19
Ar ndönga Jö núnu̱ mhetsꞌi
1 Mꞌe̱fa da o̱ ra nze̱ye̱ togo mi ñönu̱ mhetsꞌi, ne mi eñꞌu̱:
Dár nsunda Jö ma tsi Hmuhu̱.
Gor me̱tiꞌö ar mpo̱ho̱, ar nsunda, ne ar tsꞌe̱di.
2 Ngetho nöꞌö o̱tꞌa ar hoga tsꞌu̱tꞌwi ne majöni.
Gehnu̱ xi umba ár mfe̱i ar tsꞌoꞌbe̱hñö
togo xi tsꞌotꞌa ar ximha̱i to gatho ꞌbe̱ngwi,
ne xi gotꞌwabi ár ji yá ꞌbe̱go xi hyo nunar ꞌbe̱hñönu̱.
3 Manꞌagi bi ꞌñeñꞌu̱:
—Dá nsunda Jö, ngetho nunár ꞌbifi tsötꞌi, hiñhamꞌu̱ da götsꞌi po̱tsꞌe.
4 Nuya nꞌa̱temagoho ya tsi dönzia ne nuya goho ya zuꞌwe mi te, bi nda̱ndihmö ne bi ñꞌani bi me̱ yá hmi har ha̱i. Ne bi nsunda Jö huxa har thuxandö, mi eñꞌu̱:
—Dá njapꞌu̱, dá nsunda Jö.
5 Bi bo̱nga nꞌar mhö har thuxandö mi enö njawa:
Ndöñhu̱ Jö ma tsi Hmuhu̱,
gatho yá ꞌbe̱goꞌihu̱,
ya tꞌu̱lo ne ya döta,
togo gi tsufu̱ Jö.
6 Ne da o̱ ꞌra ya mhö ngu ra nze̱ye̱ ya jöꞌi, ngu ár ñheti ya nzo̱the, ngu ya ñu̱ni, ne mi enö:
Dá nsunda Jö, ngetho Jö ma tsi Hmuhu̱ hinjoꞌo togo da hñuxkwi, go ar ndöꞌö.
7 Ma ga njohyahu̱, hö xa ga njohyahu̱, ne ga umfu̱ ar nsunda,
ngetho xi da̱tꞌa ár nthöti ar tsi Ntxönandöni,
ne nunár ꞌbe̱hñö xi ñhoki.
8 Ne xi tꞌumba ar se̱ki da hye ya hoga dutu xintꞌaxi ne xi nhwe̱xki.
Ngetho nunar hoga dutu, gehnu̱ nuyá hoga ꞌbe̱fi xi ꞌyo̱tꞌa ya gamfi.
Ár ngo ar tsi Ntxönandöni
9 Mꞌe̱fa bi ꞌñenga ar e̱nxe̱:
—ꞌYotꞌa nuya mhöyu̱: Nza̱tho nuꞌu̱ togo xi tsꞌohna hár ngo ar tsi Ntxönandöni.
Ne bi ꞌñengagi:
—Nuya mhöyu̱ gehyu̱ majöni yá mhö Jö.
10 Nuga da nda̱ndihmö hár wa nga ndöni. Ha nöꞌö bi ꞌñengagi:
—Hyandi xiñho nöꞌö gi pe̱fi, yo gi japꞌu̱. Nuga dar ꞌbe̱gotho nguꞌi, ne nuꞌu̱ ri ku togo da̱majöni xi jamfi ar tsi Hmu Hesukristo. Ndönga Jö.
Ngetho nuꞌu̱ togo da̱majöni togo ar tsi Hmu Hesukristo, gehyu̱ hömpa ár Hñö Jö mömba ár mhö.
Ar to̱ge nto̱ ar tꞌaxfani
11 Nepꞌu̱ da nu mi xo mhetsꞌi, ne da handa nꞌar tꞌaxfani. Nu ár to̱ge mar thuhu Majöni ne o̱tꞌa nöꞌö te mö, ne hö ar hoga tsꞌu̱tꞌwi höxa majöni ne ntuhni.
12 Nuyá da̱ ar to̱ge mi ñhe̱hwi ya faspi. Mi huxa hár ñö nze̱ye̱ ya fu̱indö, ne xki tꞌotnu̱ nꞌar thuhu hinto manꞌa mi pödi tema mi mö, ho̱nse̱nu̱ mi pödi.
13 Mi he nꞌar dutu xa xki mꞌahna ya ji, ha nu ár thuhu gehnu̱: ÁR MHÖ JÖ.
14 Ha nuya ndogu me mhetsꞌi mi he ya hoga dutu xintꞌaxi, ne mi ꞌbe̱faꞌu̱ mi te̱ni mi nto̱ ya tꞌaxfani nꞌehe.
15 Hár ne ar to̱ge ꞌbe̱tꞌo, po̱nga nꞌar ndo̱jwai he̱nte nuya yoho yá ñöni, da su̱ꞌsa ya meximha̱i. Ne ma da ꞌyo̱tꞌa ar tsꞌu̱tꞌwi di hö nꞌar tꞌobo̱jö. Ne da neꞌma ya jöꞌi ngu nheꞌma ya obxi the̱ꞌmi, ne da diꞌspa ár kwe̱ Jö togo hinto tsa̱ da ñhuxkwi.
16 Hár he ne hár xinthe tu nunar thuhunu̱: ÁR NDÖ YA NDÖ NE ÁR HMU YA HMU.
17 Nepꞌu̱ da handa nꞌar e̱nxe̱ mi to̱ har hyadi, ne bi mafi ntsꞌe̱di bi ꞌñemba gatho ya zuꞌwe nsa̱nga madeda mhetsꞌi:
—Ba ehu̱, kwathu̱ har da̱ngo xi ꞌye̱kꞌahu̱ Jö.
18 Tsafu̱ yá ngo̱ ya ndö, ya ndöndogu ne ya jöꞌi tse̱di, yá ngo̱ ya fani ne yá to̱ge, yá ngo̱ tsa̱ntꞌö ar jöꞌi, ya ꞌbe̱go ne nuya hingya ꞌbe̱go, ya tꞌu̱lo ne ya döta.
19 Ne da handa ar tsꞌozuꞌwe ne gatho ya ndö ꞌbu̱ har ximha̱i ne yá ndogu, xki mhuntsꞌi nda ntunkwi ar to̱ge nto̱ ar tꞌaxfani ne yá ndogu ñꞌowi nꞌehe.
20 Ar tsꞌozuꞌwe bi nju̱, ne bi nju̱ ar kate mꞌe̱hni nꞌehe, togo xki ꞌyo̱tꞌa ya ntꞌudi bi hya̱tꞌa nuꞌu̱ bi hñömba ár nthixtꞌi ar tsꞌozuꞌwe, ne bi ndönga ar do ndi hñötsꞌi. Gatho yohoyu̱ bi nju̱ bi tꞌetꞌa tetho ha nꞌar tsibi ngu nꞌar ñho̱nthe, habu̱ zo̱ ku̱ ya kꞌaxtꞌado xa xi mpa.
21 Ha nu maꞌra bi hyo ar ndo̱jwai mi po̱nga hár ne ar to̱ge, ne gatho ya zuꞌwe nsa̱ni bi niñö bi zipa yá ngo̱ꞌu̱.