Mataio.
14.
Na pàara-bà, âna wà *Héroda Antipas, pwi ukai naa Galilée, âna é pitêre ê jèkutâ goro ê pâ pwina é gére pwa ma ina wà Iésu. 
 é ina tà tèpa ênawéna kêe pâ: «Wà pwi Iésu bèepwiri, âna wà *Ioane Pwi a piupwaa, â é wâro côwâ gée na aubà.  wàé kaa pwiri ê majoroé ma é pwa ê pâ câmu bèepwiri kâra ê pàtàmee.» 
Wàéni ê jèkutâ goro majoro pai bà kà Ioane. Ba wà Héroda, âna ru piéa ma Hérodiade, tô wâdà Filipo, pwi aéjii kêe. Â é nye tà ciburà ina tà Héroda wà Ioane pâ: «Nye ticè tàrù'gà ma gà popa tô ilàri bèepwiri.» Â é nama tâjùru wà Ioane wà Héroda, ma piié ma tòpòé naa na karapuu. 
 nüma Héroda na é pòtàmwereê, êco na wâgotêe goro tèpa âboro, ba wâru gée goorà na rà niimiri pâ é pwi *péroféta me gée goo Pwiduée. 
Êco na ticè pai pwa wèe. Â, na pwi tòotù na rà pwamaina ê pai pitèpa Héroda, âna wà tô èpo ilàri kà Hérodiade, âna é câbu ara pâ âboro. Â po dau wâdé tà Héroda. 
 é *ipwataâboro têe pâ: «Go naa tâgà diri cè pwina gà o ilari jiio.» 
 wà tô nyaa kêe, âna é cètùué, ba na é ina tà ukai Héroda pâ: «Gà naa tôo ni i pûru wà Ioane naa na cè jè ngapò.» 
 wà Héroda, âna é piwâ ma pikîri. Êco na é jèe nye ipwataâboro na ara pâ âboro diri.  é panuâ pwi jè coda naa na karapuu, ba na é tépàgà i nya wà Ioane, 
ma pame i pûruê, ma naa târa i èpo ilàri. Â é popa wà tôoni, â é naa tà nyaa kêe. 
Gée na càùé, âna rà mwa caa me nau popa i naii wà Ioane wà tèpa *câmu kêe, ma rà pwàniriê. Â rà pâ nau piwiâ tà Iésu ê pwina tèepaa mari Ioane. 
Wà Iésu, âna é têre ê pwina tèepaa mari Ioane. Â é pâra acari gòro wànga naa na jè ére na wâiti, na ticia wê. Êco na, na rà nye pitêre pâ âboro, â rà còobé gée na pâ village, â rà po pâra wiâê wii bàrawià. 
Ûna é boo gée na wànga, â é côo i pâ âboro-bà, na dau wâru wàilà, â é po dau meaarirà. Â é pwa ma rà wâdé côwâ wà tàpé na rà maagé. 
Jèe pwa na é duu i tòotù, â rà medarié wà tèpa câmu kêe, â rà ina têe pâ: «Ée jèe duu i tòotù, â na, aupiticia ni. Gà panuâ pâ ê pâ âboro bèeni naa na pâ village na tàmwünyabwe, ba na rà o pa cè uti kàra.» 
 é tòpi tàra wà Iésu pâ: «Bwa, càcaa pâri ma rà pâra.  guwà naa cè uti kàra.» 
 rà ina têe pâ: «Càcaa pâri, ba nye 5 poloa co ma ârailu ârawéà na wâjaabà!» 
 é ina tàra pâ, na rà pame têe. 
 nabwé, â é ina târa pâ âboro pâ, na rà tâaboo naawê.  é pa i 5 poloa ma i du ârawéà.  é tagòtùé too naa napwéretòotù, â é pwaolé tà Pwiduée.  é tubiti i poloa, â é naa tà tèpa câmu kêe, â rà ipâdi târa pâ âboro.  é wàrapwiri tàra mwara i du ârawéà. 
 rà cau ija diri, tiagoro na rà jèe po cau pwàro diri.  rà panaimari côwâ ê dàra uti kàra, â rà pwaai 12 nakébò goo. 
Êdiri jéû tèpa paao na rà ija, âna po 5 000 kaamwara, â càcaa pûra ilàri ma èpo kîri. 
Gée na càùé, â é ina wà Iésu tà tèpa câmu kêe pâ: «Guwà tò naa gò i wànga. Â guwà tàmara gée naanigée na ére gée côwâ.» Ba é bwaa tà tâa, ba na é pawâjuéri côwâ ê pâ âboro. 
Ûna é picijiirà diri, â é too naa gòrojaa, ba na é pwapwicîri. Â tòpò ne gooé naawê. 
Napwa tèpa câmu kêe, na rà tâa gò i wànga, âna rà jèe wâiti jii napô. Â é pò me cararà ê pwéretòotù, â jèe pwii wià, naa na i wànga. 
Na jèe gòropwaa, â é pâra darirà gòro parawére jawé wà Iésu. 
 rà cau côoê, â rà kâa too, ba rà niimiri pâ pé duée, â po dau wâgotàra! 
Êco na é nama patùrarà wà Iésu, ma ina tàra pâ: «Tàpéeni, guwà cibwaa nama wâgotàwà! Ba wâgo! Guwà gòo!» 
 é ina têe wà Pétéru pâ: «Pwi Ukai, wiàna wâgà, â gà tûâri tôo pâ go boopaé darigà naa gòro parawére jawé.» 
 é ina têe wà Iésu pâ: «Îgà, boome!»  é boo gée gòro wànga wà Pétéru, â é tapoo pâra cara Iésu gòro parawére jawé. 
Êco na wâgotêe goro i pwéretòotù ma i wià na maina, â é tapoo tàbàtù ma é cònumu boo i najawé. Â é uu ma ina pâ: «Pwi Ukai, gà dàgòtùo!» 
 é nye tu pâ kaa naa goro îê wà Iésu, â é ina têe pâ: «Nye dau kîri kaa ê cèikî'gà! Gorodà na gà pidumapiê?» 
Ûna ru too naa gòro wànga, â é tûuboo i pwéretòotù. 
 wà diri tàpé na rà wâgòro i wànga, âna rà tùu jùrurà â rà pwamaina Iésu, â rà ina pâ: «Âjupâra pâ wâgà *Pwina naî Pwiduée!» 
Rà jèe tapàgà diri i nawià wà Iésu ma wà tèpa câmu kêe. Â rà tèepaa gée naa na ére na tàmwünyabweri Génésareth. 
 rà côoina Iésu wà tèpa âboro wê.  rà pi-ina pai tèepaa kêe pitiri ê ére-bà.  rà cau popa medarié diri tèpa maagé. 
 rà tacoo gooé, â rà ina têe pâ: «Pâri ma rà tu naa goo co ê gòobàra ârabwée'gà?»  wà diri tàpé na rà tu naa goo, âna rà nye wâdé kaa.