Auinapàpari.
7.
Gée na càùru pwiri, â go côo naa na nyuâa pâ *angela na rà po 4. Â rà coo na pâ ârapàpé ére gée goo gòropuu. Â rà cipa ê pâ pwéretòotù na maina târa gòropuu—ê wài, ma dàapà, ma dàré, ma pwéretòotù gòro jaa. Rà cipa, ba na càcaa pòu naa gòropuu, ma wâ nawià, ma càcaa pònoori pâ upwâra. 
 go côo pwi jè angela, na é toome, gée na autoo kâra tòotù, âna é tà pa ê iri câmu kà Pwiduée, wà Pwina é wâro.  é tomara too tà pàra tèpa ârapàpé angela, na naa tàra ê pàtàmee, ba na rà tubaèpà ê gòropuu, ma najawé.  é ina tàra pâ: 
«Guwà tàpo coo! Guwà cibwaa pâji tubaèpà ê gòropuu, ma najawé, ma ê pâ upwâra! Ba bà o bwaa mara tòpò béaa cè câmu naa gaadaa tèpa ênawéna kà Pwiduée kâjè.» 
 go têre ê jéûru tàpé na rà tòpi ê câmu kà Pwiduée. Ba po 144 000 âboro gée na diri ê wâao gée goro Ba *Isaraéla: 
Po 12 000 gée na wâao kà *Juda; 12 000 gée na wâao kà Ruben; 12 000 gée na wâao kà Gad; 
12 000 gée na wâao kà Asser; 12 000 gée na wâao kà Neftali; 12 000 gée na wâao kà Manassé; 
12 000 gée na wâao kà Siméon; 12 000 gée na wâao kà Lévi; 12 000 gée na wâao kà Issakar; 
12 000 gée na wâao kà Zabulon; 12 000 gée na wâao kà Ioséfa; 12 000 gée na wâao kà *Benjamin. Wàilà, âna rà po cau tòpi diri ê câmu kà Pwiduée. 
Gée na càùru ê pâ pwi bèepwiri, â go ucâri, â go côo ê pâ âboro na rà dau wâru, na càcaa pâri ma pûrarà. Ba rà me gée na diri pâ Ba, ma wâao, ma napô, ma pwâratùra naa gòropuu. Â rà cau coo ara ê autâa kà Pwi Ukai, ma i *Pwi nari mutô. Â rà cau coona ârabwée pwaa diri, â rà cau cipa naa na îrà, ê doro nu cè. 
 rà cau tomara too pâ: «Gàu jèe pa-udòbà, wâgà Pwi Ukai Pwiduée kâbà, na gà tâa gò autâa'gà, ma wâgà, Pwi nari mutô.» 
 rà cau cibèepi ê autâa bèepwiri—wâgée me côwâ wà tèpa angela, â pâ wê wà tèpa ijiao, â mwa wà tèpa ârapàpé macii naa goro jènere autâa.  rà cau cigòboo ma tùu jùrurà, na ara ê autâa, ma pwamaina Pwiduée. 
 rà ina pâ: «Amen! Wâdé na wàra! Pwamaina Pwiduée kâjè! Olé ba maina têe! Ba tà têe pàtàmee, autâmogòori kêe, nii ma muugère kêe! Pâri ma cagòtùé! Wâdé na wàra! Amen!» 
Nabwé, â é tabiié naa gooò i pwi jè ijiao, â é tawèerio pâ: «Gà tâmogòori pâ wàilàapà pâ âboro bèepwiri, na rà coona pâ ârabwée pwaa? Gà tâmogòori na rà me géewê?» 
 go tòpi têe pâ: «Gà ina tôo co pwi ukai, ba wâgà co na tâmogòori.»  é ina tôo pâ: «Wàilà pwiri tèpa me gée na aré ma tòina na dau maina.  rà nuwa ê ârabwée kàra, ma pwaa, goro ê domii kà Pwi nari mutô.» 
«Â rà coo ara Pwiduée, na é tâa gò autâa kêe. Rà piênawéna kêe. Â rà pwamainaê, naa ne ma pwaa naa na wâra pwapwicîri kêe. Â é wâjaarà, ma wéaarirà. 
O càra caa copwa côwâ. O pwa jawé kàra, naa diri pâ pàara. O càcaa cîrirà ê tòotù, ba o tà pwa curuu kàra. 
É ipièrù wâgoorà i Pwi nari mutô, na é coo ara i autâa. É poparà pâ naa goo pwârajawé pò, ba jawé târa wâro. O ticè nüru i kàra. Ba wà Pwiduée Caa, na é câtùra diri.»