Luka. 10. Wà Pwi Ukai, âna é pitòrigari 70 âboro, â é ipanuârà ba ârailu, béaa kêe, naa na pâ village ma pâ ére na é niimiri pâ é pâra naawê.  é ina tàra pâ: «Dau maina ê ârapiûnya na o pwa. Êco na càcaa wâru a wakè. Guwà pwapwicîri ma ilari cai jii pwi apooro aupwanapô, ma é panuâ me mwara cè pàra tèpa wakè, ba na rà o pitu. Guwà pâra, â guwà ipwacôoco! Ba go cùruwà pwacèwii ê pâ nari mutô naa nabibiu kâra macii a piuti. Â, na guwà pâra, â guwà cibwaa pa cè mwani, ma cè atà.  guwà popa co du wâraâwà.  guwà cibwaa tà pwa jèkutâ ma cè jè âboro wii naigé.» «Â, na guwà tò naa na jè pwârawâ, â guwà ilari jii Pwiduée ê aupwényunyuâari ma pinaanapô kêe, naa gò tàpé na rà tâa wê.  wiàna rà tèpa âboro na rà jèe tâa na ê pinaanapô, â o mwa tâa tàra ê aupwényunyuâari.  wiàna càcaa wàrapwiri, â o nye wâjué côwâ naa gòwà ê aupwényunyuâari kàwà. Na guwà tâa na cè jè village, â wâdé na guwà tâa na caapwi pwârawâ.  guwà cibwaa piwâ na guwà tòpi jiirà ê utimuru, ba wà pwi a wakè, âna wâdé na é tòpi ê uti kêe. «Wiàna rà tòpiwà wà tèpa âboro naa na village, â guwà tòpi ê utimuru na rà naa tàwà.  guwà nama tiàu ê maagé kà tèpa âboro wê.  guwà ina tàra jècaa pâ: “É tàgére tòpò ê Mwaciri kêe wà Pwiduée, â gà jèe tàmwünyabwerié!”» «Wiàna càra caa tòpiwà naa na jè village, â guwà pâra naa na aupitapitiri kà tèpa âboro, â guwà inapàpari tàra pâ: “Bà câtùra ê dàuru puu kâra ê napô kàwà, gée goo âbà, ba naa câmu kâra ê pitèimuru kà Pwiduée!  guwà ipwacôoco, ba jèe tàmwünyabweri ê Mwaciri kêe!” «Â go ina tàwà ê âjupâra pâ: Ée mwa pwa wârimuru tàra wà Pwiduée, na Tòotù na ée mwa pitèi pâ âboro.  o dau maina ê wârimuru kàra, jii tàpé gée *Sodoma. «Guwà ipwacôoco, wâguwà tèpa âboro wâ Korazine ma Bethsaïda! Ba o naa wârimuru tàwà! Ba go jèe pwa pâ muru na dau maina naa jaawà, â câguwà caa cèikî! Niimiri cai du ville Tyr ma Sidon biu, âna dau èpà ê tûâ kà tèpa âboro wê. Êco na, wiàna rà côo ê pwina go pwa naa jaawà, â pwiri jèe gòiri cè pai pitòotéri ê wâro kàra.  pwiri rà paari naa goro cè pai coona dodà kàra, ma pitâmirà goro dà!  o dau maina ê wârimuru kàwà, jii tàpé Tyr ma Sidon. «Â ipaiwà naa goowà, wâguwà tèpa âboro naa na village Capernaüm. Ba guwà niimiri pâ pwamuru naa goowà, â guwà pwacèwii Pwiduée. Bwa! Nye piticèmuru naa goowà, â ée mwa naawà boo dari tèpa bà!»  é ina mwara wà Iésu tà tèpa âboro kêe pâ: «Wiàna é pitêre dàwà cè pwi jè âboro, âna wâgo na é pitêre dòo.  wiàna câé caa tòpiwà cè pwi jè âboro, âna wâgo na câé caa tòpio.  wiàna câé caa tòpio, âna câé caa tòpi Pwina é cùruo me.»  rà pâra pâ wà tèpa 70. Ûna rà wâjué me côwâ, âna po dau maina pai ipwàdée kàra, â rà ina pâ: «Pwi Ukai, gà côo, wà mwara tèpa duée, âna rà pitêre dàbà, na bà tü tàra naa na neegà!»  é tòpi tàra wà Iésu pâ: «Guwà têre! Go côo wà *Caatana, na é tûuboo gée napwéretòotù pwacèwii ê âra!  go jèe naa tàwà ê tàrù ma pàtàmee, naa gò Caatana.  guwà o pâra gòro cè dòèa, ma cè keecii, â o nye ticè cèna côwâriwà. Êco na guwà cibwaa ipwàdée co, gée goro na rà pitêre dàwà ê pâ duée!  wâdé na guwà dau ipwàdée, gée goro na é jèe wii ê neewà wà Pwiduée, naa na Tii kêe, naa *napwéretòotù.» Ûna é ina pwiri wà Iésu, â é nye dau ipwàdée kaa goro ê Nyuâaê Pwicîri.  é ina tà Pwiduée pâ: «Go ipwaolé tâgà, co Caa, wâgà na gà Pwi Ukai kâra napwéretòotù ma gòropuu! Ba gà naapwàniri pâ muru bèepwiri, jii tèpa tâmogòorimuru ma wà tèpa tàmanga, â gà paari tà tàpé na càra caa câmu. Ba nye wiâra ê câbawâdé'gà.»  é ina tà tàpé na rà têreê pâ: «Êdiri ê pwina tâa tà Caa kôo, âna é jèe naa tôo. Nye wàé co na é tâmogòorio, wâgo Pwina naîê.  nye wâgo co na go tâmogòorié.  go paarié tà pàra tàpé, ba na rà tâmogòorié mwara.» Ûna rà tâa acari ma wà tèpa *câmu kêe, â é ina tàra wà Iésu pâ: «Dau wâdé ba kàwà, ma cidòri nyuâawà, ba wâguwà na guwà côo pâ muru na dau pwényuâa! Ba go ina tàwà pâ: Wâru tèpa *péroféta ma tèpa ukai na dau nümarà na rà côo ê pwina guwà côo, êco na càra caa côo.  nümarà na rà têre ê pâ popai na guwà têre, êco na càra caa têre.» Na jè tòotù, âna é tèepaa medari Iésu wà pwi jè *dotée goro ê Naèà. Ba nümee na é tacaié.  é tawèerié pâ: «Pwi a pwa pupûra, dà cèna go pwa, ma o tâa tôo ê *wâro dàra gòiri jaa Pwiduée?»  é tòpi têe wà Iésu pâ: «Dà cèna wii naa na ê *Naèà? Dà cè pai tâmogòori'gà?»  é ina têe i pwi âboro pâ: «Wâdé na gà meaari Pwi Ukai Pwiduée'gà, gée na diri ê pwâranümagà, ma ê wâro'gà, ma ê nii'gà, ma ê pai tâmogòori'gà. gà meaari tèpa âboropwacèwii ê pai pimeaarigà côwâ.»  é tòpi têe wà Iésu pâ: «Üu kaa. Gà po tòpi bwàti.  gà wàrapwiri cè pai pwa'gà, ba na o tâa tâgà ê *âji wâro.» Êco na wà i pwi âboro, âna nümee na é paari pâ é *tàrù.  é tawèerié mwara pâ: «Â gona wàilàapà pwi âboro, na wâdé na go meaarié?»  é pwa ucina wà Iésu, ba na bétòpi têe. É ina pâ: «É mwa tâa wà pwi jè âboro, pwi jè jènerejè, tèpa *Juif. Â, na jè tòotù â é mwa boo gée *Iérusaléma naa Iériko. Â, na é pâra wii naigé, â rà èié ma pwatarié wà tèpa mura.  rà popa diri pâ mwani kêe ma pâ ârabwée kêe.  rà panuâê na pwa na é jèe bà. «Â nabwé, â é me wii naigé wà pwi jè jènerejè wà pwi jè a pwa *ârapwaailò. Ûna é pâmari i pwi âboro, â é nye pàgà kaa gooé, â é nye pâra wii naigé kêe.  é tèepaa me wà pwi jè ênawéna kâra *Wâra pwapwicîri.  é nye pwacèwii pwi a pâbéaa, â é nye wiâ naigé kêe. «Â nabwé, â é tèepaa me pwi jè ârapàara tàpé *Samaria—wàilà na guwà pièpà ma wàilà.  é côo i pwi âboro, â nye dau maina kaa pai meaarié kêe.  é tuboo naa gooé, â é wicèpwiri ê wâi, naa gòro pâ aurumuru kêe, â é târamiri.  é tàmee too naa gòro i buriko kêe.  é popaé pâ naa na wâ kà tèpa pârame, â é wéaarié naawê. «Na dàuru kêe, âna é ipwa-bwàtié, ba na é wiâ côwâ ê naigé kêe.  é naa mwani târa i pwi apooro i pwârawâ ma ina têe pâ: “Gà wéaari bwàti wà pwini.  wiàna càcaa pâri ê mwani bèeni, â go mwa wâri cè dèreè, wiàna go wâjué me côwâ.” «Â nabwé, â é pâra wii naigé kêe.»  é tubanabwé ê ucina bèepwiri wà Iésu, â é tawèeri pwi dotée goro ê Naèà pâ: «Wàilàapà, gée goo tèpa âracié âboro bèepwiri, na é âji meaari wà i pwi âboro na pwatarié? Wàilàapà na é pwi âji jènereê? Dà cè auniimiri'gà?»  é tòpi i pwi dotée goro ê Naèà pâ: «Wà pwi na ia é pwa na wâdé têe ma pitu têe.»  é ina têe Iésu pâ: «Gà pâra, â gà ipwacèwiié!» Rà pâra wii naigé dàra Iérusaléma wà Iésu ma tèpa câmu kêe.  rà tèepaa naa na jè village, na é tâa wê tô ilàri na nee Marthe.  é tòpirà na pwârawâ kêe.  pwa tô jiié, na nee Maria, na é tâaboo naa jaa Iésu, ba na é tàmaari diri ê popai kêe.  wà Marthe, âna é nye gére pâracùu goro pwaailò, â é putàmu naa goo tô jiié, â é ina tà Iésu pâ: «Pwi Ukai, wà tô jiio, âna é nye tà panuâô ma go wakè acari!  pwiri nye wâdé ba kâgà? Gà ina têe pâ é me, ma é pitu tôo!»  é ina têe wà Pwi Ukai pâ: «Au, tôoni, gà po dau géaa nabà, goro pâ muru na piticèmuru naa goo.  gà côo, nye caapwi co ji muru na pwamuru naa goo.  wà Maria, âna é jèe pâmari.  o câ mwa caa pa jiié.»