Roma.
12.
Tèpa béeò naa na nee Kériso, é dau meaarijè wà Pwiduée, â é pwa pâ pwina wâdé ba kâjè. Gée goo pwiri, â go ilari jiiwà, gée na âji pwâranümoo, pâ, guwà pipanuâwà bamwara têe, ba na guwà pwacèwii ê *ârapwaailò na wâro, na dau wâdé têe. Â wàé kaa pwiri ê âji pwapwicîri, na pâri ma guwà naa têe. 
Guwà cibwaa ipwacèwii tèpa âboro gòropuu. Â guwà panuâwà tà Pwiduée, ba na é tòotéri ê pwâranümawà, ma ê auniimiri kàwà, ma ê càrawà. Êpwiri, âna guwà o tâmogòori ê câbawâdé kêe, na pâri ma guwà pwa—na âjupâra, ma wâdé, ma tâbawêe. 
Napwa naa gooò, âna é naa tôo, naa goro piticèmuru naa goo, ê pâ wâdé kêe, wà Pwiduée, ûna é pitòrigario, ba na go pwi *apostolo kêe. Êkaa na, o pâri ma go jèpa ina tàwà jècaa, pâ: Gà cibwaa niimiri pâ pwamuru naa googà. Bwa, gà ipakîrigà, â gà pinünüma bwàti. Â gà pitèigà bwàti, wiâra ê pai cèikî, na é naa tâgà wà Pwiduée. 
Gà côo, wâna naiijè, âna wâru ê pâ na ére. Â ê jèpa ére bèepwiri, âna nye jèpa pi-ité wakè kàra. 
 wàrapwiri naa goojè, wàijè na jè wâru. Ba caapwi naiijè, na jèe caapwi ma wà Kériso.  jèpa pwa ê jèpa wakè kâjè. 
Ba wà Pwiduée, âna é jèpa naa tâjè ê jèpa âraimeai, ba na jè piênawéna kêe. Êkaa na wiàna é naa tâgà ê wakè goro *péroféta, â wâdé na gà pwi a pa popai kêe, wiâra ê câmu goo cèikî'gà. 
 wiàna é naa tâgà, ma gà pwi a pitu tà pàra tàpé, â wâdé na gà pitu tàra.  wiàna é naa tâgà, ma gà pwi a pacâmuri, â gà pacâmuri. 
 wiàna gà pwi a pagòo pàra tàpé, â gà pagòorà.  wiàna gà pwi a-imeai, â gà naa, â gà cibwaa câmuri.  wiàna gà pwi a-ipopa ba, â gà pwa, gée na âji pwâranümagà.  wiàna gà pwi a pwa na wâdé ba kà pàra tàpé ma pitu tàra, â gà pwa naa na ipwàdée. 
Napwa ê pimeaari kàwà, âna wâdé na âji pimeaari. Guwà cibwaa gòmapwa. Â wâdé na guwà èpàri ma miiri diri ê pwina èpà, â guwà ciburà tâa goo ê pwina wâdé. 
 guwà pimeaariwà, goro ê âji pwâranümawà, ba guwà tèpa aéjii, naa na nee Kériso.  guwà pipapwicîriwà. 
Guwà cibwaa pwaora, na guwà piênawéna kà Pwi Ukai. Â guwà tà tàcî, â guwà wakè ba kêe, gée na diri ê nii kàwà ma pwâranümawà. 
Guwà ipwàdée, gée goo cèikî kàwà, naa goo ê pwina é pwa, ba kàwà, wà Pwiduée. Â wiàna é tèepaa mariwà ê aré, â guwà pidàpwicâariwà, â guwà ciburà pwapwicîri. 
 wiàna wà tèpa cèikî béewà, âna ticè tàra cè jè muru, â guwà naa tàra.  guwà tòpi bwàti, tàpé na rà me mariwà. 
Napwa naa goo wà tàpé na rà pwa tàwà na èpà, â guwà ilari jii Pwiduée pâ, na é *pwényunyuâarirà. Üu, guwà ilari ê aupwényunyuâari kêe, â guwà cibwaa tojiirà. 
Guwà ipwàdée, ma wà tàpé na rà ipwàdée, â guwà i, ma tàpé na rà i. 
Guwà cibwaa pinadàrù tèpa âboro. Â guwà pwa ma caapwi, ê pai meaarirà kàwà, pwacèwii na, cau tèpa âboro na pwamuru naa goorà. Â guwà cibwaa ipwamainawà. Â guwà cibwaa niimiri pâ, guwà tèpa dau tâmogòorimuru. 
Wiàna pâri, â guwà mudàra, ma guwà wâro na pinaanapô, ma wàilà diri. Â guwà mudàra, ma guwà pwa ê pwina wâdé, na ara diri pâ âboro. Tèpa âji béeò, guwà cibwaa pitôowâri tà pàra tàpé. Wiàna rà pwa tàwà na èpà, â guwà cibwaa pawâjuépiri tàra côwâ ê èpà na rà pwa tàwà. Â guwà panuâ tà Pwiduée ê pwiibà, ba wàé, na ée mwa tèi, ma pwa wârimuru tàra. Ba é ina wà Pwi Ukai, naa na *Tii Pwicîri pâ: Nye wâgo co, na go o mwa pitôowâri, tà tàpé na rà pwa na èpà. Â wâgo co, na go nye jèpa naa tàra pumara ê tûâ kàra. Deutéronome 32.35 
 jèe wii mwara naa na ê jè ére na Tii Pwicîri pâ: Wiàna é copwa wà pwi a pièpàrigà, â gà naa cè èe. Na nümee na é wâdo, â gà naa cè wâdooé.  ê pai kamu kêe âna o dàuru ânye tòo, na tâa gòro pûruê. Proverbes 25.21–22  wâguwà, âna wâdé na guwà pwa ê pwiibà. 
 guwà cibwaa nama piêdò ê èpà.  wâdé na guwà piêdò jii ê èpà, goro ê pwina wâdé.