8
Nóꞌö ꞌba̱ made e̱nga ar ꞌraꞌyo nkohi
1 Gatho nuna xta möñhu̱, ho̱nse̱nu̱ di ne da zo ri mfenihu̱: Di pe̱ꞌsu̱ nunar döngamöjönu̱, togo bi hñuxnu̱ hár ñꞌe̱i ár thuxandö Jö mhetsꞌi.
2 Bi mpe̱ habu̱ majöni ar dönganijö xi hyokase̱ Jö, hinge ar meximha̱i.
3 Ngetho gatho ya döngamöjö, xi thutsꞌi da mo̱xa ya mꞌo̱ñho̱ ne ya ñhötꞌi. Jange nunu̱ nꞌehe mahyoni di pe̱ꞌsa te da mo̱ꞌspa Jö.
4 Nuꞌmu̱ di ꞌbu̱hmöwa har ximha̱i, hindar nmöjöhmöꞌö, ngetho jawa ya möjö po̱xa ya mꞌo̱ñho̱ ngu mönga yá ꞌbe̱pate ar Moise.
5 Nuꞌu̱ pe̱pa nöꞌö di hñötsꞌi ne ar xuditho nu te janu̱ mhetsꞌi. Ngu bi tꞌuta ar Moise núꞌmu̱ ma nda hyokwa ár ngu Jö, ne bi tꞌembabi: Hyanda xiñho gi hyoka ngu xi tꞌutꞌaꞌi har tꞌo̱ho̱.
6 Ha nupya nunar döngamöjönu̱ di te̱ñhu̱, xa döta ár ꞌbe̱fi, ngetho ꞌba̱ made e̱nga nunar ꞌraꞌyo nkohi. Gehnu̱ xi tꞌunga mahye̱giwi maꞌra ya ñhötꞌi xa töte yá ñho.
7 Ngetho nuꞌmu̱ nunar ꞌbe̱tꞌo nkohi di pe̱ꞌshmö ár tsꞌe̱di, hinge mi mahyoni nda tꞌumhö manꞌa ꞌmu̱.
8 Gese̱ Jö himbi numañho ár ꞌbe̱fi ya me Israel, jange bi zu̱i bi ꞌñembabiꞌu̱:
Ar tsi Hmu enö: Ma da zo̱ ya pa
ga nkoꞌbe ya me Israel ne ya me Huda manꞌar ꞌraꞌyo nkohi.
9 Hinge ngu nunar nkohi da nkoꞌbe yá pale,
núꞌmu̱ nda mipa yá ꞌye̱ da ju̱ka har ha̱i Ehipto.
Ngetho nuꞌu̱ himbi umbyá mu̱i bi ꞌyo̱tꞌa nöꞌö da nkoꞌbe,
ne nuga da he̱kaꞌu̱, enga njapꞌu̱ ar tsi Hmu.
10 Nu xta tho nuya paꞌu̱, gehnu̱ ar nkohi ma ga nkoꞌbe ya me Israel, enga ar tsi Hmu:
Ma ga otꞌwa ma ꞌbe̱pate ha yá mfeniꞌu̱,
ne ma ga kötꞌwa ha yá mu̱i.
Ma ga ꞌbu̱i ngu ár Jögi,
ne ma ga nugaꞌu̱ ngu ma bötsi.
11 Hinto ma da uta ár ñꞌohu̱,
hinto ma da uta ár ku, di embabi:
Pödi togo ar tsi Hmu.
Ngetho gatho ma da bökagi,
di ndu̱ nöꞌö tsi tꞌu̱lo, ne di göxa nöꞌö döta.
12 Ma ga pumbabi yá tsꞌoki,
hinga ma ga pengi ga bemba nöꞌö hingi njapꞌu̱ bi ꞌyo̱tꞌu̱.
13 Nuꞌmu̱ enö nꞌar ꞌraꞌyo nkohi, xi gönga nöꞌö manꞌa ꞌmu̱. Ha nöꞌö enö bi göngi ne bi thege, txꞌu̱tho ꞌbe̱di da mꞌe̱di.