Ioane.
20.
Na pwapwicîri, na dàuru kâra *tòotù pwicîri kàra na bwaa gòropwaa, âna é pâra naa na auipwàni wà Maria gée Magdala. Â é côo i diopwaa kâra atü, bécamoori i pwêe, âna jèe pwùru tâjii. 
 é itàa wâjué côwâ, nau pâmari Simona Pétéru, ma wà pwi jè a *câmu na dau wânüma Iésu gooé.  é ina tàru pâ: «Rà jèe popa wà Pwi Ukai gée na auipwàni, â câbà caa tâmogòori cèna rà tòpòé naawê.» 
 ru pò ma pâra wà Pétéru ma pwi bée, â ru itàa naa na auipwàni.  é dau awài wà pwini jii wà Pétéru, â é mara tèepaa pâ. 
 câé caa tò, â é nye po cùué boo, â é niâ dò naadò wâ, â é côo ê pâ imwaano co na gére tâaboo naani napuu. 
Ûna é tèepaa pâ wà Simona Pétéru, â é nye tò kaa naadò wâ na auipwàni. Â é côo pâ imwaano na tàgére tâaboo naani napuu. 
Napwa naa goo ê imwaano bépii pûruê, âna càcaa pitànaima bau ê pâ imwaano-bà. É nye pwa-ité tâa naa na jè ére, na nye cùu bwàti. 
 ée mwa caa pwicò kà Pétéru wà pwi bée.  é côo, â é cèikî pâ wà Iésu, âna é jèe wâro côwâ gée na aubà. 
(Êco na càru caa pâji po tâmogòori bwàti ê pâ auina naa na *Tii Pwicîri, naa goro pai wâro côwâ kà Iésu.) 
Nabwé, â ru pâra côwâ wà tupéeni naa pwârawâ na ru pitâa na. 
Napwa naa goo wà Maria, âna é tà coo boo goo i pwâramara-atü, âna é nye tà i wê. Â é cùué boo, ba na é niâ dò naadò wâ. 
 é nye côo kaa du *angela, na ru coona ârabwée pwaa. Wà pwi jèpwi, âna é tâa na na ia tâa wê i pûru wà Iésu; â wà pwi jèpwi, âna é tâa na na ia tâa wê i du âê. 
 ru tawèerié pâ: «Tôoni, cina gà i?»  é ina tàru pâ: «Go imuru Pwi Ukai kôo, ba rà jèe popaé, â câgo caa tâmogòori cèna rà tòpòé naawê.» 
É ina pwiri, â é tabiié, â é côo wà Iésu na é tàgére coo wê, êco na câé caa côoinaê. 
 é ina têe pâ: «Tôobà, cina gà i? Gà mudà î?» Êco na é tà niimiri wà Maria pâ, wà pwiibà âna wà pwi âboro na é tòimiri i na upwâra.  é ina têe pâ: «Wiàna wâgà pwi a popa naii Pwi Ukai Iésu â gà paari tôo na gà tòpòé naawê, ba na go pâ nau popaé.» 
 é ina têe wà Iésu pâ: «Maria!»  é tabèreè wà Maria, â é nye côoinaê kaa, â é ina têe naa na pwâratùra *hébéru, pâ: «Au, Rabbouni!» (Pai ina wèe pâ ‘Pwi a pwa pupûra’.) 
 é ina têe wà Iésu pâ: «Gà cibwaa tu naa gooò, ba bwaa câgo caa too dari Caa.  gà pâra naa jaa tèpa béeò.  gà ina tàra pâ, go o jèe too dari Caa kôo, wà pwi Caa kàwà mwara; wà Pwiduée kôo, ma wà pwi Pwiduée kàwà mwara.» 
 é pâra wà Maria, â é pâdari tèpa câmu.  é ina tàra pâ: «Tàpéebà! Go jèe côo wà Pwi Ukai!»  é piwiâ tàra ê pwâra pitùra kàru. 
Na bàrane kâra pwi pwapwicîri-bà, âna rà pitànaima na jè pwârawâ wà tèpa câmu. Â rà kiiri ê pâ goropwârawâ, ba wâgotàra goo tèpa pitûâ kà tèpa *Juif. Â é nye tèepaa kaa naa nabibiu kàra wà Iésu. Â é ina tàra pâ: «Cidòri nyuâawà!» 
 é paari tàra du na-araraîê ma ê jènereê.  rà nye dau ipwàdée kaa na rà côo wà Pwi Ukai. 
 é jèu ina tàra pâ: «Cidòri nyuâawà! É cùruo me wà Caa naa na gòropuu; â nabàni, âna go cùruwà pwacèwii pai pwa kêe tôo.» 
 é upirà, ma ina tàra pâ: «Guwà tòpi ê Nyuâaê Pwicîri! 
Wiàna guwà pwanauri ê pâ èpà kâra ê pâ âboro, â é pwanaurirà wà Pwiduée. Â wiàna câguwà caa pwanaurirà, â ê pâ èpà kàra âna o nye tà tâa.» 
Napwa naa goo wà Toma (pwi ârapàara tèpa 12 a câmu, jè nee mwara ‘Bérepidu’), âna tà tiàué jaarà na ê pwi tòotù na é tèepaa marirà wà Iésu. 
 rà mwa tà ina têe wà pàra tèpa câmu pâ: «É cipàparibà wà Pwi Ukai.» Êco na é tòpi tàra pâ: «Auwa! Pwacoé na go cèikî pâ é wâro côwâ! Wâdé co wiàna go côo ê auru paò goro du na-araraîê.  wiàna go tùu gée goo ê mangadaîô naa na ê auru paò, ma tòpò mwara ê na-araraîô naa goo i jènereê!» 
Gée na càùru caapwi nadàpàra pwapwicîri, â rà pitànaima mwara wà tèpa câmu naa na i wâ, â jèe wàilà ma Toma. Â rà kiiri ê pâ goropwârawâ, êco na é tèepaa marirà wà Iésu. Â é coo nabibiu kàra, â é ina tàra pâ: «Cidòri nyuâawà!» 
 é ina tà Toma pâ: «Gà côo i du na-araraîô.  gà tòpò i mangadaîgà naa na.  gà pame i na-araraîgà, â gà tòpò naa goo i jènereô.  gà cibwaa pidumapiê, â gà cèikî!» 
 é tòpi têe wà Toma pâ: «Pwi Ukai kôo ma Pwiduée kôo!» 
 é ina têe wà Iésu pâ: «Gà mwa cèikî ba gà côoô. Cidòri nyuâa tèpa âboro na rà cèikî, na càra caa côoô.» 
Dau wâru ê pâ *câmu kâra pàtàma Pwiduée na é pwa wà Iésu, na ara tèpa câmu kêe. Càcaa wii diri naa na ê tii bèeni. 
Êco na ê pâ popai bèeni gére wii, âna wii, ba na guwà cèikî pâ, wà Iésu âna é pwi *Mesia, *Pwina naî Pwiduée. Â wiàna guwà cèikî naa gooé, â o tà tàwà ê *âji wâro na wâgooé.