1 M'bɛjua bʉya, bin 'yo bʉ mi'da yʉ hnini bʉ Galilea. Him bi nde bi mba bʉ ja ra xɛqui Judea, nguetho nu ma ngʉrpihe dyʉ judíohe, dyʉ israelhe, nde xtá hyo bʉ. 2 Nɛ ma guepʉ da dät ra pa ngue ząi dim pɛti ma mijudíohe, 'bʉ xʉ hyøh yʉ t'ʉngu, im bɛ̨ni 'bɛ'a bi 'yørpa Oją ʉ mam bombøtahe 'bʉ min 'yo bʉ ja ra ʉhäi. 3 Nu yʉ́n 'yohʉ a ra Jesús bi 'yɛ̨mbi:

―Nde'bʉ gui pøngua ní mba bʉ ja ra xɛqui Judea, ba nu a bʉ i tɛn'ni i nangue'a guí øt'e. 4 Nguetho njo'o to da 'yąh rá 'bɛfi 'bʉ in nde da t'ɛ̨spi. Nu'bʉ majuąni guí øt' yʉn t'øt'e nuįxte bá ut yʉ ją'i, nɛ gätho ra ximhäi da bą'a i, bi t'ɛ̨mp'a ra Jesús.

5 Ngubʉ bi xih yʉ́n 'yohʉ nguetho him mi ɛ̨c'yɛi ʉ. 6 Nu a ra Jesús bi 'yɛ̨mp'ʉ bʉya:

―Hinga na søn ra ora bi ts'ängä ga mbagä bʉ, pɛ nu'ahʉ hønt'a go 'bɛ'a má ora da zä gui mbähä bʉ. 7 Nu'ʉ 'bʉcua ja ra ximhäi hin di ʉc'ahʉ nguetho 'da i gu guí øthʉ ʉ, pɛ go di ʉgä ʉ nguetho dím mangä gue hingui ho øt'ʉ. 8 Ní mbäsɛhʉ 'bʉ guín ndehʉ, nugä hin ga mba ya nguetho hinga na søn ra ora ga mba bʉ, bi 'yɛ̨na.

9 Nu'bʉ mí gua'a bi man bʉya bim 'bʉt pʉ mi'da yʉ pa bʉ ra xɛqui Galilea.

10 Nu'bʉ mí mba bʉ Jerusalén ʉ yʉ́n 'yohʉ, m'bɛjua bi mba bʉ ra Jesús. Mbɛ bin 'yąntho nguetho bi nde him 'bexque da hnu. 11 Nɛ nu ma ngʉrpihe dyʉ judíohe i 'bʉpʉ, bi hyon'a ra Jesús bʉ ja ram pɛti. Nɛ bin 'yɛ̨m zɛhɛ ʉ:

―Hapʉ i 'bʉi 'bʉ, bin 'yɛ̨mp'ʉ.

12 Nɛ xʉn ngu yʉ ją'i bin yąnjo'dre nangue'a ra Jesús, nu'ʉ 'da im ma ngue xʉn ho a, nɛ nu'ʉ 'da i ɛ̨na: “Häte a.”

13 Pɛ xinga n'da bin yą ts'ɛdi nangue'a ra Jesús nguetho i su ma ngʉrpihe 'bʉpʉ.

14 Nu'bʉ mí tho'i ts'ʉ yʉ pa, ya bi zo i nde yʉm pɛti i t'ørpʉ, ja bi mba bʉ ja ra dąniją ra Jesús bʉya nɛ bin xänbate bʉ. 15 Nɛ nu ma ngʉrpihe bʉ ja ra niją bi hyonya thoho nɛ bi 'yɛ̨n'ʉ:

―Hague nja i sä da ma xʉn ho rám hman Oją na ran 'yohʉ, nɛ him bi zʉ'a man xädihʉ, bin 'yɛ̨m zɛhɛ ʉ.

16 Bi dą a ra Jesús:

―Nu'a man xädigä him mam hmansɛgä a pɛgue rám hman a to bá pɛngä. 17 Nu'bʉ 'bʉ a n'da gue nde da 'yøt' rá pähä Oją, da bą 'bʉ rán xädi Oją, o gue da bą 'bʉ mam hmansɛgä. 18 Nu'bʉ 'bʉ a n'da im ma 'bɛ'a mbɛ̨nsɛ, i honi da hnumansusɛ. Pɛ nu'bʉ 'bʉ a n'da i honi da t'ɛ̨spa rá hmu, im ma majuąni a nɛ hingui häte a.

19 Nɛ xø bi 'yɛ̨na:

―Bi 'dajʉ yʉn t'ɛ̨di ra Moisés, pɛ xínga n'da ahʉ guí øthʉ nguetho bi ma njon din hote, nɛ guín nde gui hyojʉ, bi 'yɛ̨n'a ra Jesús.

20 Nɛ bi dą'ʉ yʉ ją'i thoho:

―Masque bi bɛ̨n'na ra zįthu a gám ma, njo'o to in nde da hyo i, bi 'yɛ̨n'ʉ.

21 Nu ra Jesús bi dąt'ʉ:

―Nugä dá øt'a n'da ra 'bɛfi 'bʉ ra pa ran ts'äya, nɛ gätho ahʉ gá hyonya thohohʉ. 22-23 Pɛ nɛ'ahʉ, nu'bʉ din tįn i yoho yʉn t'ɛ̨di bi man ra Moisés, nu'a n'da bi ma gue gui hyɛcpahʉ yʉ́ ją'i yʉ 'uɛre, nɛ nu man'da bʉya ra pa ran ts'äya, guí huanhdʉ nda'a guí øthʉ, gue guí hɛcpahʉ yʉ́ ją'i yʉ 'uɛre. Nguetho hin guín nde gui fɛstahʉ a rán t'ɛ̨di ra Moisés. Nɛ hinga hønt'a ra Moisés bi ma da thɛcpa yʉ́ ją'i yʉ 'uɛre, pɛ nɛ'ʉ mam bombøtahʉ bi ma. Nɛ ngutho dá øt' 'bʉ má hoc'a n'da ra hyɛ̨nni 'bʉ ra pa ran ts'äya. Hanja gní sʉjʉ nɛ gue'a n'youi bʉ rán t'ɛ̨di ra Moisés dá øt'ä. 24 Pɛ damin 'yomfɛ̨nihʉ xʉn ho 'bʉ guí ɛ̨na gui juąnbahʉ n'da ra ją'i. Jatho 'bɛ gui pąhmbʉ 'bɛ'a nam bøn'a i øt'a n'da, bi 'yɛ̨n'a ra Jesús.

25 Nɛ nu'ʉ 'da yʉ mɛngu bʉ Jerusalén bin 'yɛ̨mp'ʉ:

―Ha hinga guehna ran 'yohʉ im ma ma ngʉrpihʉ da hyo. 26 Pɛ hague in ja, in xänbate ua bim pɛti gätho yʉ ją'i nɛ nte i xih ya. Uague bi bɛ̨n'ʉ ma ngʉrpihʉ gue majuąni ra Cristo na ra Jesús, gue bi huand Oją dim Hmu ua. 27 Pɛ nuna ran 'yohʉ, dí pąhmbʉ hapʉ bá nɛxna, pɛ nu'bʉ bá ɛ̨ a majuąni ra Cristo, njo'o to da bądi hapʉ dí nɛx'a, bin 'yɛ̨m zɛhɛ ʉ.

28 Nu'bʉ mín xänbate ra Jesús bʉ ja ra dąniją, nts'ɛdi bi 'yɛ̨na:

―Guím bɛ̨mhbʉ guí pąjʉ nɛ guím bɛ̨mhbʉ guí pąhmbʉ hapʉ bá nɛxä. Pɛ hin bá ɛ̨cä nanguesɛgä, pɛgue bá pɛngä a majuąni i ja rá ts'ɛdi. Nu'ehʉ hin guí pąhmbʉ a. 29 Nugä dí pącä a nguetho bá nɛxä bʉ i 'bʉ a, nɛ gue'a bá pɛngä a, bi 'yɛ̨na.

30 Nɛ 'bexque nde da bɛnt pʉya, pɛ njom bi zä bi bɛnt'i nguetho hin ní zøn ra ora da bɛnt'i. 31 Nɛ xʉn ngu yʉ ją'i bi 'yɛ̨c'yɛi gue majuąni ra Cristo a. Nɛ bi 'yɛ̨n'ʉ:

―Guehma majuąni ra Cristo na ra Jesús gue mí hma ba ɛ̨hɛ, nguetho njon da zä da 'yøt' yʉn t'øt'e man'da nuįxte, bi 'yɛ̨n'ʉ.

32 Nu'bʉ mí 'yøh yʉ fariseo nɛ yʉ dąmbäją 'bɛ'a bi man yʉ ją'i nangue'a ra Jesús, bi xi ʉ 'da yʉ asmayo bʉya da bɛnt'a ra Jesús ngue da got'i. 33 Nu'a ra Jesús 'bʉ mí thoqui bin xänbate, bi 'yɛ̨na:

―Mi ts'ʉtho dí 'bʉhmbʉ ua nguetho ga mba bʉ bí 'bʉ a bá pɛngä. 34 Nɛ nu'ahʉ bʉya gui hyonjʉ pɛ hin da zä gui tįnjʉ, nɛ hin da zä gui sømhbʉ bʉ hapʉ dam 'bʉcä, bi 'yɛ̨na.

35 Nɛ bin 'yɛ̨mzɛhɛ ma ngʉrpihe:

―Hapʉ da mba gue hin da zä ga tįmhbʉ. Ha da mba bʉ n'danni 'bʉ ʉ ma mijudíohʉ, nɛ da xänba ʉ, nɛ'ʉ n'dan'yo yʉ ją'i gue yʉ griego. 36 'Bɛ'a ním bøn'a man'a: “Gui hyonjʉ nɛ hin gui tįnjʉ, nɛ hin da zä gui sømhbʉ hapʉ ga mba,” ɛ̨njʉ, bin 'yɛ̨mzɛhɛ ʉ.

37 Nu rán zɛgui ra pa nangue yʉm pɛti mí øt'ʉ, gue'a ra pa ɛ̨mb yʉ ją'i man'da xʉn ndʉxqui a. Nɛ 'bäpʉ ra Jesús nɛ nts'ɛdi im man'a:

―Nu'a to'o di 'bɛ a man'da mahyoni thoho rá mbʉi, tengu'bʉ i tuthe, ba ɛ̨hɛ ga un'na mahyoni thoho, tengu'bʉ da zi ra dehe. 38 Nɛ nu'a to'o da zi ra dehe dím mangä, din ja tengu n'da ra dąthe da nɛxpʉ rá mbʉi gue di un mahøn'a ra 'da'yote, tengu xí man rá t'ohni Oją, bi 'yɛ̨n'a ra Jesús.

39 Nɛ gue'a bi ma nangue rá Hogandąhi Oją da hyąni to'o gätho da 'yɛ̨c'yɛi. Pɛ hin ní zøh rá Hogandąhi Oją 'bʉ mím ma nguetho hin ní ndex mahɛ̨ts'i ra Jesús gue tpa pɛngahʉ a.

40 Nu'bʉ mí 'yøh yʉ ją'i 'bɛ'a bi man ra Jesús, bi 'yɛ̨n i 'da:

―Masque majuąni rá pøngahyą Oją mí hma ba ɛ̨hɛ.

41 Nɛ nu mi'da bi 'yɛ̨na:

―Nu'a, ra Cristo gue rá Thahni Oją a.

Pɛ nu mi'da bi 'yɛ̨na:

―Pɛ ha dí 'yɛ̨pʉ Galilea ra Cristo. 42 Nguetho bi man rá t'ohni Oją, gue ra Cristo ba ɛ̨hɛ nangue rá 'yʉ ra David, nɛ di nɛqui bʉ ra hnini Belén guepʉ mí 'bʉh ra David, ɛ̨n'ʉ.

43 'Bex bin hec yʉ ją'i nangue'a bi man'ʉ, nɛ 'dahma 'dan'yo 'bɛ'a mím bɛ̨ni ngue to'o a ra Jesús. 44 Nɛ 'da ʉ nde da bɛnt'i ngue da got'i, pɛ xínga n'da bi zä bi bɛnt'i.

45 Nu'bʉ mbenc'ʉ yʉ asmayo bʉ 'bʉ ʉ yʉ dąmbäją nɛ yʉ fariseo, nu'ʉ bi 'yänni:

―Hanja hin guá sihʉ a dá xi ahʉ, bi 'yɛ̨n'ʉ.

46 Nɛ nu yʉ asmayo bʉya bi dądi:

―Pɛ him mí 'bʉ a n'da im ma tengu man'a ra Jesús, bi 'yɛ̨n'ʉ.

47 Nɛ bi dą ʉ yʉ fariseo bʉya:

―Ha nɛ ahʉ bi hyä ahʉ. 48 Pɛ xínga n'dagähe dyʉ fariseohe dí ɛ̨c'yɛihe a, xínga gue'ʉ mi'da ma mingʉrpihe. 49 Pɛ nu ʉ yʉ ją'i thoho gue hingui pąh yʉn t'ɛ̨di, hønt'ʉ i ɛ̨c'yɛi a ran 'yohʉ ʉ, pɛ da nu ran ʉnbi maząi ʉ, bi 'yɛ̨n ʉ.

50 Nɛ nubʉya nu ra Nicodemo, gue'a xí zøm bʉ 'bʉh ra Jesús 'bʉ n'da ra xui, bi 'yɛ̨mp'ʉ yʉ́ mifariseohʉ:

51 ―Nu'a man t'ɛ̨dihʉ, hingui sä ga juąnbahʉ n'da ra ją'i 'bʉ hin dá øhmbʉ 'bɛ'a da mansɛ, nɛ'bʉ hin dí pąhmbʉ majuąni 'bɛ'a i øt'e, bi 'yɛ̨na.

52 Nɛ bi dą ʉ, bi 'yɛ̨mbi:

―Nu'i tengu'bʉ nɛ'i guí 'yɛ̨pʉ Galilea, nguetho nɛ'i guím ma tengu im man yʉ 'yąmbʉi. Pɛ dami hyomhbʉ ja rá søcuą Oją gue'bʉ di nɛqui bʉ Galilea n'da rá pøngahyą Oją.

53 Nɛ n'da ngu n'da bi mba yʉ́ ngu bʉya.