1 Nɛ mi ts'ʉtho da zøm bʉ Jerusalén ra Jesús nɛ ʉ mín 'yohʉ. Bin 'yo bʉ hämbʉ ra hnini Betfagé nɛ ra hnini Betania, hɛ̨rpʉ ja ra nyuni Olivos. Nɛ nubʉya bi mbɛhn'dʉ yoho yʉ́ xädi ra Jesús.

2 ―Ni mbɛ nʉ njon nʉ bí ja ra hnini nɛ nu'bʉ gá sømmi, gui tįmmi bʉ n'da ra buru nthąt'i ngue njo'o to xí hyux'a n'dandį, nɛ gua xoc pʉya nɛ gua siui ua. 3 Nɛ nu'bʉ da t'ɛ̨n'aui: “Hanja ngubʉ guí øt'ui,” 'bʉ da t'ɛ̨n aui, gui 'yɛ̨nui: “Nu'a ra Hmu i honi nɛ xø ba si'be ua mahøn'a,” gui 'yɛ̨nui, bi 'yɛ̨n'a ra Jesús.

4 Nɛ bi mba bʉya, nɛ bi dįm bʉ a ra buru, nthąt'i bʉ ja ra goxthi nguepʉ i thoh ra 'yu. Nɛ bi xoc'ʉ bʉya.

5 Nu'ʉ mi 'bʉpʉ bi 'yɛ̨n'ʉ:

―'Bɛ'a guí øt'ui bʉ, hanja guí xocui ra buru.

6 Nu'ʉ yʉ xädi bi dąt'ʉ nɛ bi xifi tengu xi xih ra Jesús.

―Dami sixui 'bʉ, bi t'ɛ̨mp'ʉ yʉ xädi bʉya.

7 Bá ts'inba a ra buru a ra Jesús bʉya nɛ bi mbøh yʉ́ coto ʉ bá si ra buru, ngue bi gąspi nɛ bi hyuxa ra Jesús bʉya. 8 Nɛ'ʉ yʉ ją'i bi mbøh yʉ́m 'bɛxøts'e pahni bi xįmba bʉ 'yu, nɛ nu'ʉ mi'da yʉ ją'i bi xɛc yʉ paxi nɛ bi mbøcpa bʉ ja ra 'yu.

9 Nu'ʉ mi 'bɛt'o bʉ ní mba a ra Jesús, nɛ ʉ mi 'bɛjua, gätho í mba ʉ bi 'yɛ̨n'ʉ:

―Mająpi a bá pɛnhd Oją, bi 'yɛ̨n ʉ. 10 Din ts'ʉt'abi a tengu tho ma mbombøtahe ra David. Mixte rá ts'ɛdi Oją, bi 'yɛ̨m bʉ ní mba ʉ.

11 Bi yʉthʉ bʉ Jerusalén ra Jesús bʉya. Nɛ bi yʉrpʉ ja ra dąniją, nɛ bi nu 'bɛ'a gätho i t'ørpʉ nɛ bi bøm bʉya nguetho ya bin de. Bi mba bʉ ra hnini Betania nɛ ʉ 'dɛ'mayoho yʉ́ xädi bi mbähä.

12 Nu'bʉ mi hyax bʉya bi bøm bʉ Betania ra Jesús, bi mbeng bʉ Jerusalén. Nɛ bin tumanthuhu bʉ 'yu a. 13 Nɛ mi hant'a n'da ra za ja yʉ́ paxi, bi mba da nu 'bʉ i zʉpʉ yʉ́ ndät'o. Pɛ nu'bʉ mi zøm bʉ, nte bi dįm bʉ, hønt'ʉ yʉ́ xi nguetho hinga gue'ʉ yʉ pa i zʉh yʉ́ ndät'o, nɛ säti tho ja yʉ́ xi. 14 Nu ra Jesús bʉya bi 'yɛ̨mp'a ra za:

―Njąm'bʉ to da zi mahøn'a ʉ ni ndät'o, bi 'yɛ̨mbi.

Nɛ bi 'yøh yʉ́ xädi a bi man ra Jesús.

15 Nɛ bi thopʉ Jerusalén ra Jesús nɛ yʉ́ xädi. Nɛ bi yʉrpʉ ja ra dąniją mahøn'a. Nɛ bi hyøn a thi gätho yʉ mbä nɛ yʉ däi mi 'bʉpʉ. Nɛ bi ndønba yʉ́ mɛxa yʉm pämbɛti nɛ yʉ́n thuts'i yʉ mbät'azʉ. 16 Nɛ njon di japi da thopʉ niją 'bʉ i tu yʉ́ 'bɛni. 17 Nɛ bi 'yɛ̨mp'ʉ yʉ ją'i bʉya:

―Ha hinga nt'o't'i bʉ ja rá søcuą Oją ngue bi 'yɛ̨na: “Í thø a ma ngu nguepʉ da dąndegui gätho yʉ ją'i 'bʉcua ja ra ximhäi,” i ɛ̨n Oją, bi 'yɛ̨n a ra Jesús. Pɛ nu'ahʉ, xcá 'yørpahʉ tengu 'bʉ rá hyądo nguepʉ nin yąn ʉ yʉ bɛ̨, bi 'yɛ̨mp'ʉ bʉya.

18 Bi 'yø ʉ yʉ xänbate niją nɛ yʉ ngʉrpa mbäją 'bɛ'a xí man'a ra Jesús, nɛ i honi hague dán zä da hyo, nguetho bin su 'bʉ mi nu gätho yʉ ją'i madi hyonya thoho nangue a 'bɛ'a bi xänba ra Jesús. 19 Nu'bʉ mín de bi bøm bʉ a ra Jesús bʉ ja ra dąhnihni Jerusalén nɛ yʉ́ xädi. Bi mbähä bʉ ra hnini Betania mahøn'a.

20 Nu'bʉ mi hyax bʉya bi thoh mahøn'a bʉ 'bä a ra za ngue mi ɛ̨na xtán zip yʉ́n dät'o ra Jesús. Nu'bʉ mi nu'ʉ, ya xí 'yot'i gätho yʉ́ 'yʉ. 21 Nu ra Pedro bʉya bi bɛ̨n a xí man ra Jesús nɛ bi 'yɛ̨mbi:

―Xänbate i, nɛ nunʉ ra za gá 'yɛ̨mbi him man'dandį da ts'ip yʉ́n dät'o nɛ ya xø 'yot' ya, bi 'yɛ̨n a ra Pedro.

22 Nɛ nu'bʉ mi dąh ra Jesús, bi 'yɛ̨mp'ʉ:

―Dami 'yɛ̨c'yɛihʉ ngue gätho da zä da 'yøt' Oją a xʉn hɛ̨i. 23 Janangue'a nu'bʉ ya gá xihmbʉ n'da ra t'øhø da 'uegue din hyøzɛhɛ bʉ ja ra deją, din ja a gá mamhbʉ 'bʉ hingui yoho guím bɛ̨mhbʉ, nɛ guí pąhmbʉ majuąni gätho sä da 'yøt' Oją a xʉn hɛ̨i. 24 Janangue'a dí xi ahʉ ngue nu'bʉ ja a guí äfʉ Oją, dami 'yɛ̨c'yɛihʉ ngue di 'da ahʉ a guí äfʉ nɛ din ja a bʉya. 25 Nɛ nu'bʉ guí yąhʉ Oją him man guim bɛ̨mhbʉ a bi 'yøt'ahʉ ni miją'ihʉ, gam punbahʉ ʉ nɛ'a Oją di pun'nahʉ bʉya. 26 Nguetho nu'bʉ hin gadim punbahʉ ni miją'ihʉ xinga gue'a ni Tahʉ bí 'bʉpʉ mahɛ̨ts'i di pun'nahʉ, bi 'yɛ̨mp'ʉ yʉ́ xädi ra Jesús.

27 Bi zøm bʉ Jerusalén ra Jesús nɛ yʉ́ xädi, nɛ xø bi zøm bʉ ja ra dąniją. Nɛ nu yʉ ngʉrpa mbäją bi zøm bʉ mi 'bäh ra Jesús, n'yohʉ yʉ xänbate niją nɛ yʉ dąc'yɛi. 28 Nu'ʉ bi 'yän'na ra Jesús:

―To'o bi 'da a ran t'ɛ̨di gui 'yøt'a guí øt'e.

29-30 Nɛ nu ra Jesús 'bʉ mi dądi bi 'yɛ̨na:

―Nɛcä ga än'nahʉ to'o bi un rán t'ɛ̨di ra Xuua Nxixyą, hague Oją uague yʉ ją'ithoho. Nɛ nu'bʉ gá xijʉ, nɛcä ga xi ahʉ to'o bi 'dacä man t'ɛ̨di bʉya. 31 Nu'ʉ bin 'yɛ̨mzɛhɛ ʉ bʉya:

―Xi'bʉ ga xihmbʉ ngue gue'a Oją bi un rán t'ɛ̨di, nɛ da 'yɛ̨njʉ: “Hanja hin gá 'yɛ̨c'yɛihʉ thą,” da 'yɛ̨njʉ bʉya. 32 Nɛ nu'bʉ ga ɛ̨mhbʉ yʉ ją'i thoho bi un ran t'ɛ̨di ra Xuua, pɛ hingui sä ga xihmbʉ tengu a, bi 'yɛ̨n ʉ, nguetho gätho yʉ ją'i mi ɛ̨spa ra Xuua nɛ bi 'yɛ̨c'yɛi ngue rá pøngahyą Oją a. 33 Nɛ nu'bʉ mi dą ʉ yʉ xänbate niją nɛ ʉ gätho min 'yohʉ,

―Hin dí pąhmbe, bi 'yɛ̨ntho ʉ.

Nu ra Jesús bi 'yɛ̨mp'ʉ:

―Xinga guecä ga xi ahʉ to'o bi 'dacä man t'ɛ̨di, bi 'yɛ̨n'a.