1 Eto iji tapa namei kamei ari na osa mine ara evujo. 2 Eto umo kiae embo avo puvurou kito amo osa ari na jumbuhe pagihe evujo, amita be amo iji nei nei ainge Anera avo embo tambu ke ijie unduagora. 3 Eto enana tipura ta mihera avo hotembevujo. Eto ungona tipurata mihie tunga ta do hotembaeheva avo ungo na kogue enana hotembihe teki evujo. Eto enana embo nei ta ingeni ta mihie osaga memenga ere kogora avoeto ungo na ainge osaga memenga kiaeheva avoeto enana hotembevujo.

4 Eto embo ta jimbari amo otohura ainge evujo eto tiha pahia te sesena sasapura eagora amo God na kito memenga ikasuja.

5 Eto ungota donda mihia avo kito tunga javotoho ue koro ta tunga mane ikasora te God na ke einge eria avo hotembevujo. “Na umo mane toto pambasona te ungote iresona,” ke ainge eria. 6 Avo hotembihe sove sove eto pahue ke einge evujo, “Bada amo nau hondate ari Embo avoeto embo na nau degi ta do aisuja avo joru mane aisona,” ainge evujo.

7 Eto ungota tihi jigari embopo amo God ta ke ungota degi hande ea amo enana ta ari avo ungota degi ahe kihira ea amo God humota ue ea avo ungo kogue ainge God humota evujo. 8 Eto Iesu Keriso na iji eha eto iji ambota eto iji mahainge irari ta hajire nei mane aisuja te hajire vahai avo iresuja.

9 Eto ungotena God ta degi indari hande ikari amina indito ahihi ta sovera ari mane humbagora te God ta hondate ari amina ahihi ta sovera ari amo humbagora avoeto embo ta ahe poekari sapura neite neite avo be hotembavojo 10-11 eto Judea ta ari mahu ai ta ari sasapura ta o teto pene ikari amo priests na ikeore priest peni amina orosa humbuto degi otohu be otohu ai ta horeto embo ta ari sasapura avoeto ikaguja te o be avo indae humbuto pambuto da sahu ta undukeore evekihahija. 12 Eto Iesu na da sahu ta pambuto memenga kogunu orosa amita na embomeni tohota avo otohu ea. 13 Avoeto Iesu na da sahuta pambuto osaga te memenga te urumbari te kina avoeto da sahu ta amita degi huma kesora. 14 Eto enda ei ta ungotenau da be iraera te ambota puvuresuja avo kesi simba ere ovora. 15 Eto ungotenau pe na Iesu ta javo ke be ijie ke hande eagora amo ungotenau pene God ta degi ikihe jakeka eagora. 16 Eto embo ta degi ari javotoho ue hande ikari avo jenambu avojo ainge amo God ta degi pene ikarako ere ova avoeto God na osa eaguja.

17 Eto ungota tihi jigirikari embopo na ungo simba ere ora amo enana ta embo okose ta aro ingesuja avoeto ungo simba javotoho be ere ora eto ungona enana ta ke peive aisova amo memenga kogue ungota degi ari javotoho mane aisora avoeto enana ta ke agi ururovo enana tunga javotoho ue pure javotoho aisora. 18 Eto dago ei mihera avoembo pari evujo. Dago iji tapa ari jajavotoho pere ue iresi ere ora avoeto dagota jo ta ari sapura ta memenga iraera 19 eto na ungota degi pambasi uje ere ona amo peni be avoeto ari vahai avo irae aja pari evujo na pambane.

20 Eto peka humbari embo God na o ‘Sheep’ simba ari embo javotoho Bada Iesu avo enu vasiri te erenu amita orosa na ari eha ta daroho irora ena. 21 Eto God na ke amita avo agi ara ari jajavotoho ikau humbuto amita ujeje avo pere aisora. Eto ungotenau jo ta Iesu Keriso ta javota pure ere uma kito osa aisuja eto amita degi usasa iresuja, Amen.

22 Nau namei kamei nau oje kahari ke erevi ingova erena amo ke koso mane ere kajihena 23 eto ungotenau namei Timothy avo tipura ta mihia avo ehere arahata puvija avo ingivujo, eto nau degi ta sausau puvurou kito amo amiga ungo kesi pambasona 24 eto ekalesia ta tihi jigirikari embomeni te ungo God ta embomeni te tapa ere pekihera. Eto enana Italy enda ta mihera amite tapa ungo ere pekihera. 25 God ta hondate ari ungota degi iroi.