1 Eto ungo hotembiheva amo embo Melchizedek amo enda Salem ta king eto God i be ta amita priest ra eto Abraham na king nei nei ga isoro eto dembeto puvutuhunu Melchizedek na pambuto hambuto Abraham ta degi javotoho ari ikenu, 2 Abraham na amita donda isoro ta umbuna avo kaheketo tapa ten ainge iketo vahai avo Melchizedek ta ikena. Eto ‘Melchizedek’ ta be amo ‘Ari javotoho ta king’ eto ‘Salem ta king’ emita be amo ‘Peka ta king’ ra. 3 Eto embo amita ohihi te e te mamo te amita javo amo kajae avoeto amita ohihi te e te mamo te avo amunure avo embo amuna kiae avoeto amita vasiri ihikari ta eto puvuto tutumota avo iraekora. Eto embo amo God ta Meni aingeko avoeto irari daroho ta priest ra.

4 Eto ungo tapa hotembevu. Eto ungo Judea ta ohihi vahai Abraham na donda isoro ta humbari avo kaheketo 10 ainge iketo vahai avo embo Melchizedek ta ikena avoeto embo Melchizedek amo peni be ra. 5 Eto embo Levi (Judea ta priests ta kihi humbari embora) ta ahihije nei uhoho na priest eto Judea ta ke pepeni agi ue donda tapa 10 ainge kaheketo vahai embomeni ta degi humbagora. Amo Judea embomeni ta ohihi amo Abraham avoeto namei kamei ta degi hande humbagora. 6 Eto Abraham ta be isapamane kahaja God na oje ue javotoho ari ikena avoeto Abraham amo embo peni rate embo Melchizedek amo Judea embo mane rate Abraham na hande ikihinu Abraham ta javotoho ari ikena. 7 Eto ke be amo embo isapa na peni ta javotoho ari mane ikaguja te embo peni na embo isapa ta degi javotoho ari ikaguja. 8 Eto ingeni nei ta amo javo Levi ta priests amo sasari eagora embopo amina embomeni ta donda tapa 10 rate vahai avo humbagora rate ingeni nei ta amo Melchizedek vasiri te irari ke eagora amina hande avo umbuna. 9-10 Eto ke nei amo einge ahera. Eto Abraham na Melchizedek hambuto hande ikena iji te amo Abraham ta ahije Levi hande humbari embopo ta ohihi amina puvurae Abraham ta poru ta irari iji te Melchizedek ta degi hande ikena amo Levi te tapa ikena ke ainge ahera.

11 Eto ke nei amo Levi ta javo vahai embomeni na priests eagora amita degi ta eto embo tapa na God ta ke pepeni avo umbua te embomeni amina ke pepeni avo agi ue amo God ta tihi ta amo javotoho manera avoeto God na ungotenau priest nei ikenu puvuna amo Levi ta ahije Aaron amita javo ta puvurae rate Melchizedek ta javo ta puvuna. 12 Eto priest nei eha puvuna amita ke pepeni te tapa amo neira.

13 Eto ke erena amo ungotenau Bada avoembo kajari ra eto amo Levi ta javo ta puvurae rate amo javo nei avoeto amita javo vahai embomeni na pene gaga ta God ta pure ae ra. 14 Eto ungotena kiarira Judah amo Iesu ta ohihi avoeto Moses na priest na pure do asora avo ikihe amo Judah na ara ae rate Levi na ara ena.

15 Avoeto ungotena ere kogora amo ungotenau priest nei puvija amo Melchizedek aingeko amina puvija 16 amo embo na ke pepeni ambo ambo ara amita priest manera te daroho irari ta priest ra. 17 Eto amita ke amo God ta ke ta einge kajari mihia, “Eto umo Melchizedek ta javo ta priest ue daroho iresoa.” ke ainge kajena. 18 Eto ke pepeni mamahu amo sovera ambu eto ari javotoho ari haite mane avoeto toari ra. 19 Te ke be amo Moses ta ke pepeni amo embo na aro javotoho aisuja inono ae rate ari eha javotoho puvija emina eoi God ta degi ta puvuto auvagora. 20-21 Eto God na amita javo humbuto priest mamahu amo ikae rate God na amita javo humbuto ungotenau priest peni dombo Iesu ikena. Eto God na Iesu priest ikasi ue ke einge ena, “Eto na Bada God nanena javo nau humbuhe umo priest ikehena amo mane toasona te daroho iresoa.” ke ainge ena. 22 Eto priests mamahu ainge mane rate God na Iesu amo noma kajagora ainge dombo enu peni be ena.

23 Eto nei amo eingera. Levi ta priests amina pepehekihe pure toa amita veta veta pure ere uahera, 24 te Iesu amo daroho ta priest avoeto Iesu ta pure hondate ari avo irae ra, 25 te embomeni hondate ue God ta degi penunu ijie kekaha te mihoi embo amuna God ta degi pambasi Iesu ta degi puvaguja amo eha eto daroho irari embo avo hondate eaguja.

26 Avoeto ungotena hondate ari haite Priest Iesu amita arimo do aingere? Amo otohu embo, ari sasapura ta tongopa irae eto ari sasapura embo na engekari inono ae uhu i be ta irari embo ra. 27 Eto priests tapa amina embo ta sasapura te amita sapura te tapa avoeto iji vahai vahai pene gaga ta pene ikagora, rate ungotenau priest vahai Iesu na iji tapa pene ikae rate iji vahai amita hamo na pene iketo ungotenau sasapura tapa avo ombuto umbuna. 28 Eto Moses ta ke pepeni God na ikena amita priests amo ivo ambupu avoeto ari sasapura embopo ra te amita ambota God na amita javo ta ungotenau Priest ikenu puvuna amo ari sapura irae daroho irari ta Priest ikena amo amita Meni be avo ikena.