Luka.
7.
Ûna é gére ina diri pwiri tà tèpa âboro wà Iésu, â é wâjué me côwâ naa Capernaüm. 
 wà pwi jè caa kâra coda roma, na é tâa wê, âna é têre jèkutâ goo Iésu.  é panuâ pâdari Iésu pàra tèpa âboro imaina kà tèpa *Juif, ba na rà ilari jiié pâ, na é pwa ma tiàu maagé kà pwi ênawéna kêe. Ba é po dau maagé wà pwiibà, â é pwa na é bà.  dau wânüma wà pwi caa kâra coda gooé. 
 rà pâdari Iésu wà tàpéebà, â rà tacoo gooé pâ, na é pitu tà i pwi caa kâra coda.  rà ina têe pâ: «Gà côo, co pwi ukai, wà pwiibà, âna é pwi âboro na é dau wâdé.  wâdé ma gà pitu têe. 
Ba é meaari ê Ba kâjè wàijè tèpa Juif tiagoro na é bari ê *wâra pitapitiri kâjè.» 
 é pâra wiârà wà Iésu.  ûna rà tèepaa mwünyabweri ê pwârawâ kà i pwi caa kâra coda, â wà pwiibà, âna é panuâ pâdari Iésu pàra tèpa bée, ba na rà pame têe ê popai bèeni: «Ico pwi ukai, càcaa pâri naa gooò ma gà tèepaa naa pwârawâ kôo. 
 càcaa pâri naa gooò mwara na go pâdarigà. Wâdé na gà nye po tùra co, â o tiàu maagé kà pwi ênawéna kôo. 
Ba wâgo, âna go pitêre dàra pwi a pitûâ kôo, â go pitûâ kà tèpa coda. Â, na go ina tà pwi jèpwi pâ: “Gà pâra!” â é pâra. Â, na go ina tà pwi jèpwi pâ: “Gà me!” â é me. Â, na go ina tà tèpa ênawéna kôo pâ: “Guwà pwa ni!” â rà nye pwa.» 
 wà Iésu, âna é dau pò ma picâdiri i pwi caa kâra coda.  é tabèreè, â é patùra tèpa âboro na wâru, na rà gére pâra wiâê.  é ina tàra pâ: «Guwà têre bwàti: Câgo caa pâmari cè pwi âboro cèna maina cèikî kêe, pwacèwii pwini, tia na mwara ê âji Ba kà Pwiduée *Isaraéla.» 
Ûna rà wâjué côwâ naa jaa i pwi coda wà tèpa bée, â rà pâmari i pwi ênawéna kêe, âna é jèe nye wâdé côwâ. 
Gée na càùé, â é pâra wà Iésu naa na village na ina goo wê pâ Naïn. Â rà pâra wiâê wà tèpa *câmu kêe, ma pàra tèpa âboro na wâru. 
Ûna rà gére tèepaa pâ naa na goropwârawâ naa na i village, â rà pâmari tèpa âboro, na rà po cia pâ pwi jè a bà naa na auipwàni. Nye wàé co tà nyaa kêe, â wâru âboro na pâra wiâ wà tôobà. 
Ûna é côoê wà Pwi Ukai, â po dau maina ê pai meaarié kêe, â é ina têe pâ: «Tôoni, gà cibwaa i.» 
 é gée paé, â é tu naa goo i bòkòci.  wà i tèpa kâa wèe, âna rà coo.  é ina tà i pwi a bà pâ: «Pwiibà, gà tàcî. Ba go ina tâgà.» 
 é nye cimadò nau tâa kaa, â é tùra!  é naaê boo wà Iésu, ma naaê tà nyaa kêe. 
 dau wâgo tà diri tàpé na rà tâa wê, â rà picâdiri Pwiduée.  rà pi-ina tàra pâ: «É boome na wakè jaajè wà Pwiduée! Ba é cùru me marijè wà pwi jè *péroféta kêe na dau imaina.» 
 rà pijèkutâri ê pwina é pwa wà Iésu, naa na diri ê pâ ére wâ *Judée ma wâbèepi. 
Wà tèpa câmu kà *Ioane Pwi a piupwaa âna rà piwiâ têe diri ê pâ pwina é pwa wà Iésu. Â é todà tupédu ârailu wà Ioane, 
â é panuâru pâdari Pwi Ukai, ba na ru tawèerié pâ: «Pwiri nye wâgà kaa pwi *Mesia, *pwi a pa-udò na ée mwa tèepaa? É, na bà bwaa nye tapacîri cè pwi jèpwi?» 
 ru pâra, â na pwi pàara na ru pâdari Iésu na, â ru côo pâ é pwa ma tiàu maagé kà tèpa âboro na wâru.  é tü târa pâ duée, â é pwa ma rà niâ côwâ, wà pàra tàpé na rà bwi.  ru ina têe pâ: «É panuâbu medarigà wà Ioane, ba na bu tawèerigà pâ: Pwiri nye wâgà kaa pwi Mesia? É, na bà bwaa nye tapacîri cè pwi jèpwi?» 
 é tòpi tàru pâ: «Gàu wâjué côwâ nau piwiâ tà Ioane ê pwina gàu côo, ma ê pwina gàu têre. Ba wà tèpa bwi, âna rà jèe niâ; wà tàpé na rà bee, âna rà jèe pâra bwàti; wà tàpé na rà pwa maga, âna rà jèe wâdé; wà tèpa kee, âna rà jèe têrejè; â wà tèpa bà, âna rà jèe wâro côwâ; â wà tàpé na ticè kàra, âna rà jèe tòpi ê *Picémara Wâdé. 
Cidòri nyuâa pwina é côoinaô, ma cèikî naa gooò!» 
Ûna ru jèe wâjué côwâ wà tupédu a câmu kà Ioane, â é ina wà Iésu târa pâ âboro na rà gére tâa wê, pâ: «Na ia guwà pâra naa namaré nau têre Ioane â dà cèna guwà pâra nau ucâri? Pwi âboro na ipwaée kêe na é pwacèwii ê bàra watü na pòbagù pwéretòotù? 
Bwa! Â gona dà na guwà pâra nau côo? Pwi jè âboro na é coona pâ ârabwée na po wâdé? Bwa! Wà tèpa âboro na wàrapwiri, âna rà tâa na ê wâra ukai, â dau wâru neemururà! 
Nye dà cèna guwà pâra nau côo? Pwi jè péroféta? Üu kaa, â go ina tàwà pâ: Wà pwiibà, âna é pwi péroféta maina! 
Ba nye wà kaa Ioane, na é inaê wà Pwiduée, naa na *Tii Pwicîri, pâ: Go mwa panuâ paé pwi a pa popai kôo. Ée mwa pâbéaa'gà ma pwabwàti naigé'gà. Malachie 3.1 
«Guwà têre bwàti: Nye ticè pwi jè âboro gòropuu, cèna é piwéna jii Ioane Pwi a piupwaa. Êco na go ina tàwà pâ: Wà pwina ée dau kiriwi naa na *Mwaciri kà Pwiduée, âna o tâa têe ê pwina mwa piwéna jii wà Ioane.» 
Wà tèpa âboro na rà têre pwiri, ma tèpa *tò mwani wâripû, âna rà jèe cau côo pâ, é wâdé ma *tàrù wà Pwiduée. Â rà pâra dari Ioane, ba na é *upwaarà. 
Êco na, napwa naa goo wà tèpa *Farasaio ma wà tèpa *dotée goro ê Naèà, âna càra caa pitêre dàra ê câbawâdé kà Pwiduée, ba tàutàra na rà pâra dari wà Ioane ma é upwaarà. 
É ina mwara wà Iésu pâ: «Go ipwacèwii naa goro dà ê pâ âboro nabà? 
Rà pwacèwii pâ nari èpo na rà gére ipuburirà naa na aupitapitiri, â tàutàra dàra kòcò ma wà tèpa béerà na rà pitakàna ma ina tàra pâ: “Bà tòjò tàwà, â tàutàwà dàra câbu. Bà nyabiri tàwà nyabi târa ipwàni, â tàutàwà dàra i!” 
«Ba é tèepaa me wà Ioane Pwi a piupwaa, â câé caa ija poloa, â câé caa wâdo dipâa, â guwà ina pâ: “Pwa duée gooé!” 
«Ûna é jèe tèepaa me, wà *Pwina naîri âboro, â é ija ma wâdo pwacèwii pàra tàpé. Â guwà ina pâ: “Wà pwini, âna é dau pwi a wâdo ma pwi a-ija! Â é pabée tèpa tò mwani, ma wà pàra tèpa âboro èpà.” 
«Êco na âjupâra ê pwina jè mu ina pâ: “Ê tàmanga, âna jè côo taaci naa na pwâra wakè kêe.”» 
Na jè tòotù, âna é todà Iésu wà pwi jè Farasaio, ba na rà picaaija. Â rà tâaboo naa goro i taapà, â rà tapoo ija. 
 é tèepaa me wà tô jè ilàri gòronaigé, ba é jèe têre pâ é wêe wà Iésu.  é pame ê wâra jawé atü na dau wâdé, na wâbé goro ê jawé ûrea. 
 é tùu jùrué ma cigòboo na ara Iésu, â é i.  ê pâ nüru i kêe, âna rà tûuboo naa gò du â Iésu.  é câtùra goro wàrapûruê, ma bwénüu ê du âê, â é wicèpwiri i jawé ûrea naa gò du âê. 
Wà i pwi apooro pwârawâ, wà i pwi Farasaio, âna é côo pwiri, â dau èpà têe, â é niimiri pâ, ‘Wiàna wà pwini, âna é pwi jè péroféta na é cùrué me wà Pwiduée â pwiri é tâmogòori pâ wà tô ilàri bèeni, âna é tô ilàri gòronaigé. Êco na é nama é tu naa gooé wà tôoni.’ 
Êco na é nye tâmogòori kaa ê auniimiri kêe wà Iésu, â é ina têe pâ: «Pwini Simona, gà têre, ba pwa pwina nümoo na go ina tâgà.» Â é tòpi têe wà pwini pâ: «Îgà.» 
 é ina têe wà Iésu ê ucina bèeni: «É mwa tâa pwi jè âboro.  ârailu tupédu âboro na ru pwa kéredi têe—pwi jèpwi, âna 500 000, â wà pwi jèpwi 50 000. 
«Êco na càcaa pâri ma ru wâri wà tupéeni. Â é ina tàru pâ: “Jèe wâdé! Guwà naaco i kéredi kàu.” Â é cau pwanauriru goo diri i mwani bèepwiri.» É tubanabwé i ucina kêe wà Iésu, â é tawèeri wà Simona, wà i pwi Farasaio, pâ: «Wàilàapà gée goo tupéebà, na dau côoina ê pai wâdé kà i pwi apooro i mwani? Gà niimiri pâ wàilàapà?» 
 é tòpi têe wà Simona pâ: «Munaa wà i pwi a maina kéredi kêe.»  é ina têe wà Iésu pâ: «Gà âjupâra.» 
 é tabiié wà Iésu dà i tô ilàri, â é ina tà Simona pâ: «Pwiini, na go tòme naani pwârawâ'gà, â câgà caa pwabwàti tôo, wiâra ê nyamanya kâjè. Ba câgà caa naa tôo cè jawé, ba na go nuwa du âô.  câgà caa naa tôo ê l'huile târa ê pûruô.  gà côo i tô ilàri bèeni, âna câé caa nao goro pwa ê pwina wâdé. Ba é nuwa ê du âô goro ê nüru i kêe, â é câtùra goro wàrapûruê.  é wicèpwiri ê jawé ûrea na dau maina wâri wèe, naa gòro ê du âô. 
Ba dau maina ê pimeaari kêe, ba dau wâru ê pâ èpà kêe na jèe pwanauri. Â gà têre, wà pwi âboro na càcaa pwanauri têe pâ èpà kêe na wâru, âna o càcaa maina ê pimeaari kêe.» 
 é ina tà i tô ilàri pâ: «Tôoni, jèe pwanauri ê pâ èpà'gà.» 
 wà tàpé na rà gére picaatâa ma wàé goro taapà, âna rà pi-ina tàra pâ: «Wàilàapà pwi âboro bèeni, na pâri ma é pwanauri ê pâ èpà?» 
 é ina tà i tô ilàri wà Iésu pâ: «Cidòri nyuâagà co tôoni! Gà udò ma tâa tâgà ê *âji wâro gée goo ê cèikî'gà!  gà pâra, â ée mwa tâa jaagà ê pinaanapô.»