1 Eto embomeni amuna Iesu avo Keriso ungotenau orekari embo be hotembasora amo God ta meniundi be asora, eto Mamo osa asuja amo meniundi te tapa osa asuja. 2 Eto ungotena God ta meniundi osa ere oretemo aere amita etokiari amo erevira: amo embo amuna God osa ue amita ke agi aisuja embo amina meniundi te tapa osa aisuja. 3-4 Eto God osa ue amita ke agi ahera te ungotena God ta meniundi avoeto sovera umbera amina enda ta ari dembehera avoeto God ta ke agi aisora amo ngahia mane aisuja, eto ungotena God humota eagora amina enda ta ari sovera eto dembagora. 5 Avoeto erena amo enda ta ari sovera eto dembagora embo amo amunure? Amo Iesu avo God ta Meni be ke asuja amina dembasuja.

6 eto Iesu amo God ta Meni be ra amo ari deina harikau kioro? Amo umo na bapataito unu God na Meni nau be ra ainge ijinu ingia eto nei amo teo orosa vena ai ta ere kogora avoeto Iesu God ta Meni be ere kogora amo umo ta eto orosa ta kogora. 7 Eto avo pere mane rate Ahihi Otohu na harikeoi ingiora eto Ahihi Otohu amo ke be perekari eaguja avoeto harikeoi ingiora 8 amo donda tapa heriso nei vahai amo umo te orosa te Ahihi Otohu te amina harikeora. 9 Eto embo na kito harikeore ingiora amo peni mane rate God na kito harikasuja amo pajire be ra eto harikari amita be amo hajire heriso nei vahai ehena aravora 10 eto embo amuna God ta Meni ke be aisuja amo hajire heriso nei vahai erena amina amita jo ta iresuja rate God na amita Meni Iesu ere harikihia avo humota ae ue ke be ae aisuja amo God ta ke sokova ke eria aravora. 11 Eto God na ungotenau degi ta ke hande ena amo erevira amo vasiri te daroho irari embo ta degi hande ikaguja amo Meni ta degi ta eto humbagora 12 avoeto God ta Meni humbasuja amita degi vasiri iresuja rate umbae amo vasiri iraera.

13 eto ke erevi ungota degi ere kajihena amo ungo God ta Meni ke be ereva avoeto vasiri te daroho iresova avoeto be kiagova ere kajihena. 14 Eto ungotena kiarira amo God na do hotembihia avo kogue penunu aisora amo ingito ikau kesora 15 avoeto ungotenau pari God na ere ingihia avo ke be erera avoeto pari ta mine mahu ere ikihia avo ke be aisora. 16 Eto embo na namei amo ari sapura ta pambasuja amo amita Ahihi amo God na tau pehasuja avo kito namei avoembo pari ijirou God na vasiri ikasuja, rate ari sapura nei ururou God na kito embo ta Ahihi tau peheto iresuja avoembo pari avojo, 17 eto ke be amo ari sasapura neite neite tapa amo javotoho mane rate ari sapura nei nei amina embo ta Ahihi tari pehari haite manera. 18 Aravora ungotena ere kogora amo God ta Meni Iesu Keriso amina God ta meni undi oreketo simba ururou Ari sasapura embo Satan na hame ari inono ae ra avoeto God ta meniundi na ari sapura mane mahainge ue iresora te toasora. 19 Eto ke nei ere kogora amo enda eto enda ta ari tapa amo Satan ta sovera na andirari rate ungotena God ta tohora. 20 Eto ke nei ere kogora amo ungotena God be avo kiagora God ta Meni be amina puvuto sovera ari ikena eto ungotena God be eto amita Meni Iesu Keriso ta jo ta mihera, amo God be eto vasiri daroho irari ta susura. 21 Nau meniundi ungo God sokova sakova neite neite avo eto kogoeto kivujo, aravora.