1 Nɛ nubʉya nu yʉ fariseo bi 'yø a man yʉ ją'i ngue man'da xʉn ngu i tɛn ra Jesús nɛ man'da xʉn ngu di xixyąbi, xinda gue'a ra Xuua Nxixyaą. 2 Pɛ nu ra Jesús him bi 'yøzɛhɛ ran xixyą, pɛ høngdähe yʉ́ xädigähe dá øthe ran xixyą. 3 Nɛ nu'bʉ mi bą'a ra Jesús 'bɛ'a mi 'yø ʉ yʉ fariseo, bi bɛ̨ni da 'uetho, ngue hin da bɛ̨n yʉ fariseo din sʉhmi ra Xuua. Bi bøm bʉ ja ra häi Judea bʉya, nɛ dá mbähmbe mahøn'a bʉ ra häi Galilea.

4 Pɛ guemhma bá thohmbe bʉ ja ra häi Samaria. 5 Nɛ nu'bʉ má thohmbe bʉ, dá sømhbe bʉ ja ra hnini Sicar, mbɛ häntho ra xɛqui bi un'a ra Jacob, bi un'na ra José rá ts'ʉnt'ʉ. 6 I jabʉ n'da ra pozo ra dehe gue bi 'yøt'a ra Jacob maya'bʉ. Nɛ guepʉ bin säya ts'ʉ ra Jesús, nguetho bi yäh ra 'yu. Mbɛ huxhyadi 'bʉ má sømhbe bʉ. 7 Nɛ bi zøm bʉ n'da ra xisu ra mɛngu Samaria, da gʉx ra dehe. Bi 'yɛ̨n'a ra Jesús:

―'Daqui ts'ʉ ni dehe, ga sigä ts'ʉ, bi 'yɛ̨mp'a.

8 Nɛ gätho gähe dyʉ xädigähe xtá sohmbe bʉ ra Jesús, nɛ dá cʉthe bʉ ja ra hnini ga tämhbe 'bɛ'a gätho ga sihe.

9 Nu'a ra xisu bi 'yɛ̨na:

―Hanja gní zoqui nɛ guí äc ra dehe, nguetho nu'i grá judío, nɛ nugä drá mɛngu Samaria, bi 'yɛ̨mbi.

Ngubʉ bi man ra xisu nguetho nu ma mijudíohe hinguin zomanho yʉ mɛngu bʉ Samaria. 10 Nu ra Jesús bi 'yɛ̨mbi:

―Nu'bʉ xquí pą a rá mate Oją in nde di 'da'i, nɛ'bʉ xquí pąqui to'ogui gue dí ä'a ra dehe, xquí 'yäc ra dehe di un ra te, nɛ nugä xcá 'da'a 'bʉ, bi 'yɛ̨na.

11 Nɛ nu ra xisu bi 'yɛ̨na:

―Nu'i grán 'yohʉ, hin'yʉ nin jʉxthe, nɛ xʉn hɛ̨ ua po na ra dehe. Hapʉ ja a ra dehe di un ra te guím ma. 12 Pɛ nu mam bombøtahʉ ra Jacob bi zi ra dehe i po ua nɛ ʉ gätho yʉ́ t'ʉhni nɛ yʉ́n dąni. Nɛ bi zogahe ra pozo ja ua. Ha man'da ja ni ts'ɛdi ngue guí ɛ̨na man'da xʉn ho ra dehe gui 'daje, bi 'yɛ̨n'a ra xisu.

13 Nɛ nu ra Jesús bi dąt'a bʉya:

―Hønt'a go to'o i sithe ua, gue'a nám 'bʉ ʉ yʉ pa ja bʉya, pɛ i tuthe mahøn'a. 14 Pɛ hønt'a go to'o da zi ra dehe dadí ungä, njąm'bʉ din tuthe mahøn'a, pɛ din ja tengu n'da ra mbøthe bʉ mbo rá mbʉi njąm'bʉ din thegue, nɛ gue'a nám 'bʉh maząi n'da a, bi 'yɛ̨na.

15 Nu'a ra xisu bi 'yɛ̨mbi:

―Grán 'yohʉ, 'daqui ts'ʉ ra dehe guím ma gue hin dan tuthe mahøn'a, nɛ hin gua ɛ̨cä mahøn'a ua ja ra pozo ga jʉx ra dehe bʉya.

16 Nu'a ra Jesús bi dąt'a:

―Grá xisu, ní mba bá si a ni ndø.

17 Nu'a ra xisu bi dąt'a:

―Njo'o ma ndø, bi 'yɛ̨ntho.

Nu'a ra Jesús bi 'yɛ̨mp'a:

―Majuąni guím ma, njo'o ni ndø. 18 Nguetho ya hin guí 'bʉhmi 'da ʉ cʉt'a yʉn 'yohʉ xcán thąthʉ, pɛ nu'a guí 'bʉhmi ya hin ni ndøsɛ a. Janangue'a majuąni njo'o ni ndø, bi 'yɛ̨n'a ra Jesús.

19 Bi dą'a ra xisu bʉya:

―Nu'i grán 'yohʉ, masque grá pøngahyą Oją. 20 Xiqui ts'ʉ 'bɛ'a ga øt'ähe, nguetho nu ma tahe mí thąnde Oją ua ja ra t'øhø, pɛ nu ahʉ gyʉ judío ahʉ guí ɛ̨mhbʉ, jatho da mba n'da bʉ Jerusalén da dąnde Oją bʉ, bi 'yɛ̨na.

21 Nu ra Jesús bʉya bi 'yɛ̨mp'a:

―Grá xisu, dami 'yɛ̨c'yɛi a ga xi i, ɛ maguepʉ da zøn ra pa hinga hønt'ua ja ra t'øhø, xínga hønbʉ Jerusalén din thąnde ra Ta. 22 Sä guí ɛ̨na guí thąndehʉ Oją, pɛ hin guí thąndehʉ tengu bi zän zɛhɛ Oją ngue din thąnde. Nugähe dyʉ judíohe dí thąndehe a bi zän Oją nguetho bi zän Oją ma t'ɛ̨c'yɛihe, nɛ'a ra Yąnte bi zän'na Oją ra judío a. 23 Pɛ bi zän Oją n'da ra xɛqui bʉ din thąnde, guepʉ ja ní mbʉi n'da. Nɛ mi ts'ʉtho da zøn ra ora, pɛ ya bi zøni, ngue da dąnde Oją nangue yʉ́ mbʉi ʉ to majuąni da dąnde, nɛ hin nangue yʉn t'øt'e ua ja ra ximhäi. Nguetho nu'a Oją i honi to'o da dąnde nangue yʉ́ mbʉi. 24 Nguetho hin di nɛqui Oją. Janangue'a hønt'a go to'o da dąnde Oją, jatho da dąnde nangue rá mbʉi nɛ nangue i tɛn'na ram hma majuąni, bi 'yɛ̨n'a ra Jesús.

25 Nu'a ra xisu bʉya bi 'yɛ̨mbi:

―Dí pącä ba ɛ̨ a rá Thahni Oją ngue ra Cristo a. Nɛ nu'bʉ bá ɛ̨hɛ da xängahʉ xʉn ho gätho.

26 Nu'a ra Jesús bi 'yɛ̨mbi:

―Guecä drá Cristogä dín zo'a i ya, bi 'yɛ̨mbi.

27 Nu'bʉ mí gua'a bi man ra Jesús, ɛ xø dí sømhbe bʉ dyʉ xädigähe. Nɛ dá hyonya thohohe gue nu ra Jesús mi yąui a ra xisu. Pɛ xínga n'dagähe gue dá änhde hanja bin yąui o 'bɛ'a bin xifi. 28 Nu ra xisu bʉya 'bex bi zopʉ rá mbamhmi, nɛ bi mba bʉ hnini bi xih yʉ ją'i:

29 ―Mbähä nɛ gua nuhʉ n'da ran 'yohʉ bi xicä gätho 'bɛ'a xtá øt'ä. Ha hinga gue'a ra Cristo 'bʉ, bi 'yɛ̨mp'ʉ.

30 Bi mba yʉ ją'i bʉya da zøm bʉ 'bä a ra Jesús. 31 Pɛ nu'bʉ hin ni zøm bʉ yʉ ją'i, nugähe dá xihmbe ra Jesús:

―Xänbate i, xi'bʉ gan sihmɛ ya, dá ɛ̨mfe.

32 Pɛ bi dą'a ra Jesús, nɛ bi 'yɛ̨nje:

―Ja man'da ní niyą ma mbʉigä, pɛ hinga ná pąhmbʉ, bi 'yɛ̨nje.

33 Dán 'yänzɛhɛhe:

―Ha 'bʉi to'o bi 'uįni, dán 'yɛ̨mfe bʉya dyʉ xädigähe.

34 Nu'a ra Jesús bi 'yɛ̨nje:

―Tengu'bʉ man ts'ihmɛgä a ngue ga øt'ä rá pähä a bá pɛngä nɛ ga juacä rá 'bɛfi a. Nɛ gue'a man'da ní niyą ma mbʉigä a. 35 Janangue'a gue'a dí xi ahʉ a ya, nguetho ya ba ɛ̨hnʉ yʉ ją'i. Nɛ ha guí ɛ̨mhbʉ di 'bɛh man goho ząna din ja ran sofo. Pɛ dami hyanthʉ yʉ ba ɛ̨hnʉ, tengu'bʉ n'da ra huąhi ya xʉ 'yot'i gue da mba nsoqui, nguetho 'bexque da zä ga cʉthʉ bʉ di manda Oją yʉ. 36 Nɛ nu'ʉ to i pa ma cʉ't'i bʉ din ząm bʉ hønt'bʉ go njąm'bʉ. Janangue'a nu'ʉ to da xoqui di johya, nɛ nu'ʉ to bi duhu nɛ'ʉ bi xoqui 'da dán johya thoho. 37 Nguetho majuąni rán thɛui rá 'bɛfi Oją a bi 'yøt'a n'da ra ją'i, “bi zopʉ rá huąhi bi duhu, nɛ n'dan'yo bi xoqui,” ngue i man yʉ ją'i. 38 Ya xtá xi ahʉ gui xojʉ hapʉ hin gá tuhmbʉ, xín gá uąfʉ, pɛ n'dan'yo bi 'yøt' ra 'bɛfi bʉ, pɛ guehma gui comhbʉ 'bɛ'a da dą ʉ, bi 'yɛ̨ngähe ra Jesús.

39 Nɛ nu'bʉ mí mam bʉ ja ra hnini ra xisu, xʉn ngu yʉ́ mɛnguhʉ bi 'yɛ̨c'yɛi gue ra Cristo a ra Jesús, nguetho bi man'a ra xisu gue xí xi a ra Jesús gätho 'bɛ'a xí 'yøt'e. 40 Nu'bʉ mí zøm bʉ yʉ mɛngu Samaria bʉ 'bäh ra Jesús, bi 'yɛ̨n'ʉ:

―Dami 'bʉcua ja ma hninihe, bi t'ɛ̨mp'a ra Jesús.

Nɛ dán dehe bʉ nyopa bʉya. 41 Nɛ ɛ̨mmɛ man'da xʉn ngu bi 'yɛ̨c'yɛi yʉ ją'i bʉ, nangue rám hmansɛ ra Jesús. 42 Bi t'ɛ̨mp'a ra xisu bʉya:

―Ya dí ɛ̨c'yɛihe ya, pɛ hinga hønt'a gá xije ná ɛ̨c'yɛigähe ya, pɛ nɛ'a dá øsɛhe bi man na ra Jesús. Nɛ dí pąhmbe majuąni ra Cristo na, rám pørpate yʉ ją'i 'bʉcua ja ra ximhäi, bi 'yɛ̨n'ʉ yʉ ją'i.

43 Nu'bʉ mí gua'a nyopa dá pømhbe bʉ ra hnini Sicar, dá hąxhe ra 'yu mahøn'a ní mba bʉ Galilea. 44 Nɛ bi mansɛ ra Jesús, nubʉ rá häi zɛhɛ n'da ra pøngahyą hin da hnumansu bʉ. 45 Pɛ nu'bʉ má sømhbe bʉ ra häi Galilea, bi numanho ma mɛnguhe bʉ. Nguetho xí nu yʉn t'øt'e nuįxte bi 'yøt'a ra Jesús bʉ Jerusalén 'bʉ mín ja ra dąmpɛti ran dąbaxjua, ngue nɛ'ʉ xí mba bʉ ʉ.

46 Nɛ dá mbähmbe ra Jesús mahøn'a bʉ ra hnini Caná ra häi Galilea, guepʉ xí päh ra dehe bin gui'uva. Nɛ mí 'bʉpʉ n'da rám fäts'iui ra ts'ʉt'abi xʉn ʉ rá ts'ʉnt'ʉ, nɛ i 'bɛm bʉ ja rán oi nubʉ ja ra hnini Capernaum. 47 Nu'bʉ mí 'yøde gue bi zøh mahøn'a bʉ ra häi Galilea ra Jesús nɛ i 'bʉpʉ ra hnini Caná, nɛ bá ɛ̨pʉ 'bʉh ra Jesús bʉya, bi 'yørpa ra ts'ɛdi da zixpʉ Capernaum bʉ ná 'bɛn a rá ts'ʉnt'ʉ, da xospi nguetho nde da du a. 48 Nɛ bi dą a ra Jesús:

―Pɛ ha jatho m'bɛt'o guin nuhʉ yʉ hmɛpya nɛ yʉn t'øt'e nuįxte, ja gui 'yɛ̨c'yɛigahʉ bʉya.

49 Pɛ man'da i humbi sits'i, nɛ bi 'yɛ̨mbi:

―Pɛ mbɛhma ts'ʉ cuø, xøhma da du ma t'ʉhnigä.

50 Nɛ bi dąt'a ra Jesús:

―Ní mba bá nu, nguetho hin da du ni t'ʉhni.

Nɛ nubʉya bi 'yɛ̨c'yɛi a rám hman a ra Jesús, nɛ bi mba bʉya. 51 Nɛ bá thą ʉ 'da yʉ́ 'yɛ̨hɛ 'bʉ mím mba bʉ 'yu bi xifi:

―Bi zä ni ts'ʉnt'ʉ ya, ɛ̨n'ʉ.

52 Nɛ bi 'yänni:

―'Bɛ'a ma ora bi zä.

Nɛ bi t'ɛ̨mbi:

―N'dande mande bi bøn ra pa, bi 'yɛ̨n'ʉ.

53 Nɛ 'bex bi bą'a rá ta gue gue'a ra ora mín yąui ra Jesús 'bʉ mí 'yɛ̨mbi da yąn a rá ts'ʉnt'ʉ. Janangue'a nu'a ran 'yohʉ bi däp rá mbʉi ra Jesús bʉya, nɛ'ʉ gätho mi'da 'bʉpʉ rá ngu.

54 Guehna bi 'yøt' ra Jesús 'bʉ mambá penje bʉ Judea dá sømhbe bʉ Galilea. Ya ná yondį ra hmɛpya bi 'yørpʉ ja ra häi Galilea.