1 Eto Pilate na enu Iesu humbuto pambuto esi gamba na ejembeto teo irae enu 2 Rome ta isoro embopo na esi pepe te avo humbuto horoveto siro ta asuketo bo pangari ikeo uhu ta evinu 3 puvuto amita degi ke einge ijie urumbea, “Oro, Judea embo ta king,” ainge ijie tombu ta tea. 4 Eto Pilate na arahata puvuto Judea embomeni ta degi ke einge ena, “Kivu, na embo erevi pehumba ehena te amita sapura do hambae avoeto ungo na kiagova humbuto hambuto puvena,” ainge enu 5 Iesu na bo pangari te siro kope pepete asukena amite tapa araha ta puvuto hetenu Pilate na ke einge ena, “Embore erevira, kivu,” ainge ijinu 6 Judea ta priests pepeni te embo pepeni te na kito, “Cross ta te, Cross ta te,” ainge gagaha eto eo Pilate na, “Na pehumba ehena te amita sapura hambae ehena avoeto ungo oenga humbuto cross ta tevu,” ainge enu, 7 Judea embomeni na, “Dagota ke pepeni mihia amo eingera, ‘Na God ta Meni ra,’ ainge eagora amo dago na teore pehagora avoeto taro pehasuja,” ainge eo, 8 Pilate na ingito joru peni vahai be ue, 9 koto ari oro ta horeto Iesu ta degi ke einge ena, “Umo dainge eto puvurari re?” ainge enu Iesu na ke mine ae enu 10 Pilate na ke ehako einge ena, “Umo nau degi ta ke mine mane aote? Eto ari nau amo eingera, umo ano cross ta tasora eto ano arahata pambasoa amo na inonora te umo kiaerate?” ainge enu, 11 Iesu na ke mine einge ena, “Eto God na no degi ta sovera ikae amo nau degi ta ari neite neite mane aehea, te embo na humbuto ingeni no ta ikehija embo amita ari sapura amo no ainge mane rate pajire be ra,” ainge Iesu na ena.

12 Eto Pilate na Iesu ta ke avo ingito au hambuto pambaja uje ena te Judea embomeni na hori gagaha ijie ke einge ea, “Embo emina king ke ijie Caesar ere urumbihia avoeto inena embo erevi ao hambuto pambasuja amo umo Caesar ta toho manera,” ainge eo, 13 Pilate na ingito Iesu humbuto embo okose arumbeto pehumba ari degi amita javo, ‘Koro veukari’ ai Iesu enu arumbena (Judea embomeni ta ke na ‘Gabbatha’ eagora) 14 eto jarukari pondo evito asora avoeto nununga ari iji 12 o'clock unu ari ainge amo ea. Eto Pilate na Judea embomeni ta degi, “Ungota king re erevira,” ainge enu, 15 mine einge ea, “Umbuto pambu! Umbuto pambu! Cross ta te pehai!” ainge eo Pilate na, “Na ungota king avo cross ta tana erevete?” ainge enu priests pepeni na einge ea, “Dago ta king nei irae Caesar vahaira,” ainge ijie ngahia uo 16 Pilate na cross ta tara enana ta ingeni ta iketo tona.

17 Eto isoro embopo na Iesu umbuto Cross ikeo humbuto da ta eto pambuto degi javo, ‘Uha Vehu’ amo Judea embo ta ke na ‘Golgotha’ ke eagora ai pambuto 18 Iesu orohuta teto embo nei ingeni anga ta teto embo nei ingeni be ta aingeto cross oenga oenga ta tea 19 eto Pilate na ke einge kaeto cross ta tena amo, “Judea embo ta king emo da Nazareth embo Iesu ra.” 20 eto Pilate na ke kajena amo Judea ke na eto Rome ta ke na eto Greek ke na kajena amo da hoita mane avoeto Judea embomeni isapamane na eheketo kito 21 Judea embo ta priests pepeni na Pilate ta degi pambuto ke einge ea, “Inena ‘Judea embo ta king’ kaehea avo toto ‘Amina na Judea embo ta king ra ainge ena’ avo kajae ehea,” ainge eo, 22 Pilate na ke einge ena, “Nanena kaehena avo iresuja,” ainge ena.

23 Eto Iesu cross ta teo irae enu isoro embo tapa 4 amina Iesu ta bo asukari avo kaheketo vahai vahai umbua eto bo nei vahai jo ta asukari tunga ta eto veto utu ta ari amo ihirae rate jorereto kajari avo ungo oenga ke mine ara eto einge ea. 24 “Ungote mane osesekasora te ituha koso te tuho te jigoro embo amuna ituha koso avo humbasuja amo embo amina bo avo humbasuja,” ke ainge amo mahu kajari mihia amo einge ra, “Embo amuna bo nau amo kaheketo ituha koso te tuho te jigito goruketo humbasuja embo amina humbasuja,” ainge mahu kajari mihia, avoeto inono ta isoro embo na ea. 25 Eto Iesu cross ta teo cross engihi ta amita e te amita e ta jao javo Mary amo embo Clopas ta ae amite da magdala evohu Mary te aingeto heteto mihio 26 Iesu na amita e kito amita tunga humbari ambotani vahai amiga mihinu kito e ta degi ke einge ena, “Evohu, no meni erevira, 27 eto embo no aja erevira,” ainge enu ambotani vahai amina ingito Iesu ta e avo humbuto amita bande ta pambuto simba ere uahija.

28 Eto ari tapa do puvuresuja amo irae ere ua erevira ainge Iesu na kito God ta ke mahu kajari ta mihia avo au inono aja ke einge ena, “Na umo ujeje ere ua,” ainge enu, 29 enana na ingito wine tigegerite te ovu jo ta pevihari mihina avo ukaru koru ainge javo ‘Hyssop’ amina wine ta hatito Iesu ta pe ta jigio 30 indito ke einge ena, “Aravora, irae ehija,” ainge ijie amita siro joreinge unu hoenge irae enu pehena.

31 Eto evito amo Judea embomeni ta jarukari pondo indesora iji amo jangu indari iji dombo avoeto embo 3 amita hamo cross ta toaro iresora avo aravora ae eto Judea embomeni na Pilate ta degi, “Embo utu teto popojeketo humbuto pambarote,” ainge eo, 32 Pilate na amita isoro embomeni ikenu pambuto embo heriso Iesu ga cross ta tea avo teto utu poeketo pambuto embo nei teto utu poeketo pambuto 33 Iesu kia amo mahu pehenu kito utu poekae rate 34 isoro embo vahai na pahiha ta ki na kajenu orosa te umo te vena. 35 Eto na tihi nau na kia embo amina erena avoeto ke nau amo ke be perera eto ungo tapa na kito ke be ava erena 36 ari emo God ta ke mahu kajari ta mihia avoeto inono ta ehija. “Eto amita vehu tapa amo nei mane taro poekasuja” ainge kajari mihia 37 eto nei amo “Embo pahiha ta kajea avo embomeni na kogue iresora.” ke ainge mahu kajari mihia.

38 Eto embo Joseph da Arimathea embo amo Iesu ta ambotani rate Judea embo joru ue ojikari na Iesu ambo ambo ena, embo amina pambuto Pilate ta degi Iesu ta hamo humbasi penunu enu Pilate na aravora ainge enu humbuto pambuna 39 eto embo Nicodemus amo mahu mumete Iesu ta degi puvuna amite tapa jeune mune te (javo ‘myrrh’ te ‘aloes’ te) avo humbuto Iesu ta hamo jigesi puvuna amita bouka ta heka amo 50 kilos ainge avo humbuto puvuna. 40 Eto Iesu ta hamo humbuto jeune mune te amiga tapa bo koso vahai ai ta iketo togea amo Judea embomeni ta ari ainge eagora avoeto ea 41 eto Iesu cross ta teo pehena amita degi engihi amo ji vuji jajavotoho irari degi amita jo ta panga ho eha kovea amo embo kovae kihi ta Iesu ikeo herekena 42 eto evito amo Judea embomeni ta pondo indesora sirika burika ari iji te Iesu humbuto hoi ta pambari inono ae avoeto asa ta kovea.