Luka.
8.
Gée na càùé, â rà pâra wà Iésu ma wà tèpa 12 a *câmu kêe, naa na pâ village. Â é picémara naawê ê *Picémara Wâdé goo ê *Mwaciri kà Pwiduée. Pwa mwara pa ilàri na rà pâra wiârà—wà pa ilàri na ia é nama tiàu maagé kàra, ma tü târa pâ duée gée goorà: Wà Maria gée Magdala na ia é tü târa pâ 7 duée gée gooé; 
Wà Jeanne, tô wâdà Chuza, pwi caa kà tèpa ênawéna kà ukai *Héroda; Wà Suzanne; Wâru mwara pàra ilàri na rà mu naa mwani ma neemururà, ba na rà pitu tà Iésu ma tèpa câmu kêe. 
Dau wâru ê pâ âboro na rà medari Iésu, gée na pâ village. Â é ina tàra ê ucina bèeni: 
«É mwa tâa wà pwi jè âboro. Â é mwa còobé, na jè tòotù, ba na é uri ê arapwüru. Â é uri, â é uri, â é uri… Â napwa ê pàra arapwüru, âna rà tûu naa gòro nyi nari naigé na aupwanapô â rà còogai tèpa âboro. Â rà me pâ marü, â rà uti diri. 
 napwa ê pàra pwi, âna rà tûu naa gòrotàrarà.  rà pò ma cipu, êco na rà marü, ba ticè jawé wê. 
 napwa ê pàra pwi, âna rà tûu naa nabibiu kâra pâ nari upwâra na pwa daarà. Â, na rà cipu i pâ nari upwâra bèepwiri, â rà câtàmwara i arapwüru. 
 napwa ê pàra pwi, âna rà tûu naa na napuu na wâdé.  rà cipu, â rà imaina too, â rà tòpò pwârà na po dau wâru awé—tiagoro 100.»  é tubanabwé ê ucina bèepwiri wà Iésu â é tomara too pâ: «Wà pwina pwa pwâranyüruê, âna wâdé na é têre!» 
Wà tèpa câmu kêe, âna rà tawèeri Iésu goo ê pai ina wàra ê ucina bèepwiri. 
 é tòpi tàra pâ: «Wà Pwiduée, âna é paari tàwà ê âji pai pwa goo ê Mwaciri kêe. Êco na, napwa naa goo diri ê pàra âboro, âna rà o nye po têre co ê pâ ucina {ba na: Rà côo taaci, â càra caa côoina; rà têre taaci, â càra caa têreina }.» 
É ina tàra mwara wà Iésu, pâ: «Wàéni ê pai ina wàra ê ucina bèepwiri: Ê arapwüru, âna ê Popai kà Pwiduée. 
«Â ê pàra arapwüru, âna rà tûu naa gòro naigé. Ê naigé, âna é ipwacèwii naa goo wà tèpa âboro, na rà têre ê popai, êco na é tèepaa me côwâ wà *Caatana. Â é dàgòtù côwâ ê popai, gée na ê pwâranümarà. Ba péa rà tà cèikî naa goo, â rà udò ma tâa tàra ê *âji wâro. 
«Â ê pàra arapwüru, âna rà tûu naa gòrotàrarà. Ê gòrotàrarà, âna wà tèpa âboro na rà tòpi ê popai naa na ipwàdée, â rà tàpo cèikî na jè pàara. Êco na càcaa wàawà naa goorà ê popai na rà têre. Â ûna tèepaa me marirà ê tacai, â rà nama panuâ cèikî. 
«Â ê pàra arapwüru, âna rà tûu naa na ê pâ na nari upwâra na pwa daarà. Ê napuu bèepwiri âna wà tèpa âboro na rà têre ê popai, êco na, ûna rà pâra, â rà tapoo pidumapiê goro ê pâ namuru na tèepaa naa na gòropuu bèeni. Â rà itàa burà ê pâ neemuru gòropuu, bau ê pâ muru na rà wâdéari. Â câamwara ê popai naa goorà, â o càra caa tòpò cè pwêe na târa. 
«Êco na, napwa naa goo pàra arapwüru, âna rà tûu naa na ê napuu na wâdé. Â ê pwi napuu bèepwiri âna wà tèpa âboro na rà *tàrù ma âjupâra, ma wâdé ê pwâranümarà. Â ûna rà têre ê popai, â rà tòpi, â rà pitêre dàra. Â rà pidàpwicâarirà, â pwa pwâra ê popai naa goorà.» 
É ina tàra mwara wà Iésu pâ: «Câjè caa nuri ê wâra ânye, ma jè cajipi goro ê jè cio, é wâpà wiàna jè tòpò na aranara aupuu! Bwa! Jè nye tòpò dòiti, ba na rà o côo bwàti wà tàpé na rà tò naawê. 
Êdiri pâ muru na jèe naapwàniri, âna o mwa paari naa na pwéelaa. Â o pâri ma jè côo bwàti. 
Guwà pwacôoco bwàti ê popai na guwà têre, târa ma pimaina too ê pwina guwà tâmogòori! Ba wà pwina jèe pwa têe, âna o jèu âjagò têe côwâ. Â wà pwina kîri ê pwina tà têe, âna o dàgòtù jiié côwâ ê ji dàramuru na tà têe.» 
Gée na càùé, â rà tèepaa me wà nyaa kà Iésu, ma wà tèpa jiié, ba na rà côoê. Êco na càcaa pâri ma rà medarié, gée goro ê pai wâru wàra pâ âboro na rà tâbèepié. 
 é ina tà Iésu wà pwi jè âboro, pâ: «Gà côo, rà wâboo gòroigé wà nyaa'gà ma wà tèpa aéjii'gà.  rà mudàgà.» 
 é tòpi tàra pâ: «Guwà têre, wà tàpé na rà têre ê popai kà Pwiduée, â rà wârori, âna wàilà kaa pwiri tô nyaa kôo, ma wà tèpa aéjii kôo.» 
Na jè tòotù, â rà tò naa gòro ê jè wànga wà Iésu ma wà tèpa câmu kêe. Â é ina tàra pâ: «Jè gée naanigée, na ére gée côwâ kâra nawià.» Â rà còpòo. 
Â, na rà pâra, â é puu wà Iésu. Â é tapoo uu ba maina i pwéretòotù naa nawià. Â jèe pimaina too wià, â jèe pwii naa na i wànga. 
 rà patàcî Iésu, â rà ina têe pâ: «Pwi a pwa pupûra, jè o jèe mwü!»  é pwa i pwéretòotù bau i nawià.  é nye coo kaa i pòu, â é nye po tànana kaa i napô. 
 é ina tàra pâ: «Gona câguwà caa cèikî?» Êco na dau wâgotàra.  rà pò gooé, â rà pi-ina tàra pâ: «É! Gona wàilàapà pwi âboro bèeni, na é pitûâ kâra ê pwéretòotù ma ê nawià, â ru pitêre dèe?» 
Rà tèepaa wà Iésu ma wà tèpa câmu kêe, naa Gadara, wâna ére gée côwâ kâra napô Galilée. 
Na napô bèepwiri, âna pwa pwi jè âboro na pwa pâ duée gooé. Jèe gòiri na é pitâa nacârü, â é cicàpé. Â wâru pâ pàara, na rà ipa-imwüruê ê pâ duée, ma é pwa-imudirimuru. Â wà tèpa âboro wê, âna rà pwa ma pii ê du îê ma du âê ma tòoé goro itùpaò. Êco na é nye taaci pòpàgà kêe. Â rà cètùué pâ naa namaré i pâ duée. Ûna é boo gée gò i wànga wà Iésu naa napô kà pwi âboro-bà â wà pwiibà, âna é nye tèepaa me caraé kaa. Â wà Iésu, âna pwa na é tü târa pâ duée gée gooé. Êco na é tùu jùrué ma cigòboo na araé wà pwiibà, â é tomara too pâ: «Iésu, *Pwina naî Pwiduée nidò *napwéretòotù! Dà na nümagà dàra pwa tôo? Go ilari jiigà pâ, gà cibwaa pwa tôo cè pwina èpà.» 
 é tawèerié wà Iésu pâ: «Gona dà neegà?»  é tòpi têe pâ: «Wâraduée.» Ba rà dau wâru tèpa duée na wâgooé. 
 rà tacoo goo wà Iésu, ma ina têe pâ: «Gà cibwaa tübà naa na i Oolaa! 
Êco na gà naabà pâ ma bà too naa na ê pâ puàkà bèepwiri.» Ba pwa ê pé pubu puàkà na dau maina, na rà tàgére ija géeni gopaére jaa. 
 é naa tàra ê pwina rà ilari wà Iésu.  rà còobé gée goo i pwi âboro, â rà gée naa goo i pâ puàkà.  rà nye itàa kaa i pâ puàkà, géenidò gòro i jaa, boo naaniboo najawé, â rà mwü naawê. 
Wà tèpa wéaari wàra i pâ puàkà, âna rà itàa pâ, nau wiâ ê jèkutâ bèepwiri, naaniboo na village, ma pitiri ê napô. 
 rà me ê pâ âboro, nau côo ê pwina gére tèepaa. Ûna rà tèepaa mwünyabweri Iésu, â rà côo i pwi âboro na ia pwa duée gooé, na é tàgére tâaboo na ara Iésu.  é jèe coona ê pâ ârabwée, âna jèe po wâdé ê pai tâa kêe.  nye po dàpàgà tàra, â dau maina ê pai wâgotàra. 
 wà tàpé na rà po côo diri ê pwina tèepaa, âna rà piwiâ tà pàra tàpé, ê jèkutâ goro i pai wâdé côwâ kêe. 
 wâgo tà tèpa âboro naa napô bèepwiri wâ Gadara.  rà ina tà Iésu pâ, na é pâra jiirà.  é tò naa gò i wànga, ba na é wâjué côwâ naa na ére gée côwâ kâra nawià. 
Pwa na é pâra â i pwi âboro, âna é me nau ilari jiié pâ, na é pâra wiâê. Êco na é tòpi têe pâ: 
«Bwa. Gà wâjué naa pwârawâ'gà, â gà wiâ tàra diri ê pâ muru, na é pwa ba kâgà wà Pwiduée.» Â é wâjué côwâ wà pwini. Â é wiâ pitiri naa na i village, ê muru na dau pwényuâa na é pwa ba kêe wà Iésu. 
É tèepaa me wà Iésu naa na ére gée côwâ kâra nawià. Â rà tòpié naa na ipwàdée wà tèpa âboro wê, ba rà tàgére tapacîê. 
 é tèepaa medarié pwi jè âboro na nee Jaïrus, pwi jè caa kâra *wâra pitapitiri.  é tùu jùrué ma cigòboo na ara Iésu.  é tacoo gooé pâ, na é nama pâra wiâê, naa na pwârawâ kêe. 
Ba wà tô nari èpo kêe, âna ée jèe pwa na é bà. Jèe 12 naja kêe, â nye wàé co tà du nyaa ma caa kêe. Â é pâra wiâê wà Iésu. Na é gére pâra wà Iésu, â wâru ê pâ âboro na rà po cibèepié, â rà dau pi-igabiarà. 
 é tâa nabibiu kà tèpa âboro bèepwiri, tô jè ilàri, na jèe po 12 naja kêe goro maagé, ba mu tèepaa me ê pàara na mu itàa domii gooé.  é jèe po tubatiàu ê mwani kêe naa goro pâ dotée, êco na càcaa pâri ma rà nama tiàu maagé kêe. 
 é mee ni càù Iésu, â é tu naa goro ê gòobàra ârabwée kêe.  nye nama coo kaa ê pai joro wàra ê domii gooé. 
É ina wà Iésu pâ: «Wàilàapà na tu naa goo i ârabwée kôo?» Â rà cau tòpi têe pâ: «Càcaa wàibà!» Â é ina têe wà Pétéru pâ: «Pwi a pwa pupûra, gorodà na gà ina pwiri? Ba gà côo, po dau wâru pâ âboro ni, â rà cibèepijè, â rà cau igabiarà naa googà!» 
Êco na é ina mwara wà Iésu pâ: «Bwa. Pwa pwi jè âboro na é tu naa goo i ârabwée kôo. Ba go têre pâ é pâra gée gooò ê jè jènere nii kôo.» 
Napwa naa goo wà tô ilàri, âna é céca, goro pai wâgotêe. Ba é côo pâ é tâmogòori ê pwina tàgére tèepaa wà Iésu. Â é tùu jùrué ma cigòboo na araé. Â é ina têe, na ara diri tèpa âboro, ê majoroé ma é tu naa gooé, ma ê pai nama tiàu ê maagé kêe. 
 é ina têe wà Iésu pâ: «Cidòri nyuâagà, co tôoni! Gà jèe wâdé côwâ goo ê cèikî'gà!  gà pâra, â ée mwa tâa jaagà ê pinaanapô.» 
Na é bwaa gére ina pwiri wà Iésu, â é tèepaa me wà pwi jè âboro, gée jaa Jaïrus, i pwi apooro i wâra pitapitiri. Â é ina tà Jaïrus, pâ: «Au! É jèe bà i èpo'gà. Â gà cibwaa cèpo tà pi-iluuri wà pwi a pwa pupûra.» 
 é têre ê pâ pwâratùra bèepwiri wà Iésu, â é ina tà Jaïrus, pâ: «Gà cibwaa pwa ma wâgotâgà!  gà cèikî, ba ée mwa wâro!» 
Ûna rà tèepaa pâ naa pwârawâ kà Jaïrus, â pwa na é tò wà Iésu, nau côo i tô nari èpo. Â é papwicîri jii tèpa âboro na rà tò naa na i wâ; wàco Pétéru, ma wà Ioane, ma Jacques, bau du nyaa ma caa kâra i èpo. 
Ba rà cau gére i ma pijinünü goo wà tô èpo. Â é ina tàra pâ: «Guwà cibwaa i, ba câé caa bà; â é nye po puu.» 
 rà pitaurèe gooé, ba rà tâmogòori bwàti pâ é jèe bà. 
 é tò naa na i wâ.  é tu pâ naa goro î tô èpo, â é ina too pâ: «Tôoni, gà cimadò!» 
 é nye wâro côwâ kaa, â é cimadò!  é ina wà Iésu tà tèpa âboro pâ: «Guwà naa cè uti kêe.» 
 ru nye dau pò kaa wà du nyaa ma caa kêe. Êco na é ina tàru wà Iésu pâ, na ru cibwaa pwa jèkutâ goo ê pwina tèepaa marirà.