Maréko.
16.
Na capàto na bàrane ûna jèe nabwé ê *tòotù pwicîri kà tèpa *Juif â wà Maria gée Magdala, ma Salomé, ma wà Maria nyaa kà José ma Jacques, âna rà pâ nau wâri ê jawé ûrea, ba na rà wicèpwiri naa gòro ê naii Iésu. 
Na pwapwicîri, na bwaa dàuru, na é gére êgòdò tòotù, â rà pâra naa na auipwàni. 
 wii naigé, âna rà gére pi-ina tàra pâ: «Gona wàilàapà na o mwa pwùru i atü goro i pwêe? Ba po dau maina!» Êco na, ûna rà tèepaa pâ, â rà côo pâ jèe pwùru. 
 rà tò naa na i pwêe auipwàni.  rà côo pwi âboro èpo na é tâa gòro âji îjè, na é coona ê ârabwée gòri na pwaa.  rà po dau pò, ma wâgotàra. 
Êco na é ina tàra pâ: «Guwà cibwaa nama wâgotàwà! Ba go tâmogòori pâ guwà me nau mudà Iésu gée Nazareth, wà pwi ia tanamiriê naa goro *kurucé. Guwà têre, jèe tiàué ni, ba é jèe tàcî gée na aubà, â é jèe wâro côwâ! Ba wàéni ê ére, na ia tòpòé naawê. 
 guwà wâjué côwâ wài, â guwà ina tà Pétéru ma tèpa *câmu kà Iésu pâ, é tapacîwà wâ Galilée wà Iésu.  guwà o mwa côoê naawê, wàra na ia é jèe ina tàwà.» 
 rà còobé gée na i auipwàni i pa ilàri, â rà itàa pâ.  po dau dàpàgà tàra, â rà céca.  càra caa ina târa âboro imudi, ba po dau wâgotàra. 
Na pwapwicîri na bwaa dàuru, âna é wâro côwâ gée na aubà wà Iésu. Â é pipaarié béaa tà Maria gée Magdala, wà i tô ilàri, na ia é nama é wâdé na é tü târa ê pâ 7 duée gée gooé. 
 wà tôoni, âna é me, nau piwiâ tà tèpa bée Iésu, ê pwina é côo. Napwa wàilà, âna rà tàgére pijinünü imuru Iésu. 
 é ina tàra wà Maria pâ: «É jèe wâro côwâ wà Iésu! Ba go côoê!» Êco na càra caa cèikî naa gooé. 
Pwa tupédu a câmu kà Iésu, âna ru pâra wii naigé, â ru còobé gée na ville. Â é cipàpariru wà Iésu, na jèe ité pai côoê. 
 ru wâjué côwâ, ba na ru piwiâ tà pàra tèpa câmu, êco na wàilà mwara, âna càra caa cèikî naa gooru! 
 bénabwé wèe, âna é pipaarié tà tèpa 11 *apostolo kêe, wà Iésu, na rà bwaa gére ija.  é pwarà, â é ina tàra pâ: «Po dau gòo ê pûruwà! Tàutàwà na guwà cèikî, na rà ina tàwà pâ, go jèe wâro côwâ!» 
 é ina tàra mwara pâ: «Guwà pâra pitiri ê gòropuu, â guwà inapàpari ê *Picémara Wâdé, târa diri ê pâ âboro. 
 wà pwina é cèikî naa goo, ma *upwaaé, âna ée mwa udò, â o tâa têe ê *âji wâro.  wà pwina câé caa cèikî, âna ée mwa pitèié wà Pwiduée, ma naa wârimuru têe. 
Wàéni pâ câmu kêe naa goo tàpé na rà cèikî: Rà o tü târa ê pâ duée, naa na neeô; Rà o pwa ê pâ pwâratùra na pâ ité; 
Rà o cipa ê pâ dòèa naa na îrà; Rà o wâdo cè jawére bà, â o càra caa bà goo; Rà o tòpò ê du îrà naa gò tèpa maagé, â rà o wâdé côwâ.» 
Gée na càùru ê pai ina kêe tàra pwiri, â dàgòtù too naa napwéretòotù, wà Pwi Ukai Iésu, â é tâa gòro étò kà Pwiduée ba na é pitûâ wê. 
 wà tèpa câmu kêe, âna rà pâpitiri pâ napô, ba na rà inapàpari ê Picémara Wâdé.  é pitu tàra wà Pwi Ukai.  é *paâjupâra ê Popai na rà inapàpari, ba é naa tàra ê pàtàmee, ba na rà pwa ê pâ câmu, na rà pò goo wà tèpa âboro.