Luka.
17.
Na jè tòotù, â é ina tà tèpa *câmu kêe wà Iésu pâ: «O nye ciburà wâru pâ naigé mara èpà na o paari tâjè naa na gòropuu bèeni. Êco na ê tojii, âna é tatée pwi âboro na é popa pwi jè bée, naa na naigé bèepwiri!» 
«Gà ipwacôoco. Gà cibwaa pwa ma gùmagù ê cèikî kà pwi jè âboro kôo, na é pwacèwii ji pwi nari èpo. Ba ê wârimuru'gà, âna o dau maina jii na jè tòo naa goro nyagà cè pé atü cèna maina, ma jè tügà naa najawé! 
 gà têre, wiàna é pwa cèna èpà tâgà wà pwi a cèikî béegà, â gàu mara pitùra bwàti, â gà paari têe ê èpà kêe.  wiàna é pinünüma ma é biié, â gà pwanaurié. 
 wiàna é tà ciburà pwa na èpà tâgà, na diri pâ tòotù, â wiàna é biié ma picigòboo tâgà taaci, â gà pwanaurié taaci.» 
Na jè tòotù, â rà ina tà Iésu wà tèpa câmu kêe, pâ: «Gà naa tâbà cèikî na dau maina.» 
 é tòpi tàra pâ: «Wiàna ê cèikî kàwà, âna dau kîri pwacèwii ji nari murunyabu, â o pâri ma guwà ina târa ê upwâra bèeni pâ: “Càùgà ma câmigà naa nawià!” â o nye wàra!» 
É pacâmurirà mwara wà Iésu, â é ina tàra pâ: «Guwà jèe côo cai pwi ênawéna na é ûmwari aupwanapô, é, é wéaari macii. Wiàna é wâjué côwâ gée na aupwanapô, âna câé caa tâaboo wài naa goro taapà, ba na é mara ija, béaa kà pwi ukai kêe! 
Bwa! É pitòotéri wài ârabwée kêe, ba na é mara piênawéna kà pwi ukai. Â é pwabwàti ê utimuru kêe, â é tòpò têe naa goro taapà. 
 càcaa pâri ma é pwaolé têe wà pwi ukai, ba ê pwina é pwa, âna nye wakè kêe. 
«Ipaiwà naa goowà. Ba wiàna guwà pwa diri wakè na é naa tàwà wà Pwiduée, â wâdé na guwà ina têe pâ: “Bà tèpa ênawéna'gà na piticèmuru naa goobà. Â bà nye pwa co ê wakè na gà naa tâbà.”» 
É gére pâra gée napô Galilée dàra *Iérusaléma wà Iésu, â é tèepaa naa na ére na wâmwünyabweri ê napô *Samaria. 
 é pàgà naa na jè village. Ûna é tèepaa pâ, â pwa na rà pime mariê tèpa 10 âboro na rà pwa maga. 
Ûna rà bwaa wâiti jiié, â rà uu too ma ina pâ: «Pwi Ukai Iésu, gà meaaribà ma pwa ma tiàu maagé kâbà!» 
 é ucârirà wà Iésu, â é ina tàra pâ: «Guwà pâra nau ipaariwà tà tèpa pwa *ârapwaailò.» Ûna rà bwaa gére pâra, â nye tiàu kaa i pai maga kàra. 
 é côo wà pwi jè ârapàararà pâ, jèe tiàu i maga kêe.  é nye itàa wâjué me côwâ kaa, â é tomara naa na pai ipwàdée kêe, pâ: «Pwamaina Pwiduée!» 
 é tùu jùrué ma cigòboo na ara Iésu, ba na é pwaolé têe. Napwa naa goo wà pwi âboro bèepwiri, âna pwi âboro gée Samaria. 
 é ina têe wà Iésu pâ: «Ico pwini, wâpà tèpa 9 béegà? 
Gorodà na câguwà caa capai wâjué côwâ ma guwà pwamaina Pwiduée? Â wàco wâgà, na gà pwi a pârame! 
Gà cimadò, â gà pâra, ba gà jèe wâdé côwâ goo ê cèikî'gà.» 
Na jè tòotù â wà pàra tèpa *Farasaio, âna rà tawèeri Iésu pâ: «Wiidà cèna ée mwa tòpò ê Mwaciri kêe wà Pwiduée?» Â é tòpi tàra pâ: «Càcaa muru na guwà o côo goro âraporomeewà! Â o càcaa pâri ma guwà tà tapacîri ê câmu kêe, 
ba na guwà o pi-ina tàwà pâ: “É wâni” é, “É wâpwiri”. Ba ê *Mwaciri kà Pwiduée, âna é jèe wânabibiu kàwà!» 
Gée na càùé, â ûna rà tâa acari wà Iésu ma wà tèpa câmu kêe, â é ina tàra mwara pâ: «O mwa tèepaa ê pàara na o dau nümawà na guwà côo ê pai wâjué côwâ kôo, ma jè o piwâro naima, wiàna na ji caapwi tòotù. Êco na o càcaa pâri. 
 guwà ipwacôowà, ba pwiri rà o ina tàwà pâ, go tâa ni, é, go tâa na jè ére.  guwà cibwaa cèikî naa goorà, â guwà cibwaa pâra nau mudòo wê. 
Ba wiàna go tèepaa boome côwâ, wâgo *Pwina naîri âboro, â o ticè âboro cèna é cîdaée! Ba o pwacèwii ê âra na ée pwéelaa, na jè o côo pitiri gòropuu. 
Êco na, béaa kâra ê pwiibà, âna wâdé na go dau pwamaagé côo, â wâdé na rà tütâjiio wà tèpa âboro nabà. 
«Â go ina tàwà pâ: Rà o pò goro pai wâjué côwâ kôo wà tèpa âboro, pwacèwii tàpé na ia rà pò goro i jawé, na ia tùpwùtùru gòropuu, na pàara kà Noa. Ba rà nye tà pi-ija ma wâdo; â rà piéa, ma paéari ê pa èpo kàra. Â ticè cèna rà tâmogòori, tèepaa naa goro i tòotù, na é tò naa na i wànga kêe wà Noa. Â é nye tèepaa me kaa i jawé, â cau tubatiàurà diri wàco Noa ma ê tâa kêe na rà wâro. 
«Â ipaiwà mwara bau i pwi ia tèepaa naa *Sodoma na pàara kà Lota. Ba rà tà pi-ija ma wâdo, â rà pi-icu ma wâri, â rà pwa napô, ma ba wâ. 
 ticè cèna rà tâmogòori, tèepaa naa goro i tòotù, na é uru jii ê ville kàra wà Lota.  é nye tèepaa me kaa ê ânye ma dà na tòo, na é tûu naa gòrà gée napwéretòotù, pwacèwii ê popaa.  cau tubatiàurà diri. 
 o nye ipaiwà mwara, naa goo ê pai tèepaa me côwâ kôo, wâgo Pwina naîri âboro. Ba o tabapò wà tèpa âboro.» 
«Na pwi tòotù-bà, â wà pwina é nao gòroigé jii wâ, âna o càcaa pâri ma é tò naa na wâ, nau popa cè jè muru. Â wà pwina é wakè na ê na aupwanapô, âna o càcaa pâri ma é bwaa wâjué côwâ naa jaaé. 
 guwà niimiri ê pwina é tèepaa naa goo wâdà Lota, na ia é niâ wâjué côwâ. Ba ia tiàué ma wà tàpé Sodoma. 
«Ba wà pwina nümee na é wéaari ê wâro kêe, âna ée mwa tubatiàu. Â wà pwina é panuâ ê wâro kêe, âna wà pwiibà, âna ée udò â o tâa têe ê *âji wâro. 
Na go o mwa wâjué côwâ, â go mwa popa tèpa âboro kôo. Ba gée goo wà tupédu âboro cèna ru puu na caapwi naditàrawâ, âna o popa pwi jèpwi, â o naaco pwi jèpwi. 
 gée goo du ilàri cèna ru tòbiti blé naima, âna o popa tô jèpwi, â é tà tâa tô jèpwi. { 
«Â gée goo wà tupédu âboro cèna ru wakè na aupwanapô, âna o popa pwi jèpwi, â é tà tâa pwi jèpwi.}» 
Ûna rà têre ê popai bèepwiri wà tèpa câmu kêe, â rà tawèerié pâ: «Gona wiidà na o mwa tèepaa pwiri, co Pwi Ukai?» Â é tòpi tàra pâ: «Guwà tàcî, â guwà côo pâ câmu kêe. Ba pwacèwii na jè mu ina pâ: “Wâna é tâ tabéaa wê bwaooré, âna é wêe ê macii bà.”»