1 Eto God na amita jo ari na Keriso ta ke hande ara pure ikena avoeto jo segigi ae pure sovera eto eagora. 2 Eto enana ke sokova ahe poekari embomeni ainge mane dago God ta ke ojikari na hande mane eagora te God ta ke popoja na ae rate araha ta God ta tihi ta hande uore hotembari embopo na ingito ke be eagora. 3 Eto God ta ke amo embo tapa ta degi ojikae rate enana Ahihi pehari degi ta ere pahora amita degi amo ojikarira 4 amita be amo God ke be ae embomeni na Keriso amo God ta ari eto hajire vahai amita ke javotoho usasa te avo mane kiagora enda emita tihi jigari embo sapura na enana ta tihi ta kajehei kuru ehija. 5 Eto ke hande ere ora amo ke dagota mane rate Iesu Keriso amo ungotenau Bada eto tihi jigari embo eto dago amo Iesu avoembo ungota undurari embopo ra amita ke avo hande ere ora. 6 Eto iji ihikarita God na mume ta degi “Usasa e” ijinu usasa ena eto God na vahai dagota uha avo usasa amita na hirikenu kia amo God ta usasa Keriso ta tombu ta gain ena avo kia.

7 Eto ari javotoho be usasa te God na ikena amo ungotenau sari ari hamo ta mihia avoeto ungotena ere kogora amo usasa javotoho emo dago na ae puvurae rate God na hande ikehija. 8 Eto degi tapa ta kitoho mihia amina dago dembari inono ae eto osaga isapamane ere kogora te toae. 9 Eto embomeni na teore memenga kiagora te God na dago toto pambae eto teore enda ta veagora te dago pehae. 10 Eto degi dainge pambagora amo dago ta sari ari hamo na Iesu ta osaga te memenga te amina ahe kihira ere ora, amo dagota hamo avo embomeni na kogue Iesu ta vasiri avo hotembagora. 11 Eto ke be amo dago pehae mihie Iesu ta pure ere ora avoeto dagota pehari amo iji mahainge puvutuhoi hotembagora, eto dagota vasiri aita amo embomeni na Iesu ta vasiri kiagora. 12 Eto ke erena amo dago pehasi era pahora te ungona dagota pure avoembo vasiri te daroho iresova.

13 Eto God ta ke ta amo ke einge kajari mihia “Na ke be erena avoeto ke hande ere ona” ke ainge mihia avoeto amita ari vahai amo dago na eagora avoeto ke be ijie God ta ke amo embo ta degi hande ere ora. 14 Eto dago kogora amo Iesu jiginu vasiri te erena embo God na iji inono ta dago Iesu ga tapa jigou vasiri te erihiroro ungote tapa humbuto Iesu ta engihita ikau hetasora. 15 Eto ungo kogova amo osaga memenga ere kogora amo ungo avoembo ere kogora amo aita God ta hondate ari isapamane na embo ta degi pahurou embo isapamane na God osa ue jakeka ijiroro usasa God ta degi pambasuja.

16 Eto ari ainge avo dago joru ue pure mane toasora. Eto dagota hamo amo sari asi ere pahua te jo ta amo iji vahai vahai ainge God ta degi sovera mine ere humbuhora. 17 Eto dago enda eita mihie osaga isapa ere kogora amo usasa pajire be daroho ta kesora ainge mane isapa be ra 18 avoeto dago na enda ta sari ari donda tihi na kiari haite amo kon eto kiae rate tihi na kiae donda daroho iraguja avo kon eto kogue eheheto ere pahora.