1 Pétéru.
5.
Go pwa pupûra tàwà ni, wâguwà tèpa pitûâ kâra wâra pwapwicîri. Ba wâgo mwara pwi jè ijiao pwacèwiiwà, na go inapàpari ê pai maagé côo ma pai bà kà Kériso. Â o tâa tâjè ma wâguwà ê câmajè. Ba jè o mwa tâa na pai maina ma muugère kêe, na tòotù na ée mwa paarié wà Pwiduée. Â go ilari jiiwà, pâ, 
guwà tòimiri tèpa âboro na é naa tàwà wà Pwiduée. Ba rà tèpa mutô kêe, â é nama guwà tèpa wéaarirà. Â pârawà ma guwà naa èrà ma tòimirirà. Êkaa na guwà wàrapwiri gée na âji pwâranüma, â càcaa pwacèwii tàpé na mwa po tacoo goorà, ba na rà pwa. Guwà pwa, gée goo ê pimeaari kàwà, â guwà cibwaa bu mwani goo. 
Guwà cibwaa naa naèà tà tèpa âboro kàwà. Â guwà paari tàra co ê pâ càrawà na wâdé. Â rà o pâra wiâwà ma ipwacèwiiwà. 
Ba wiàna guwà wàrapwiri, â o tâa tàwà ê bwe korona—ê câmawà na dau pwényuâa—na tòotù na ée mwa wâjué côwâ wà Iésu Pwi Ukai kà tèpa wéaari mutô. Ê câmawà bèepwiri, âna ê pai tâa kàwà jaaé, naa na pai maina ma muugère kêe, na o tâa dàra gòiri awé. 
Wàéni popai kôo tàwà diri: Guwà ipakîriwà na ara tèpa pitûâ naa na cèikî. Â guwà cau piênawéna kàwà jècaa naa na ipakîri. Ba jèe wii naa na *Tii Pwicîri pâ: Pwiduée, âna é cicara tèpa ipwamainarà. É naa pimeaari tà tèpa ipakîrirà. Proverbes 3.34 
Êkaa na guwà ipakîriwà, na aranara ê pàtàma Pwiduée na dau maina awé. Â ée mwa ipwamainawà na tòotù na é pitòrigari. 
 guwà panuâ têe diri ê pâ tòina kàwà, ba é tòimiriwà. 
Guwà tà tàcî, â guwà tà pitòimiriwà. Ba wà pwi a pièpàriwà, wà *Caatana, âna é nye tàgére biié goowà, pwacèwii ê liô na é imudàra cè âboro cèna é utié. 
Guwà cicaraé, â guwà tà cimwü naa na cèikî kàwà! Â guwà cibwaa niimiri pâ guwà maagé côo acari. Ba rà wàrapwiri wà diri tèpa cèikî béewà, pitiri naa gòropuu. 
 guwà maagé côo naa na ji pàara na càcaa gòiri. Êco na wà Pwiduée, âna é jèe todàwà, goo wà Iésu Kériso, ba na guwà mwa tâa ma wàilu, naa na pai maina ma muugère kàru, dàra gòiri awé. É wàrapwiri gée goo ê *pimeaari imudi kêe ba kàwà.  gée na càùru ji pàara na ûgé na guwà maagé côo na, â ée mwa nama guwà wâdé côwâ.  ée mwa pagòowà, ma nama guwà cimwü, ma pacimawà dàra gòiri. 
Ba tâa jaaé ê pàtàmee na ticè pwâadèreè, dàra gòiri awé! Wâdé na wàra! Amen! 
Go jèe wii tàwà ê ji nari tii bèeni, ba na go pagòowà, ma taniimiri tàwà pâ, tâa jaawà ê pimeaari imudi kà Pwiduée. Wâdé na guwà tà cimwü na! É tâa jaao wà Silas, â é pitu tôo na go wii ê tii bèeni. É pwi âji béeò na é *tàrù, â go dau cèikî naa gooé. 
Rà naa bwàcu kàwà tèpa cèikî béewà géeni na ville ‘*Babulona’. Ba wà Pwiduée, âna é todàra, ba na tèpa âboro kêe, pwacèwiiwà. Â é naa bwàcu kàwà mwara wà Maréko, pwina naîô naa na nee Kériso. 
Wâdé na guwà pipwabwàcu tàwà naa na pimeaari, naa na nee Kériso. Wâdé na cau tâa jaawà ê pinaanapô, wâguwà tèpa âboro kà Kériso! Cidòri nyuâawà!