2 Korénito.
13.
Wâna béwailu caiwà kôo, âna ia go nye ina tàwà pâ, guwà ipwacôoco. Ba wà pàra ârapàarawà, âna rà pwa pwina càcaa wâdé. Â nabàni, na go bwaa wâiti jiiwà na, âna go ina tàwà mwara pâ, guwà ipwacôoco. Ba go o jèe wacié tèepaa dariwà. Â jèe wii pâ: Wiàna pitòti pwi jèpwi goro ê èpà, â o càcaa pâri ma caapwi co pwi a *paâjupâra wèe. Â nye wâdé wiàna ârailu ma âracié. Â go o péa tà dau gòo naa goowà, na go tèepaa dariwà. 
Guwà mudàra na go paari tàwà pâ, go tùra naa na nee Kériso? Go o mwa paari tàwà bwàti pâ é dau pwi a pwa nii kêe, â dau pwi a pwa pàtàmee târa ma é wakè gooò naa jaawà. 
Na ia é bà naa goro *satauro, naa na naiiri âboro, â ticè nii kêe. Êco na é nye wâro côwâ gée na aubà, goro ê pàtàma Pwiduée. Â wâgo mwara, âna ticè nii kôo naa naiiri âboro, êco na go tâa goo Kériso, â go piwâro naima ma wàé. Â tâa gooò ê pàtàma Pwiduée gée gooé. Â guwà o mwa côo ê pwiibà. 
Guwà jèe pinünüma cai, wiàna ê wâro kàwà, âna *âji wâro kà tèpa cèikî naa goo Kériso. Â wiàna guwà pâmari pâ, câé caa tâa jaawà wà Kériso, â guwà jèe nye pitanami! 
 go wâari pâ, guwà tâmogòori pâ, wâgo, âna é jèe pitèio Pwiduée, â dau wâdé têe wâgo â câgo caa pitanami. 
 go pwapwicîri tà Pwiduée ba kàwà, ba na guwà nabwé na guwà pwa na èpà.  càcaa târa ma go paari pâ, câgo caa pitanami goro ê wakè kôo naa jaawà. Ba wâdé tôo co, na guwà pwa na wâdé.  ticèmuru naa goo, wiàna rà pitèi pàra tàpé pâ, èpà wakè kôo. 
Ba go pwi ênawéna kâra ê popai na âjupâra. Â go nye wakè co, ba na é imaina pâ ê wakè. Â càcaa pâri ma go pacooé. 
 go ipwàdée, goro pai ticè nii kôo, wiàna guwà gòo.  go pwapwicîri, ba na o wâdé côwâ ê pwâranümawà na ara Pwiduée. 
Wàépwiri ê majoroé ma go wii ê tii bèeni, na go bwaa wâiti. Ba tàutôo na go tùra ba gòo, wiàna go tâa jaawà. Ba wà Pwi Ukai, âna é jèe naa pitûâ tôo, ba na go pagòowà, â nye càcaa târa ma go tubaèpà tàwà. 
Go tubanabwé naani, co tèpa cèikî béeò, â go ina tàwà pâ: Guwà ipwàdée! Guwà biiwà gée na pâ èpà kàwà. Â guwà ipagòowà naima. Â wâdé na caapwi ê pwâranümawà. Wâro na pinaanapô, â ée mwa wâjaawà, wà Pwiduée, pwi a meaarijè, ma pwi a naa pinaanapô. 
Guwà pipwabwàcu, wàra pai pwa kà diri tèpa âji a cèikî béejè. Wà diri tèpa cèikî ni, âna rà naa bwàcu kàwà. 
Wâdé na é *pwényunyuâariwà wà Pwi Ukai Iésu Kériso, goro ê *pimeaari imudi kêe. Wâdé na tâa tàwà diri ê pimeaari kà Pwiduée. Wâdé na é caajuriwà ê Nyuâaê Pwicîri! Cidòri nyuâawà!