1 Eto nau namei kamei ungo God ta ke pepeni amo Moses ta iji te ikena avo ungo kiari embopora, eto ke pepeni amina ungo vasiri te iragova amo peikarirate pehasova amo ungo mane peikasuja avo ungo kiarira. 2 Eto ke erena amo eingera. Eto evohu na amita ivu vasiri te irirou amo mane toasuja te ivu pehau toasuja amo God ta ke pepeni amina mane peikasuja. 3 Rate ivu pehae mihirou evohu amina amita hamo embo nei ta ikasuja amo tiha evohu rate ivu pehau embo eha jimbasuja amo ke pepeni amina mane peikasuja. 4 Avoeto nau namei kamei ungotena God ta ke pepeni mamahu avo toasi Keriso ga kajueto pehea te God ta toho be eto pure amita be avo umbara God na jiginu Keriso ga vasiri te erea. 5 Amita be amo ungotena hamo ta ujeje sasapura agi ari iji te God ta ke pepeni na haekasi unu ari sasapura uje isapamane ere umihe pepehekeo. 6 Rate ungotena God ta ke pepeni na andirari amita degi pepehekeo vujekenu arahata pahue God ta Ahihi Otohu ta ke agi ue iragora amo ke pepeni kajari amina ae rate vasiri ehaha na eagora.

7 Avoeto ungotena ke do aro? God ta ke pepeni amo sapura ke aro? Ke ainge mane aisora te ari sasapura do aingere avo God ta ke pepeni na eoi kiagora amo erevira, embo nei ta donda humbasi jo ta sirikagora amo sapura rate teho amo mane kiaehera te God ta ke pepeni amina haekeoi kiagora. 8 Rate na God ta ke peni avo hotembihe nau jo ta kajeoi embo ta donda humbasi uje isapamane eagona avoeto God ta ke pepeni irae amo ari sasapura ta hajire mane kiaehena. 9-10 Eto mahu kihi ta amo na God ta ke pepeni avo kiae avoeto vasiri te mihahena te ihiketo kogue ari sasapura jo nau ta irerembenu nau Ahihi pehari avo kia, amo na God ta ke pepeni agi eto vasiri humbana God na ikena te ai ta amo pehari pere hambuhana. 11 Amo erevira, na daingeto iresona amita degi amo God ta ke pepeni amina degi ena te ari sapura degi ai ta pahue amina ke sokova ijinu ingiho God ta ke pepeni amina nau Ahihi amo teo pehena. 12 Rate ungotena ere kogora amo God ta ke pepeni amo sapura mane rate ke Otohu jajavotoho embo ta irari daingeto iresora avo God na ikena. 13 Rate donda jajavotoho amina ahihi nau avo tenu pehenute? Ainge mane rate nau ari sasapura amina tenu pehena, amo ungotenau ari sasapura amo sapura be sapura avo be kiagora God no amita ke pepeni avo ikena amita jo ta ari sasapura irerembeto amita sovera na ahihi nau tenu pehena.

14 Eto ungotena ere kogora amo God ta ke pepeni uhu ita puvurari rate namo enda embora te ari sasapura ta ke agi ue amita pure eagona 15 amo na uje eagona donda avo toto uje ae donda avo uje ue kaiketo ue na oenga embo nei ta ari ko ere one ainge ijie eagona. 16 Eto ari uje ae eagona avo ue God ta ke pepeni avo ke be eagona avo poeketo me kiagona, 17 avoeto ari sasapura amo hotembari na hotembeto ae rate jo ta irerembeto jo ta kajeoi eagona. 18 Amo ari jajavotoho asi uje eto tunga ere ikihena te ari avo inono ae avoeto nau jo ta amo ari jajavotoho irae rate ari sasapura avo pere mihia. 19 Eto na ari jajavotoho asi amo pe na eagona te ehako ari sasapura eagona 20 amo na ari sapura toasi eagona te toae eagona amo na embo nanena ae rate nau jo ta ari sapura amina eoi eagona. 21 Avoeto jo nau ta ari einge emo mihia, na ari jajavotoho asi uje eagona te ari sapura emo hoi ta irae rate namote mihia 22 eto nau jo ta amo God ta ke pepeni mihia avo osa eagona 23 te ari sasapura pepeni te tapa nau jo ta mihia avo eto enana heriso na isoro ue na ari sapura ta tipura embo arako ereona. 24 Ajao! Na sapura embo eto nau hamo na nau Ahihi kihi humbuto pehari degi ta ere pahua amo amuna oreketo humbau? 25 God na ke ijirou Bada Iesu Keriso na nau ahihi oreketo humbasuja avoeto na God osa mahainge eagona, te ke erena amo erevira, na jo nau na God ta ke pepeni agi eagona te hamo nau amo ari sasapura ta ke agi eaguja.