1 Na Peter, Iesu Keriso ta apostero nanena ungo God na siriketo humbari embomeni ungota enda toto hari tumbuto pambuto enda Pontus ta enda Galatia ta Cappadocia ta Asia ta eto Bithynia ta mihovova avoeto ungo ta degi ahari erevi ere kajihena. 2 Eto ungo amo God Mamo na uje amita na siriketo umbuna eto ungo Iesu Keriso ta orosa na kuheto javotoho ue ke amita avo agi ava Ahihi Otohu na ungota jo ta pure amita oi Otohu ereova. Eto God ta hondate ari te peka te isapamane ungota degi iroi.

3-4 Eto ungotenau Bada Iesu Keriso ta Mamo God avo osa aro amina jo ari amita na vasiri eha ikehei God ta meniundi be ere ora amita be amo Iesu Keriso peheto erena avoeto ungotenamote tapa vasiri eha umbera avoeto daroho iresora avo simba ereora eto donda javotoho ikasi ere ua amo pehari irae sapura ari irae eto irae ari mane donda avo God na ungota degi ikasi uhu i ta simba ere ua. 5 Eto ungo God humota ere ova avoeto sovera amita na ungo simba ere uma iji kombuta ungo daingeto oreketo humbasuja avo au kesova. 6 Avoeto ungona ari avo hotembihe tunga javotoho ere ova te eha oroho emina iji isapa memenga osaga kogue mihovova.

7 Eto ungo memenga osaga kogova amita be amo ungo God humota be ere ovetemo ae re avo be kesi embo na ‘Gold’ ji vevere ta ingagore eveketo tongopa irae eto javotoho eaguja aingeko amina memenga osaga na ungota degi etokiari ere ikihia. Rate God humota eagora ainge mane ra ‘Gold’ amo irae aisuja te iji kombu te Iesu Keriso ikau puvurou ungo God humota ari embomeni avo God na kogue otohu usasa te ke ijie ungo jakeka aisuja.

8 Eto Iesu amo ungo tihi na kiae rate osa ueva eto eha amo mane kiagova rate hotembihe ke be ijie tunga javotoho isapamane be ere ova, 9 amita be amo ungo iji kombu te humbasi humota ere ova amo God na ungota Ahihi oreketo humbasuja. 10 Eto God na ungo oreketo humbasuja amita ke amo peroveta na hande ere uahera te ke amita be amo deire avo mana mana ue jombure ngahia ere uahera. 11 Eto Keriso na osaga te memenga te kito amita usasa ta horasuja amita ke avo Ahihi Otohu na enana ta siro ta harikenu ingito ari amo iji deina eto daingeto puvuresuja avo jombure ere uahera. 12 Rate ke amo God ta peroveta avoeto ikae rate ungoembo ikari avo God na enana ta degi harikenu kito ke hande ere uahera eto duru javotoho avo God ta ke hande ari embomeni na Ahihi Otohu uhu i ta eto ikari puvurari amita sovera na ungota degi ikehere ingeva, ke eremita be amo God ta Anera te tapa na be kesi uje ere ora.

13 Avoeto hotembari neite neite tapa avo toto hotembari vahai avo be jigito God na Iesu Keriso iji kombu te ikau puvuto ungota hondate ari isapamane ikasuja avo jo tapa na hotembu hotembu ue irivujo. 14 Ungo God ta ke agi ari meniundi avoeto ungo kiae ue hamo ta ujeje isapamane ere uaeheva avo tovu. 15 Amita be amo ungo siriketo umbuna embo God amo otohu avoeto vasiri tapa otohu ue evujo 16 amita ke ta amo einge kajari mihia “Na otohu avoeto otohu evujo” ke ainge God na ena. 17 Eto God na embo tapa amita ari sapura davore ari javotoho davore amo heka vahai amina sirikaguja eto ungo na God ta degi “Nau Mama” ke eagova avoeto hari da ei mihie vasiri tapa avo be simba eto kogoeto irivujo. 18 Eto ungota ahihi ta ari sasapura avo oreketo ungo humbasi God na Iesu Keriso ta orosa javotoho amina ungo ombuto umbuna, amo ‘Gold’ te ‘Silver’ te sapura eaguja aingeko amina ombae 19 rate Keriso ta orosa javotoho amo God ta o sheep Meni aingeko amina ungo ombuto umbuna.

20 Eto God na uhu te enda te ae pekota amita Meni Iesu Keriso ikasi sirikena avo iji tutumo puvija emite ungoembo ikehei puvuto pehenu 21 God na jiginu erenu amita degi sago kiari isapamane ikena avoeto ungo na God ke be ijie humota ue ambota do puvuresuja avo simba ere ova. 22 Eto ungo God ta ke agi eagova amina jo tongopa irae avoeto namei kamei osa ere ova te jo tapa na namei kamei osa peni vahai evujo.

23 Eto ungo vasiri eha humbari embomeni amo embo na be ikari amina vasiri eha umbae rate amo irae eaguja avoeto, vasiri eha umbeva amo God ta ke vasiri te daroho iraguja ai ta umbeva. 24 Amita ke amo God ta ke ta einge kajari mihia, “Embo visi te amo sasaha ainge eto embo ta sago kiari amo sasaha ta koru ainge ra. Eto sasaha giroro au amita koru karaun eto veto irae aisuja rate 25 Bada ta ke avo daroho iresuja” ainge kajari mihia eto ke javotoho aravo amo ungota degi hande ikari ra.