Luka.
13.
Na pàara bèepwiri, âna rà medari Iésu wà pàra tèpa âboro, â rà ina têe pâ: «Wà ukai *Pilato, âna é nama tétàmwara pàra tèpa âboro gée Galilée, na pàara na rà pwa *ârapwaailò tà Pwiduée, naa na *Wâra pwapwicîri wâ *Iérusaléma.» 
 é tòpi tàra wà Iésu pâ: «Gona guwà niimiri pâ, rà bà, ba rà dau tèpa pwa na èpà, jii pàra tàpé? 
Bwa! Â go ina tàwà pâ: Guwà ipwacôowà, â guwà biiwà ma pitòotéri ê wâro kàwà. Ba câguwà caa tâmogòori cè pwi pàara na guwà o bà na! 
 guwà jèe niimiri cai wà tèpa 18 âboro, na ia tûu naa gòrà i auba na Siloé, â caagairà. Gona rà dau tèpa âboro èpà jii pàra tèpa âboro Iérusaléma? 
Bwa! Â go ina tàwà mwara pâ: Wâdé na guwà pinünüma ma guwà biiwà. Ba guwà péa tà cau bà wài, pwacèwiirà!» 
É ina tàra ê ucina bèeni wà Iésu: «É mwa tâa wà pwi jè âboro. Â é mwa pwa wâru pâra naa na aupwanapô kêe, ba na é côo ê *upwâra wâi kêe, ma pwa ma mudàra cè pwêe. Êco na mu nye ticè. 
«Â é pwa ma ina tà pwi a wakè kêe pâ: “Gà côo! Po âracié naja na go me nau mudàra cè pwêe, â nye ticè. Tépàgàé tâjii! Ba càcaa wâdé na é cèpo tà pi cipu naa goro piticèmuru naa goo, naa ticè pwêe!” 
«Â é tòpi têe i pwi a wakè kêe pâ: “Pwi ukai, tàpo naaê, ba na go bwaa pwabwàti goo. Go o mwa îri tabéaa gooé, ma naa wai kâra upwâra ma pwa puu naa goo. Â ju mwa côo na naja noowê. 
 wiàna pwa pwêe, â nye wâdé.  wiàna ticè, â gà o mwa bàra tépàgàé.”» 
Na jè *tòotù pwicîri, âna é tâa na *wâra pitapitiri wà Iésu. Â é gére pacâmuri tèpa âboro. 
 é tâa wê mwara tô jè ilàri, na é maagé naa na 18 naja. Ba tâa gooé ê duée, â too ê càùé, â càcaa pâri ma é citàrù. 
 é todèe wà Iésu, â é ina têe pâ: «Tôoni, é jèe tiàu ni i maagé'gà!» 
 é tòpò îê naa gòé.  é nye citàrù kaa, â é dau ipwamaina Pwiduée! 
Êco na é po dau putàmu wà pwi a pitûâ kâra na wâra pitapitiri, gée goo na tòotù pwicîri. Â é pwa tèpa âboro, ma ina tàra pâ: «Kaa! Tàpéeni, 6 tòotù na jè wakè na. Wiàna nümawà na tiàu maagé kàwà, â guwà me naa nadàpàra pwapwicîri! Â guwà naaco ê tòotù pwicîri!» 
 é tòpi têe wà Pwi Ukai pâ: «Wàéco! Gà ina, â gà têre côwâ! Gona câguwà caa tipi ê macii kàwà ma pawâdoorà, na tòotù pwicîri? Â? 
 wà tô ilàri bèeni, âna é tô gòobàra *Abéraama, pwi jojoorojè.  é piié wà *Caatana naa na 18 naja.  wànau, o nye ticè tàrù kôo ma go tipi ê maagé kêe na tòotù pwicîri?» 
 rà kamu diri tàpé na rà cicara Iésu. Êco na ê auwâru gée goo tèpa âboro, âna rà dau ipwàdée goro pâ muru na muugère na é pwa. 
É ina mwara wà Iésu pâ: «Napwa ê *Mwaciri kà Pwiduée, âna é pwacèwii dà? Wàéni ê pwi ucina, târa ma guwà tâmogòori: 
«Ê Mwaciri kà Pwiduée, âna é pwacèwii ê jè pudòro moutarde na dau kîri. Wà pwi jè âboro, âna é câmi, â é cipu. Â é jèe pâ nau dau maina. Â pâri ma rà pwa wânaîrà, naa gò pâ ditèe, ê pâ marü.» 
«Ê Mwaciri, âna o pwacèwii mwara ni: 
Wà tô jè ilàri, âna é popa ê nyaa kâra poloa, â é biinaimari bau 25 kilo goro dàuru poloa. Â é tü tiagoro na é tùu too i poloa!» 
É gére pâra dàra Iérusaléma wà Iésu. Â é pwa ma pacâmuri tèpa âboro naa na pâ village ma napô, wii naigé. 
 é tawèerié wà pwi jè âboro pâ: «Pwi Ukai, gona o dau pwâco wà tàpé na rà o udò ba na tâa tàra ê *âji wâro?»  é ina tà tèpa âboro wà Iésu pâ: 
«Guwà côo, nye dau picu kaa ê goropwârawâ, pâ naa na ê âji wâro. Â guwà ipwadàrapwa cai ma guwà tò naa na. Ba wâru tàpé na nümarà na rà tò, êco na o pwacoé tàra. 
Ba, na ée târi ma kiiri ê goropwârawâ, wà pwi apooro pwârawâ, â o càcaa pâri ma guwà tò. Guwà o tà coo boo gòroigé, ma cùu taaci i goropwârawâ, ma ina têe pâ: “Pwi ukai, gà tàpiri tâbà!” «Â ée mwa tòpi tàwà pâ: “Bwa. Guwà pâra, ba câgo caa tâmogòoriwà.” 
«Â guwà o mwa ina têe pâ: “Bwa. Nye wàibà kaa, na ia jè mu pi-ija ma wâdo ma wâgà. Â wàibà na ia gà mu pacâmuri pâ ni jaabà!” 
«Â ée mwa po ina tàwà gée pâ: “Bwa! Câgo caa tâmogòoriwà! Guwà tèpa còobé géepà? Guwà pâra jiio, ba guwà tèpa pwa ê pâ tûâ na èpà! Ba câguwà mu caa pwa ê câbawâdé kôo.” 
«Â o mwa tüwà naa gòroigé. Â guwà o mwa i ma tòngüru poropwâwà, goro pai tòina kàwà. Ba guwà mwa côo tèpa jojoorowà—wà *Abéraama, ma Isaaka, ma Iakobo—ma wà diri tèpa *péroféta, na rà cau tâa diri na ê Mwaciri kà Pwiduée. 
 o mwa wâru diri cè tàpé cèna rà o mwa me, gée na diri ê gòropuu.  o pwa autâa kàra, na ê pi-ija maina, naanidò na Mwaciri kà Pwiduée. 
 guwà côo, wâru tàpé na rà pwicò nabà, na rà o mwa caa pâbéaa na pwi pàara-bà.  wâru tàpé na rà pâbéaa nabà, na rà o mwa caa pwicò.» 
Ûna é gére ina pwiri wà Iésu, â rà nye tèepaa me kaa wà pàra tèpa *Farasaio, â rà ina têe pâ: «Pwiini, bà têre pâ, ée pwa na é tétàmwaragà wà ukai *Héroda Antipas! Â wâdé na gà uru géeni!» 
 é tòpi tàra pâ: «Guwà ina tà pwi macii a piugà bèepwiri pâ, nabà ma widàuru, âna go o bwaa mara pwa ê wakè kôo ni—ba go o bwaa tü târa pâ duée, â go o bwaa nama tiàu maagé kà tèpa âboro.  naa na béâracié kâra tòotù gée na càùé, âna go mwa tubanabwé diri. 
Êco na go o mwa coo gòobàra ê naigé kôo pâ naa Iérusaléma. Ba o càcaa wâdé wiàna o tétàmwara pwi jè péroféta kà Pwiduée wâgòroigé jii Iérusaléma ê ville pwicîri kêe! 
«Au! Nyi wâriwà co tàpé Iérusaléma! Guwà catàmwara tèpa péroféta na é cùrurà medariwà wà Pwiduée, ba guwà èi pàra tàpé goro atü, â guwà pòtàmwara pàra tàpé goro cè jè pai pwa wèe. Nye ciburà nümoo na go panaimariwà, pwacèwii jè nyaa kâra ja, na é panaimari nyi naîê, na aranara itooé. Êco na tàutàwà. 
 guwà côo, go o mwa pâra jiiwà, â o jèe ticia na ê Wâra pwapwicîri kàwà!  go ina tàwà pâ: O jèe câguwà caa côoô, tiagoro ê tòotù na guwà o ina pâ: Cidòri nyuâa pwi âboro na é me naa na nee Pwi Ukai!»