Auinapàpari.
4.
Gée na càùru ê pâ muru bèepwiri, â go côo naa na nyuâa, wâgo Ioane ê goropwârawâ napwéretòotù, na tàpirié. Â go têre mwara i pwâratùra, na é pwacèwii ê airi tutu. Â é ina tôo pâ: «Gà toome naani, ba na go paari tâgà ê pâ muru na o tàpo tèepaa.» 
 é popao ê Nyuâaê Pwicîri, â go côo ê autâa, nidò *napwéretòotù, na é gére tâa gò wà Pwi Ukai. 
 é po dau jajau na pai muugère kêe, â é pwâra pwacèwii jè atü na bwùucùru ma mii, na dau maina wâri wèe.  é tâbèepi autâa ê ubà, na é pwâra pwacèwii ê atü émeraude. 
Wâbèepi autâa kà Pwi Ukai, âna go côo pàra autâa na po 24. Â rà tâa gò tèpa âboro pwanümarà na rà po 24. Â rà coona pâ ârabwée na pwaa, â rà bweri ê bwe korona mwani mii. 
 go côo pâ âra kâra tikakara, na pâra gée goo i autâa kà Pwi Ukai, â go têre ê pwâra kûu kêe.  wâbéaa kâra autâa kêe, âna rà tâa wê ê pâ 7 uèù na tà udàrù.  wàilà pwiri câmu goro ê Nyuâaê Pwicîri kà Pwiduée, na é pwacèwii 7 nyuâaê naa na pai tâbawêe kêe. 
Go côo naawê mwara, pé nawià, na dau pwéelaa awé. Go côo pâ macii na pwa nyuâarà, na rà po 4, tèpa pwamaina Pwiduée. Â dau wâru pâ âraporomeerà. Ba rà tâa ararà, ma wâ pwâgùrurà, â tàpitiri ê naiirà. 
 wà pwi jèpwi, âna wàra munaa liô, â wà pwi jèpwi, âna wàra munaa pwi nari paaci, â wà pwi jèpwi, âna é pa naporomara âboro, â wà pwi jèpwi, âna é pwacèwii ê marü bwaamata na é gére tâdòiti. 
 jèpa pwa 6 itoorà.  pwa âraporomeerà pitiri goorà.  rà nye tà nyabi, naa ne ma pwaa, ma ina pâ: «É pwicîri! É pwicîri! É pwicîri wà Pwi Ukai, ba wàé Pwiduée, na é patàrù diri. Dau pwa nii kêe, naa gòro diri pâ muru. Ba wàé nabà, â wàé napwiri, â é gére me côwâ!» 
 rà nye tà cagòtù, ma pwamaina, ma pwaolé tà Pwi Ukai, na é tâa gò ê autâa kêe, wà Pwina é *wâro dàra gòiri awé. 
Â, na diri pâ pàara na rà pwamainaê na, â wà i tèpa 24 âboro pwanümarà, âna wàilà mwara, âna rà cigòboo, ma tùu jùrurà araé. Â rà pwamaina wà Pwina é wâro dàra gòiri awé. Â rà tapwùtù i pâ bwe korona kàra na araé, â rà ina têe pâ: 
«Wâgà Pwi Ukai, wà Pwiduée kâbà, âna wâgà, na pâri ma ipwamainagà, ma cagòtùgà. Gà dau pwényuâa; Dau pwa pàtàmagà, naa gòro diri pâ muru. Wâgà na gà tapoo diri ê pâ muru. Wâgà na gà pacoo, gée goro ê câbawâdé'gà. Nabwé!»