1 Eto mahu ea ainge dombo Paul te Barnabas te na da Iconium ta Judea embomeni ta giu ari bande ta horeto ke hande eo Judea embomeni te enda nei embomeni te aingeto ke avo ingito ke be hotembeto ambo ambo ea. 2 Rate Judea embo nei nei na ke avo uje ae eto da nei embo ta jo kajeo ereto ambotani ta degi tumo ea. 3 Eto ambotani ai iji koso mihie Bada ta ke ngahia na hande ea eto God na amita Meni na embo orekasuja amita ke amo God ta degi ta eto puvurari avo kiora ambotani ta degi God na sovera ikenu ari neite neite eo kia. 4 Eto da embomeni amo kaheketo Judea embomeni tunga umbua eto nei kaheketo ambotani tunga umbua 5 avo eto enda nei embomeni te Judea embomeni te enana ta tihi jigari embo te na ambotani ta degi tumo eto koro na taro pehaja ari ke eo 6 ingito Paul te Barnabas te na da javo Lystra te Derbe te amita enda Lycaonia ta pambuto 7 God ta ke hande ea.

8 Eto da Lystra ta embo amo e ta hini ta eto popora ari vena avo eto isa ari kiae herekari pere 9 ovohina mihie Paul na embomeni ta degi ke ijinu ingina. Eto Paul na embo avo God ke be ari embo avoeto kojari inono kito embo avo kon eto kito 10 gagaha eto ke einge ena, “Umo ereto utu na hete,” ainge enu ereto joro ue isa ena. 11 Eto embomeni na Paul na do ena avo da Lycaonia ta ke na einge ea, “Ahihi na embo ta hamo asuketo uhu ta eto irerembeto puvera,” ke ainge 12 eto Barnabas amo javo Zeus ikea eto Paul amo ke ari embo avo eto javo Hermes ikea. (Eto Lycaonia embomeni ta God ingeni na ari amo javo Zeus te Hermes te avo ikea. Eto Hermes amo ke ari embo avo ea.) 13 eto ahihi javo Zeus ta priest okose na Zeus ta pene ikari bande da engihi ai ta o cow siaja heriso te ji vuji te aingeto humbuto da pe ta puvuto hetena, amita be amo amite amita embomeni tapa na ambotani heriso jakeka ue pene ikasi o teto puvua. 14 Eto Paul te Barnabas te duru avo ingito enana ta bo jigito oseseketo embo ta ugoro ta gagaha ijie pambuto ke einge ea, 15 “Embo tapa ungo do ere ove, dago ungo ainge dombo embora, eto dago puvera amita be amo God ta ke javotoho ungota degi ta aro donda ari sasapura erevi toto vasiri te God ta degi puvuresova eto uhu te eva te enda ta donda tapa emo God na ari ra. 16 Eto iji mahu embomeni na enana ta uje na degi oenga oenga ere pambuhahera avo God na haekae 17 rate God ke be te mihia eto embomeni na kiora hande jajavotoho ikerekeuja amo erevira, uhu ta ga iji inono ta veaguja eto donda ve eraguja eto embomeni na humbuto indito tunga javotoho eagora.” 18 ke ainge eo embomeni na pene ikasi ea amo toari uje ae rate toa. 19 Eto Judea embomeni da Antioch ta eto da Iconium ta eto puvuto embomeni ta degi ke eo jo haperekenu koro na humbuto Paul teo pehena avo be pehari ke eto jigito goruketo humbuto pambuto da sahu ta ikea. 20 Rate ambotani nei nei na joeketo mihio ereto da asa ai evito Barnabas ga da Derbe ta pambuna.

21 Eto Paul te Barnabas te na God ta ke javotoho da Derbe ta hande eo ingito embomeni isapamane ke be ingito ambotani ea. Eto egerembeto da Lystra eto da Iconium eto da Antioch, Pisidia ta pahue 22 ambotani ehaha ta sovera ari iketo enana Iesu ta ke be humota ara ke einge ea, “Ungotena osaga neite neite kogue mihima God ta degi hotari humbuto amita tombu ta iresora eto amina ungotenau King asuja.” ainge ijie ahe ere poekihahera. 23 Eto Paul te Barnabas te na ekalesia vahai vahai ta tihi jigari embo humbuto ikerekea. Eto God ta degi pari ue indari ajireketo Iesu ta ke be ari embomeni humbuto Bada na simba aja amita ingeni ta iketo toa. 24 Eto enda Pisidia toto enda Pamphilia ta pambuto 25 da Perga ai God ta ke hande eto 26 da Attalia ta pambuto e nga humbuto da Antioch enda Syria ai ta pambua. 27 Amo ai da Antioch ekalesia embomeni na Paul te Barnabas te God ta pure javotoho ara pari eto God ta ingeni ta iketo toto enda nei ta pambua avoeto enana Antioch ta ehako puvuto ekalesia embomeni jage eo vahai ta puvuo God na tapa do ena eto enda nei embomeni na God ta ke javotoho ingito ke be ijio God na embomeni avo amita toho be umbuna avo hihi tirio ingia. 28 Eto ai ambotani nei ga iji koso be mihahera.