1 Eto jua 14 irae ena emita ambota na Barnabas ga da Jerusalem pambasi ue embo Titus humbuto amiga pambua. 2 Eto ai ta pambuhena amo nau uje na pambae rate God ta uje ta pambuto ekalesia ta embo okokose aita mihera amita degi Iesu ta duru javotoho do do enda nei embomeni ta degi hande eagona avo ehene ingihera amo aravora arote avo eto ehene enana embo okokose pere na 3 ingito jo vahai eto aravora ijiera. Eto nei amo embo Titus amo Judea embo mane enda nei Greek embora te Iesu humota eaguja te hamo kakamba ae avo enana kito Judea ta ari avo hamo kakamba eto ekalesia ta horaja ke ae teho umbua. 4 Eto hamo kakamba ari ta ke amo mane ahera te enana ekalesia be mane amina popoja puvuto dago Iesu Keriso ta jo ta iragora avo ke mahu hamo kakamba ari ta ke amina ehako andiroja puvua 5 te enana ke amo dagota ke ahurekari inono ae ehei Keriso ta ke ungota degi hande ehere humbuheva ainge inono ta mihia. 6 Eto God ta tihi ta embo tapa inono rate embomeni na enana Jerusalem ta mihera amo ekalesia ta tihi jigari ke eagora te nau degi ta amo tehora, amina Iesu ta ke hande eagona amita hamota ke nei do ikae rate ke eagona avo perera. 7 Eto Peter na Iesu ta duru javotoho avo Judea embomeni ta degi hande aja God na humbuto ikena ainge dombo nanena enda nei embomeni ta degi hande ana umbuna avo enana ekalesia ta okokose amina kito ke be hotembea 8 amo erevira. Eto Peter na Judea embomeni ta degi ke hande ue pure uija aita God ta ingeni hajire koguera ainge dombo nanena enda nei embomeni ga pure uena aita God ta ingeni hajire koguera 9 avoeto James te John te Peter te amo ekalesia ta tutuvi be ari ke eagora amina namote Barnabas te na God ta hondate ari na enana ga pure vahai eagora avo kito ingeni humbuhe ke einge ea, namote Barnabas te avo enda nei embomeni ta degi pahuroro enana avo Judea embomeni ta degi pambasi ke ea. 10 Eto ke nei vahai amo hoivo embopo avo hondate ara ehera avo na jo tapa na asi uje ere ona.

11 Eto Peter da Antioch ta pambuto mihie ari vahai erevi ena avo sapura kito amita degi harikihena 12 amo Peter kihi ta amo enda nei embomeni ga vahaita arumbeto ere indiahija amo javotoho ere uahija te Judea embo nei uhoho James ta degi eto puvua, amo enda nei embopo ekalesia ta ehaha horagora avo Judea ta ari ambo ambo eto hamo kakamba ara ke hande eagora embopo puvua embomeni amina ke arote avo Peter na hotembeto joru ue ari sapura ihiketo ena amo enda nei embomeni ga vahaita indari uje ae eto toruhunu 13 Judea embopo nei uhoho da Antioch ta ekalesia eto mihahera amina Peter enda nei embo ga vahaita indae uija avo kito ainge inono ta hotembari vahai avo uera. Eto sapura ainge uo Barnabas na enana ta ari sokova avo kito ai ta kaju unu 14 na aita pambuto enana ta ari avo kia amo duru javotoho embota degi hande eagora aita irae avoeto ari sapura avoeto ekalesia ta tombu ta Peter ta degi ke einge ijiena, “Umo Judea embo rate enda nei embo ke kiae amina irarako ue enda nei embo na Judea ta ari humbuto irora ahe ere poekihea amo ari sapura be ere kogona.”

15 Eto ungotena aja ta hini ta eto puvurari amo Judea embopora te enda nei ari sasapura embopo ainge manera 16 te ungotena eha ere kogora amo embo God ta ke pepeni agi asora amina mane embo javotoho ke aisuja. Avoeto ungotena God ta tihi ta embo jajavotoho aisi ue God ta ke pepeni neite neite avo hotembae ue Iesu Keriso vahai avo humota ue mihera, eto ke be amo embo tapa na ke pepeni simba eagora amina embo javotoho mane aisora. 17 Eto ungotena God ta ke pepeni agi ari amina embo jajavotoho ae rate Iesu Keriso humota ari vahai amina God ta tihi ta embo javotoho eagora avoeto Keriso humota ari aita ere kogora amo embo tapa na ari javotoho amina embo javotoho ae rate embo tapa aemana embo sasapura pere rate Keriso amo ari sapura ta kihi humbari embo manera. 18 Eto ke pepeni neite neite agi ere uaehena amo embo javotoho anote ijie agi ere uaehena avo mahu toruhena te ehako simba asona amina na pehumba au ari sapura embo aisona. 19 Eto ke be amo na God ta degi vasiri eha humbuto iresi God ta ke pepeni Moses ta degi ikena avo toruhena amo ai ta amo ari sasapura nau do aingere avo koguena. 20 Eto na Keriso ga tapa ji atahu ta teo pehea avoeto vasiri sapura nau irae rate Keriso ta vasiri avo jo nau ta vasiri mihia amo God ta Meni na namo avoembo osa ue hamo amita ikena avo humota one vasiri amita amo hamo nau ta mihia. 21 Avoeto ke pepeni simba ari amina God ta hande nau degi ta ikena avo mane ano sapura aisuja, avoeto erena amo ke pepeni agi eto ungotena embo jajavotoho ahera amo Keriso puvuto, teho ujeto pehaehija.