Hébéru.
2.
Gée goo pwiri, â wâdé na jè pâra bwàti wiâra ê popai na jè têre. Ba péa jè tà pâiti jii. 
Ba napwa naa goo ê *Naèà kà Moosé, âna é nama rà pwa wârimuru wà diri tàpé, na càra caa pâra wiâra bwàti. 
Êco na wà Pwiduée, âna é jèe naa tâjè ê naigé, ba na jè udò; pwi naigé na dau maina ma pwényuâa jii ê naèà! Â jè o wànau târa cè pai uru kâjè jii ê wârimuru, wiàna câjè caa câbaâjupâraê?! Ba nye wà Pwi Ukai Iésu kaa, na ia é mara inapàpari tâjè ê naigé bèepwiri. Â wà tàpé na rà têreê, âna rà jèe *paâjupâraê tâjè. 
 wà mwara Pwiduée, âna é paâjupâraê, goro pâ *câmu kâra pàtàmee—muru na rà pò goo wà tèpa âboro.  é jèpa naa pâ âraimeai, na é naigé mee ê *Nyuâaê Pwicîri, wiâra câbawâdé kêe. 
Go gére patùrawà goro ê Mwaciri na o mwa tèepaa. Â o càcaa tèpa *angela, na ée mwa nama rà pitûâ naawê, wà Pwiduée. 
Ba é ina têe wà pwi jè âboro, na jè ére gée goo ê *Tii Pwicîri pâ: Wàilàapà wà pwi âboro, na gà o niimiriê, co Pwiduée? Gorodà na piâranümagà wàé, wà *Pwina naîri âboro? 
Gà pakîriê boo jii tèpa angela na ji pàara, na càcaa gòiri. Gà naa têe korona— bwe kâra ukai. Gà nama pwamainaê. 
Gà nama é pitûâ naa gòro diri pâ muru! Psaume 8.5–7 Ba nye ticè jè muru, cèna o tâa gòroigé jii ê pitûâ kêe. Êco na nabàni, âna jè côo bwàti pâ, càcaa pâji coo diri ê popai bèepwiri. 
 jè côo mwara pâ, jèe pakîri wà Iésu, na ji pàara, na arana tèpa angela. Ba é pwamaagé côo, â é bà ba kâjè diri tèpa âboro, gée goro ê *pimeaari imudi kà Pwiduée.  gée goo ê pwina é pwa wà Iésu, â jèe naa têe korona—bwe kâra ukai.  jè côo pâ ipwamainaê, pwacèwii ê popai bèepwiri naa na Tii Pwicîri. 
Wà Pwiduée, âna é tòpò ba kêe diri pâ muru, â é tàgére wéaa goorà. Pwa pàra tèpa naî Pwiduée mwara, na rà dau wâru, âna wàijè kaa. Â wâdé têe, na é nama jè cau tâa na ê pai maina ma muugère kêe. Pinaigé mara ê pwiibà, ê pai maagé côo kà Iésu ma pai bà kêe. Â gée goo kaa pwiri, â wà Pwiduée, âna é naa tà Iésu ê autâa na tâbawêe, na pâriê. Ba wà Iésu, âna é pwi ukai, na é pa-udò diri tèpa naî Pwiduée, ma pwi a poparà pâ, naa na *âji wâro. 
Üu, nye wà Iésu kaa, na é pwina é popajè tèpa âboro kêe, pâdari wà Pwiduée, pwi caa kêe ba na o caapwi caa kâjè diri, wàijè ma wàé. Â gée goo kaa pwiri, âna câé caa kamu, na é ina goojè pâ jè tèpa aéjii kêe. 
Ba wàé na ia é jèe ina tà Pwiduée pâ: Go mwa pwamaina neegà tà tèpa aéjii kôo. Go mwa câdirigà na rà pitapitirirà. Psaume 22.23 
 é ina têe mwara pâ: Wâgo mwara, âna go mwa cèikî naa googà.  jèpwi mwara: Wâgo ni, ma wà tàpé na é naarà tôo wà Pwiduée, wàibà diri tèpa naîê. Ésaïe 8.18 
Wàijè tèpa naî Pwiduée, âna jè cau tâa tâjè diri, ê naiiri âboro na o mwa bà. Â é pa naiiri âboro wà Iésu, ba na é pwacèwiijè. Â é jèe bà ba kâjè, ba na tapàgà ê pàtàma *Caatana, wà pwina é nama jè bà. 
Â, na wàrapwiri, â é tipijè jii ê pai wâgotâjè goro ê pwâra bà, na ia piijè béaa, diri tòotù. 
Jè tâmogòori bwàti pâ, câé caa me wà Iésu, ba na é pitu tà tèpa angela. É nye me nau pitu tà tèpa gòobàra *Abéraama. 
 é ipwacèwiijè, tèpa aéjii kêe, naa na diri pai pwa goo. Ba wiàna càcaa wàrapwiri, â pwiri càcaa pâri ma é pwi a-ipa popai nabibiu kâjè ma wà Pwiduée.  é jèe pwi a pwa ârapwaailò maina kâjè, na é pitêre dà Pwiduée, naa na pai piênawéna kêe têe.  é pwi a meaarijè, wàijè na ticè nii kâjè.  é tòpò ê *ârapwaailò, târa pwanauri ê pâ èpà kâjè. 
 nye pâri ma é pitu tâjè, wiàna tèepaa marijè ê tacai. Ba é tâmogòori ê tacai, ma ê maagé côo.