ta ke nei humbari embo avoeto ungota degi pambuto kiari eha ae ingae eto ahe poekae eto oje kahae avoeto ivivi ta ke nei na asona amo ungo ke be mane ingesova avoeto ungota degi ari javotoho mane puvuresuja. 7 Amo erevira, eto embo na isepuri kambuhe tunga neite neite eagora te tunga vahai kambasora amo ingari sapurara. 8 Eto embona huin javotoho husae aisuja amo embona ingito isoro arote toaro avoeto mana mana aisora. 9 Eto ainge dombo ungota ke embo tapa na ingari haiteko mane avo aisova amo pisara ainge embo ta ku ta pambasuja. 10 Eto enda embomeni ta ke neite neite mihia amo enana tapa amita ke amo be ambu iraera 11 eto na enda nei amita ke ingae aisona amita be amo na enda nei amo enda nei avoeto 12 eto aingeko amo ungo na ere ovova avoeto ungo Ahihi Otohu ta degi sovera ari hande eto humbasi eto kito ari deina ekalesia embomeni tapa hondate aisuja avo uje eto umbuvujo.

13 Eto ari erena avoembo ivivi nei na ke aisuja embo amina ke avo jandireketo au ingora kiari humbasi pari aisuja. 14 Eto na pari ijie ivivi ta ke hajire nei na eagona amo nau ahihi na pari eaguja te hotembari nau amo be ambu eto iraguja. 15 Avoeto na do ano? Javotoho amo na ahihi na pari ue hotembari te tapa na pari aisona. Eto haveni aisona amo Ahihi na pere ae rate hotembari te tapa na aisona. 16 Eto nei amo ungo Ahihi na God jakeka ijirovo embo nei ungota ari kiae embo amina puvuto ungota osa ari avo ingito ari avo mahu kiae avoeto ke be mane aisuja. 17 Eto ke be amo ungo na God osa ue ereva te embo nei na ingito javotoho mane kesuja. 18 Eto Ahihi Otohu na nau degi ta ivivi ta ke hande ikena amo ungo na aheva aingeko mane, kaiketo jigama eagona avoeto God osa ere ona te 19 na ekalesia embomeni ta degi ke ivivi nei na ke isapamane aisona amo enana na mane ingito kogo aisora te ke heriso avo ke be na pere aisona amo ingari javotoho puvuresuja.

20 Eto nau namei kamei, ungo meni isasaraho ta hotembari avo avojo te ari jajavotoho na embo ta ari evujo. Rate meni isasaraho ta ari nei javotoho eagora ainge avo humbaeheva amo enana na ari sasapura isapamane kiagora. 21 Eto God ta ke mahu kajari aita amo einge mihia, “Eto na enda nei embomeni ta ke avo ivivi hajire nei na nau enda embomeni emita degi ke hande aisona amo ingito ingarako aisora, ke ainge Bada God na eria,” ke ainge kajari mihia. 22 Avoeto ungo kogova amo ivivi hajire ingari nei amo God na God ke be ari embopo avoembo ikae rate God ke be ae embopo avo be kiagora ikena te oje kahari ke be amo God ke be ari embopo na sovera ari umbara ikena 23 avoeto ari avo kiae embopo eto God ke be ae embopo amina ungo vahaita horukagova degi ai ta horeto ungo tapa ivivi hajire neite neite na ke ijirovo ingito ungo kava ue ereva ke ainge aisuja 24 te ungona ke be na oje kahihe mihirovo amo embo amina ungota ke ingihe ari amita amo do aingekore avo eto God ta embomeni ta ke ingito 25 amita hotembari jo ta ojikari avo be ingito me kogue veto gombuto God jakeka ijie God amo ungota degi mihia ke ainge aisuja.

26 Avoeto nau namei kamei, ungote ke tutumota mo do aro? Eto ungo vahaita horuketo amo ke deina embo tapa hondate eto avo ingoro avo ungo ke siriketo nununga evujo eto haveni rete ahe poekari ke rete oje kahari ke God na ikari humbari rete ivivi nei na ke hande eto ehako jandireketo ari ingari amite avo tapa nununga evujo. 27 Eto embo isapamane na ivivi ta ke amo mane aisora te embo heriso nei vahai amina ereto eue arumbihiroro ke jandirekari embo na ereto aro ingesora. 28 Eto ke amita jandirekari embo irae kito amo embo tapa ta degi ke amo mane aisuja te God ta degi aisuja. 29 Eto oje kahasora embopo tapa nei heriso rete nei heriso nei vahai ainge amina ke hande eue arumbihiroro embomeni na ingito kogo ara erena. 30 Eto ke hande ururou embo vahai amo arumbeto mihie ke ingihirou God ta degi hotembari amita degi puvurou ingihirou embo heteto ke eria avo toto arumbau embo amina ereto ke au ingesora. 31 Amita be amo oje kahari embopo tapa rate embo vahai vahai na ke hande ururoro embo tapa na ke eha avo ingihe sovera ari humbasora. 32 Eto oje kahari embo na ke sio mane eaguja te ahihi amita avo simba ue ke eaguja 33 eto God amo ke sio sao ijie o a ari ta God mane rate peka ta eto ari inono ta ari amita God ra. Eto God ta ekalesia embo ototohu amita horukari aita 34 amo evohu na ke mane aisora te jamopo eto iresora. Eto evohu ta ke ari aravora ae avoeto God ta ke kajari ta amo enana na do ara kajari mihia avo ara erena 35 eto enana ta eto ingari ke puvurou kito amo ungota bande ai ta ipone na ke be amo harikaro kesora. Eto erena amo ekalesia horuketo mihiroro evohu na ereto ke aisora amo aravora ae ra.

36 Eto God ta ke amo ungo Corinth embomeni ta degi ta eto puvurari ke mane hotembasova eto nei God ta ke amo ungo oenga umbae 37 avoeto embo amuna na God ta hande humbari embo avoeto oje kahari embora ainge aisuja embo amina ke ere kajihena amo God na ungo ambo ambo ava ikihoi ere kajihena avo eto kesuja 38 avoeto ke erevi ke be ae aisuja embo ta ke avo ingovojo. 39 Avoeto nau namei kamei, sovera ari God ta degi hande eto humbuto embo oje kahasi uje evujo rate embomeni na ivivi ta ke hajire nei Ahihi Otohu ta degi hande eto humbagora avo mane haekasova te 40 ari tapa amo inono ta evujo.