1 Eto Iesu na timu hatirari ke ehako embomeni ta degi einge ena, 2 “Eto God na embomeni amita toho siriketo humbuto tihi jigesuja amita ari amo einge ra. Iji vahai king na amita meni na kakara jimbasi unu pondo nununga 3 eto amita ke agi ari embopo na embo puvuto pondo indora ikenu pondo ta duru mahu ingari embomeni avo pambuto oru ea te embomeni puvurari uje ae eo 4 king na amita pure embomeni nei ikenu pambuto ke hande ue einge ea. ‘King na jimbari ta pondo nununga eto amina o cow meni seha te visi te avo teto heheveketo nununga ehija avo indesi pambuvujo.’ ainge eo 5 oru ea embomeni na ingito ingarako ue totohota uje ea. Vahai amo pure andage asi pahunu nei amita store simba asi horihinu 6 nei uhoho na oru puvua embo avo urumbihe andito teo pehea. 7 Avo kito king na hini kambari eto amita isoro embopo ikenu pambuto pondo ta pambari uje ae eto embo teo pehea embomeni avo teo pepehekihio enana ta da avo undukeo evekena. 8 Eto king na amita pure ari embomeni jage enu puvuo ke einge ena, ‘Nau meni ta jimbari pondo mahu nununga ehena te oru ehena embomeni enana ta ujena puvurae ehera amo sapura be ehera 9 avoeto ungo pambuto degi ugorota isa ari embomeni doinge kesova avo evujo puvuto nau pondo indore,’ ainge enu 10 pambuto degi ugorota isa embo javotoho te sapura te tapa oru eo puvuto pondo bande ta horeto enete enete ea. 11 Rate King na embomeni puvua avo kesi bande ta horeto poeto kogue pambuto embo vahai jimbari ta bo avo asukae bo nei asuketo puvuna avo kito 12 ke einge ena, ‘Embo umo do eto jimbari ta bo asuketo puvurae bo nei avo asuketo puvuto horete?’ ainge enu ke mine ae enu 13 King na amita pure embopo ta degi einge ena. ‘Embo erevi amita utu te ingeni te gatahiketo tigito araha mume hoi ta gosukevujo pambuto veau embomeni tapa ai ta pambuto si ijie ti kiroro kiroro aisora’.” ainge ena. Eto Iesu na ke avo enu irae enu 14 tutumota ke einge ena. “Na ungota degi ke be na erena. God na embo tapa oru aisuja te heriso be siriketo humbasuja.” ainge ena.

15 Eto enana Pharisee embomeni na oenga pambuto vahaita eto daingeto eto ingari ke ngahia na aro Iesu ke sokova na harikau humbuto tasora avo ke kaseto 16 enana Pharisee meni ehaha amite King Herod ta tunga humbari embopo te aingeto humbuto ikeo Iesu ta degi pambuto ke gamo na poeketo einge eto ingia. “Ahe poekari embo, umo ke be ari embo avo dago kiarira eto umo embo ta hajae vajae retemo kiari retemo hotembari ke vahai erevi eto ingesi uje ere ora. 17 Dago Rome ta gavana ta degi tax koro ere ikihera rate tax ikihe ungotena Judea embomeni ta ke pepeni avo poekihere te poekaere avo ao ingesi uje ere ora.” ainge eo 18 Iesu na enana ta hotembari sapura kaseto puvua amo mahu kina avoeto ke mine einge ena, “Ungo jo heriso embopora na eto kesi puvuto erevete? 19 Avo ungota tax ikagova koro avo vahai ikevu kione.” ainge enu koro vahai ikeo humbuto kito, 20 “Koro emita hamo ta javo kikiva eto tombu ove eto ari amo amutare avo evu ingone.” ainge enu 21 “Amo Rome ta gavana ta tombu hajire ra,” ainge eo, “Rome ta hajire mihia avoeto Rome ta donda amo Rome ta ikasova eto God ta hajire kito God ta ikasova.” ainge Iesu na enu, 22 ingito mana mana ue Iesu toto pambua.

23 Eto iji amina Judea nei uhoho javo Sadducees amina embomeni peheto vasiri te mane erasora avo be hotembihe eto ingari ke ngahia hotembeto puvuto Iesu ta degi eto ingia. 24 “Ahe Poekari embo ingijo. Peroveta Moses na ke einge ena, ‘eto namei na ae jimbuto humbuto ere uma meni puvurae sari aisuja amita doru amo namei nei amina jimbuto ere uma meni puvuresuja amo namei mahu sari ena amita meni ke aisuja.’ ainge Moses na ena. 25 Rate kijo, namei kamei tapa 7 ainge ei ta mihahera. Eto namei bugo na ae jimbuto ere uahija meni puvurae enu pehena amita doru avo bugo amita kane na jimbuto ere uahija 26 meni puvurae enu pehenu ainge pere ue pambuto namei tapa 7 ainge evohu vahai avo jimbuto pepehekeo 27 evohu amo ambo ta pehena 28 avoeto enana tapa vasiri te erasora iji te evohu amo namei amuta ae au?” ainge Iesu ta degi eto ingio 29 mine einge ena, “Ungo God ta ke kajari te God ta sovera te tapa kiae eagova amita ue ereva. 30 Eto embo pehari ta eto erasora amo God ta Anera uhu ta iragora ainge dombo ue mane jimbuto iresora eto nei amo ungo embo peheto ehako vasiri te erasuja avo ke be ae eagova 31 rate God ta ke kajari ta einge mihia amo ungo eheketo kiaere? God na ke einge ena. 32 ‘Na Abraham ta God eto Isaac ta God eto Jacob ta God ra.’ ainge ena avo eto God amo embo pehari ta God mane rate embo vasiri te amiga mihera amita God avo ungotena kiarira.” ainge Iesu na enu 33 embomeni na amita ahe poekari avo kito ungo ari haiteko mane kito mana mana ea.

34 Eto Iesu na Sadducees embomeni ta eto ingari Iesu ta degi ikea avo ke be harikenu ingito ke mine ari inono ae ea avo Pharisee embomeni na kito vahaita horuketo 35 enana ta ke pepeni ahe poekari embo vahai na Iesu ke sapura aja ke einge engekena 36 “Ahe poekari embo, ke asona avo be harikejo ingone. Moses ta ke kajena ai ta ke vahai dombo be amo deire?” 37 ainge enu Iesu na ke be einge harikena. 38 “Ke vahai dombo be amo erevira, ‘no Bada God jo tapa na ari Tapa na eto hotembari tapa na osa ejo,’ 39 eto ke nei dombo be amo erevira, ‘umo oenga hamo no simba ue osa eagoa ainge dombo no namei kamei tapa osa ejo’ 40 eto God ta ke pepeni ikenu Moses na kajena amita Peroveta na kajea tapa amita ke susu be amo erena erevira.” ainge Iesu na ena.

41 Eto enana Pharisees embomeni vahaita uo Iesu enana ta degi ke einge ena, 42 “Ungo do ere hotembiheve? Ungotenau orekari embo amo amuta ahije re?” ainge enu “Amo King David ta ahije ra.” ainge Pharisee embomeni na eo, 43 Iesu na, “Eto amo David ta ahije kito Ahihi Otohu na do eto David ta degi enu, ‘Amo nau Bada ra’ ijie kajenu, 44 ‘Bada God na nau Bada ta degi ke einge ena ‘Nau ingeni be ei ta arumbeto iriro nane no kitoho teto ikano inena utu na hatiresoa’,’ ke ainge ijie David na kajena. 45 Eto David na ‘Nau Bada ra’ ke ena avoeto ungo do eto ungotenau orekari embo amo David ta ahije ke eagove?” ainge Iesu na enu 46 embomeni amuna ke mine ae be ea eto iji amikote eto iji tapa amita ambota enana me kogue Iesu ta degi eto ingari ke mine ae ere uahera.