1 Eto nau namei kamei, nau jo tapa na Judea embomeni nau be avoeto God na oreketo umbaja jo tapa na pari eagona. 2 Eto enana ta jo tapa na God uje ue amita pure asi uje eagora amo na kiarira te God ta ke be amo enana be kiaera. 3 Te God na eoi embo jajavotoho eagora te enana na ari avo kito kiaesira ue God na ari javotoho ari avo toto ungo oenga eto javotoho asi eagora te 4 Keriso na vahai God ta ke pepeni tapa amo inono ta ehei irae ehija avoeto embo amuna humota ururou amo God na kito embo javotoho ke aisuja.

5 Eto Moses na ke einge kajena, “Embo amuna God ta ke pepeni avo tapa inono ta agi aisuja amo God na kito embo javotoho ke ijirou daroho irari ta vasiri hambasuja”. 6-7 Te God humota ururoro kito embo jajavotoho ke aisuja amita ke amo Moses na einge kajena, “Embo amuna uhu ita vihari inono re? Eto embo amuna embo pehari ta degi be ari inonore? Ke ainge jo no ta mane hotembasoa” ke ainge Moses na kajena te ke be amo ungotenau orekari embo Keriso mahu uhu ita eto puvuna eto mahu vasiri te erena. 8 Eto ke ainge mane aisova te God humota ari ta ke dago na hande eagora amo einge kajari mihia “Eto God ta ke amo hoi ta mane rate no ivivita mihia eto no jo ta mihia.” 9 ke amita be amo erevira, Iesu pehenu God na enu vasiri te erena avo embo amina jo te tapa ke be ijie ivivi na Iesu amo nau Bada ra ainge aisuja embo amo God na kito oreketo humbasuja 10 amo ungo na jo te tapa na ke be ereva avoeto God na kogue embo jajavotoho ke aisuja, eto ungota ivivi na ereva avoeto oreketo humbasuja. 11 Eto God ta ke kajari ta amo einge mihia “Embo amuna humota aisuja amo me mane kesuja” ke ainge mihia 12 te Judea rete enda nei rete amita javo ai ta irae rate enda tapa embo amuna Bada ta hondate ari humbasi penunu aro ikau umbaro inono aisuja, amo enda tapa amita Bada aisuja.

13 Avoeto enda tapa ta embomeni amuna Bada ta javo ta jage aisora amo Bada na oreketo humbasuja.

14 Eto enanana Bada ke be ae aisora amo daingeto Bada jage aro? Eto enana amita ke embo na ae ingae aisora amo daingeto ke be aro? Eto embo na pambuto ke hande ae ingae amo daingeto ingoro? 15 Eto embo na ke hande ari embo ikae pambae amo daingeto ke hande au? Avoeto ke einge kajari mihia “Ke javotoho hande ari embo ta utu uruhu amo ingari javotoho.” 16 ke ainge mihia te Israel embo nei nei na ke avo ere ingihera te ambo ambo ae avoeto amita ke amo Isaiah na einge kajena, “Bada, ungotenau ke hande ere ora te embo amuna ke be erei? Enana ingito ingarako ereora”. 17 Avoeto Keriso ta ke avo hande uore embo na ingihe ke be eagora 18 te embo na Keriso ta ke avo enana Israel embomeni ta degi hande uerete aere? Amita ke amo einge kajari mihia, “God ta ke amo enda susu ta ihiketo pambuto tutumo be ta irae arira” ainge mihia te 19 Israel embomeni na God ta ke ere ingihera te be ingae rete? Ainge manera te amita ke amo God na ijinu Moses na kajena amo eingera, “Eto nanena enda nei embomeni humbuhurono amo ungo Judea embo na kito dago umbae ereoi ainge ijie osaga kesova amo enana enda nei kiari irae ke eagova embomeni avo humbuhurono ungo tumo aisova” ke ainge kajena 20 avo Isaiah na ke erevi kajena amo ke be pere na kajena, “Enana enda nei embomeni na na jombure ae rate hambuhera, eto enana na jage ae rate teho nanena ehene na be ere kogora”, 21 te Israel ta ke amo einge kajena. “Eto iho vujari ta eto pambuto mume sihukarita amo nau Judea embomeni humbasi no degi ingeni ere jujurukihena te enana ta jo ngahia oi ke ingito puvurae ereora”. Ke ainge God na ijinu Isaiah na kajena.