1 Eto ke mahu ingihera avo toto pambagora ungote oje jivito ehako be ingesi erena. 2 Eto Anera na Moses ta degi ke enu kajena amo embo na ke vahai au sapura aisuja amo God na amita sapura ta mine ikau kesuja amo mane toasuja avoeto God na embo amita toho oreketo ere uhua. 3 Rate embo amuna God ta orekari avo ke be ae aisuja amo ari sapura ta memenga amo tiumbeto pambari inono aera. Eto God na ari sasapura orekihie embomeni humbasuja amo Bada na kihi embo ta degi harikenu ingia avo dagota degi eo ingia. 4 Eto God na ungotena kito ke be ara hajire neite neite ari sinderi neite neite ikenu kia. Eto Ahihi Otohu ta sovera ari amo ujena ikenu ungotena vahai vahai na humbuto pure eagora.

5 Eto enda ambota puvuresuja amita ke erera amo Anera na enda avo mane tihi jigesora 6 rate embo amuna tihi jigesuja amita ke amo embo vahai na einge kajari mihia, “Eto umo God rate do eto embo hotembihe, eto embomeni simba ere oe? 7 Eto iji isapa Anera amo peni eto embomeni amo isapa ainge amo inena ari rate inena jige vihito siro ta otohu pasari usasa te na kogombete koreora, amo donda tapa avo embomeni na tihi jigora ika.” ke ainge kajari mihia 8 amita be amo God na au donda tapa enda ta eto uhu ta amo embo na tihi jigesora amo eha oroho emo tihi na kiae 9 rate Iesu avo ungote ere kogora amo iji isapa God ta Anera ainge mane meni isapa siro ena amita be amo God na embo tapa hondate aisi ue Iesu ikenu memenga kogue embo tapa avoembo pehena. Avo eto God na enu siro ta otohu pasari usasa te avo asuketo otohu ue embo peni eto mihia. 10 Eto God amo donda tapa ari embo avoeto donda tapa amo amita jo ta iraguja amina meniundi isapamane na usasa amita ta hururoro embo oreketo humbasi kihi Umbari Embo Iesu avo ikenu osaga memenga kina amina ari tapa inono ena. Eto ari erevi God na javotoho be ena. 11 Eto Embo Otohu Ari Embo te embo ototohu te tapa amo javo vahai avoembo Iesu na namei kamei ke ijie meki meki mane eaguja. 12 Amina ke einge God ta degi eria, “Nanena no javo avo nau namei kamei ta degi harikihe embo tapa ta tihi ta haveni ta umo jakeka asona.” 13 eto “Na embo eto umo humota aisona” ainge eto, “Na nau meniundi God na ikehija amiga mihena.” ainge ena. 14 Eto amita meniundi amo visi te orosa te avoeto amina visi humbuto embo eto pehari ta ivo simba ari embo Satan amita sovera ari avo purisa tirisa ehei 15 embomeni pehari joru ue joru ta ke agi ue mihovora avo ehei joru toto teho mihera. 16 Eto ke be amo Anera hondate asi ae rate Abraham ta meniundi avo hondate ere ua 17 amo embo ta priest peni eto iji tapa God ta degi ungotena jo uoi embo ta ari sasapura tapa avo ajato ijioi ingito Iesu ta orosa mahu enda ta vena avoeto hotembeto toaguja eto Iesu na amita namei kamei ta visi te orosa te umbae toaehija amo ari ainge mane aehija. 18 Eto amita degi engekari puvunu osaga memenga kina amo mahu kina avoeto ungotenau engekari puvuresuja amo amina kito jo ururou hondate aisuja.