1 Pétéru.
3.
Napwa naa goowà co ipâê, âna guwà ipakîriwà naa goo tèpa éawà. Â ipaiwà wiàna pwi éagà, âna câé caa pwi a cèikî. Ba wiàna gà wàrapwiri, â jèe câgà caa ina têe cè popai, ba é jèe po cèikî gée goo ê tûâ'gà. 
Gà cibwaa coona ârabwée na po dau maina wâri wèe, â gà cibwaa po dau tòpò pâ mwani mii ma perle, ba na gà pipaarigà. Ba ê pai pwa ârabwée'gà, ma pai pwa wèe pûrugà, ma pai tòpò mwani mii, âna muru naa naiiri âboro co, â càcaa âjimuru. 
Ba ê âji pwényuâa'gà, âna ê moo ma pitòimiri ma pinaanapô na tâa na pwâranümagà. Wàépwiri ârabwée na o càcaa wai; pwi aamwari na dau wâdé tà Pwiduée. 
Ba rà wàrapwiri pa ilàri, na rà cèikî naa goo wà Pwiduée naa pàara biu, â rà piaabòrirà. Ba rà ipakîrirà naa goo tèpa éarà, 
pwacèwii wà Sara, na é pitêre dà wà *Abéraama, â é ina gooé pâ ‘pwi ukai’. Â gà o tô èpo kêe, wiàna gà pwa ê pwina wâdé, â gà cibwaa nama wâgotâgà na gà ipakîrigà na ara pwi éagà. 
Ipaiwà naa goowà, wâguwà tèpa paao. Wiàna gà piéa, â wâdé na gà wéaari tô wâdàgà, â gà moo naa gooé, ba pwa nii'gà jiié. Â gà dau papwicîriê mwara, ba wà Pwiduée, âna é jèe naa têe ê *âji wâro, pwacèwii na é jèe naa tâgà. Ba wiàna gà wàrapwiri, â ée têre ê pwâra pwapwicîri'gà wà Pwiduée. 
Wâdé na caapwi pwâranümawà, wâguwà diri tèpa cèikî naa goo Iésu. Guwà dau pimeaariwà jècaa gée na pwâranüma na moo, â guwà dau pitu tàwà, ba guwà tèpa aéjii naa na nee Kériso. Â guwà jèpa ipakîriwà. 
Wiàna rà pwa tàwà ê pwina èpà wà pàra tàpé, â guwà cibwaa pawâjuépiri tàra côwâ. Â wiàna rà tànyiriwà, â guwà *pwényunyuâarirà, ba é jèe todàwà wà Pwiduée, ba na guwà wàrapwiri. Ba wiàna guwà pwa, â ée mwa dau pwényunyuâariwà. 
Ba jèe wii naa na *Tii Pwicîri pâ: Cidòri nyuâagà wiàna gà naaco èpà. Gà mwa ipwàdée wiàna gà pwa na *tàrù. Gà naaco picocoo: Gà tétâjii pwina pwâ! 
Gà coo jii tûâ na èpà! Gà pâra na âjupâra: Gà mudàra pinaanapô; gà pa pâdari pàra tàpé. 
É wéaari tàpé na rà tàrù, wà Pwi Ukai Pwiduée. É têrerà na rà to. É pipaa dà tàpé na rà èpà! Psaume 34.13–17 
Wiàna gà pwa na wâdé, â pwâco tàpé na rà o tubaèpà tâgà. 
Êco na, wiàna gà tâa na aré, gée goo pâ tûâ'gà na tàrù, â o cidòri nyuâagà! Êkaa na: Gà cibwaa nama wâgotâgà, goro pai pwa tâgà na èpà na me gée goro âboro. Gà cibwaa pidumapiê! Ésaïe 8.12 
Bwa, gà papwicîri Kériso naa na pwâranümagà. Â gà tà ciburà wéaa, ba na o pwa cè pai tòpi'gà tà tèpa âboro, na rà tawèerigà goo ê cèikî'gà. 
 wâdé na gà tòpi tàra goro ipapwicîri ma moo. Gà ipwacôoco ê càragà, ba na o câé caa pitòtigà ê *pwâratùra-nigée-googà.  o wâdé ê wâro'gà gée goo na gà pwi âboro kà Kériso.  wà tàpé na rà pinabaèpàgà, âna rà o dau kamu, gée goo na ê pâ tûâ'gà, âna po cau wâdé diri naa na diri pâ ére. 
Wiàna gà tâa na aré, â dau wâdé wiàna nye gée goo ê càragà na wâdé, wiâra ê câbawâdé kà Pwiduée. Â càcaa wâdé wiàna gée goo pâ tûâ'gà na èpà! 
É wacaapwi bà wà Iésu Kériso, bépwanauri èpà. É maagé côo, wà Pwina é tàrù; É maagé bà ba kâjè tèpa âboro, na câjè caa tàrù. É popajè pâ, dari wà Pwiduée. Jèe tétàmwereê na naiiri âboro, naani gòropuu. Pawâroé côwâ, naa na naiiri âboro na bwaa âmuê na o câé mwa caa bà! 
Gée na càùru pai bà kêe â é pâra wà Kériso, ba na é pwa pupûra tà tàpé na rà bà na rà pwa karapuu naa na autâa kà tèpa bà. 
Wà tàpéebà, âna jèe càra caa pitêre dà wà Pwiduée napwiri, na pàara kà Noa, na é iti i wànga kêe. É dau pidàpwicâariê wà Pwiduée naa goorà êco na càra caa biirà dèe. Â nye 8 âboro co na uparà jii i jèpé gòro wànga. 
Ê jawé bèepwiri, âna ucina goro ê *piupwaa kâjè nabàni, na é pinaigé mara ê pai upajè. Na *upwaajè, â càcaa ba na jè nuwa tâjii ê tòri kâra ê naiiri âboro! Nye câmu kâra pai nuwa tâjii ê pâ èpà gée na pwâranümajè. Câmu mwara kâra *auipwataâboro na jè pwa tà Pwiduée pâ, na jè o tèpa âboro kêe. É upajè wà Pwiduée, gée goo pai bà ma wâro côwâ kà Kériso gée na aubà. 
 é jèe too naa *napwéretòotù, â é tâa gòro étò kà Pwiduée ba na o pwamainaê.  pwa tàrù kêe ma pàtàmee, naa goo diri pâ *angela, ma pâ duée, ma pâ pitûâ ma pâ pàtàma.