Auinapàpari.
14.
Gée na càùé, â go côo mwara, naa na nyuâa, pâ pàra muru na o mwa tèepaa: Ba go côo i *Pwi nari mutô, na é cima wâgòro jaa *Siona. Â rà gére tâa jaaé 144 000 âboro—wàilà diri na jèe wii na gaadaarà ê nee, ma nee Caa kêe. 
 go têre ê jè pwâratùra, na me gée napwéretòotù, na pwacèwii airi gitar na dau wâru. Dau maina ê aié, pwacèwii ê airi pwiritée, ma ê airi tikakara. 
Ba rà nyabi wà diri tèpa âboro bèepwiri, naa naporomee Pwiduée, na é tâa na autâa kêe; ma na ara tèpa ârapàpé macii na pwa nyuâarà, ma wà tèpa 24 ijiao. Â ê nyabi kàra, âna bwaa âmuê, â nye ticè pwi jè âboro cèna é tâmogòori. Â nye wâdé co tèpa 144 000, ba nye wàilà tèpa âboro na jèe pa-udòrà jii ê gòropuu. 
Wàilà tèpa âboro, na càra caa pitubamiirirà naa na wâro-gòronaigé. Â rà pâra wiâ Pwi nari mutô, naa na pâ ére na é pâ wê. Ba é jèe uparà wà Pwiduée, ma wârirà, ba na rà tèpa âboro wâna Ba kàru ma wà Pwi nari mutô. Â rà pwacèwii ê *ârapwaailò ba kêe, na pwa goro ê bétapoo pwêe na jè piûnya. 
 càra mu caa tèpa pwâ.  nye ticè èpà na rà pwa goro îrà. 
Nabwé, â go côo pwi jè *angela na é tâ gopaérenao. Â é pâ nau picémara ê popai wâdé na âjupâra dàra gòiri awé târa diri pâ âboro gòropuu—tà tàpé gée na diri ê pâ wâao, ma pwâratùra, ma napô, ma pâ Ba. 
 é tomara too pâ: «Guwà papwicîri wà Pwiduée, ma ipwamainaê! Guwà tòbuari Pwina é tapoo napwéretòotù ma gòropuu, ma nawià, ma nairiwâ. Ba jèe tèepaa i pwi pàara na ée mwa pitèi tèpa âboro gòropuu na.» 
 ûna é pâra, â é tèepaa me wà pwi jè angela, na é tomara too pâ: «Ée jèe tûu *Babulona, téura napô-bà! É ipa-imwüru diri ê pâ Ba. É naa tàra dipâa. Rà ipwirié goo. Rà pwaduwà kêe. Rà pwa pwina miiri. Rà ipuu imudi, wà tèpa âboro gòropuu. Nabwé!» 
 gée na càùé, â wà pwi jè angela, âna é pâra wiâ du angela bèepwiri.  é tomara too pâ: «Wàéni ê pwina o tèepaa tà tàpé, na rà pwamaina wà Itémuru ma i ânuuê, ma tòpi i câmu kêe naa gaadaarà ma goro îrà: 
O naa tàra, wàilà mwara, ê dipâa, na é pwabwàti wà Pwiduée, dipâa goro ê pwâra putàmu kêe. Â càcaa tògòtù goro jawé, â o gòo ma maga, na rà wâdo. Â rà o aré ma tòina goro ânye ma dà na tòo, na ara pâ angela na rà pwicîri, ma Pwi nari mutô. 
«Â é nye tà tòo awé i ânye, â rà o maagé côo goo dàra gòiri. Â o càra caa nao, naa ne ma pwaa. Wàépwiri ê pwina o mwa tèepaa tà tàpé na rà ipwamaina wà Itémuru ma i ânuuê, ma tòpi i câmu kêe.» 
Wâgo, Ioane, na go wii ê tii bèeni, âna go ina pâ: Wàépwiri ê bépipagòo tèpa âboro kà Pwiduée. Wâdé na rà pidàpwicâarirà, ûna tubaèpà tàra ma pitêre dàra ê pâ naèà kà Pwiduée. Wâdé na rà tà mwü naa na cèikî kàra naa goo Iésu. 
 gée na càùé, â go têre ê jè pwâratùra gée napwéretòotù, na ina me tôo pâ: «Gà wii pâ: “Cidòri nyuâa tàpé na rà bà, tapoo nabà, gée goro pai cèikî kàra naa goo Pwi Ukai.”»  ê Nyuâaê Pwicîri, âna nye wàé mwara, na é ina pâ: «Üu kaa, ba rà o nao jii ê pâ aré ma tòina kàra.  rà o tòpi ê câmarà goro ê wakè kàra.» 
Go ucâri, â go côo wà *Pwina naîri âboro, na é tâa na ê nee na pwaa. Â é bweri ê bwe korona mwani mii, â é popa ê pwàci na po éa. 
 go côo wà pwi jè angela, na é còobé gée na wâra pwapwicîri nidò *napwéretòotù.  é tomara too tà i Pwi na ia é tâa na i nee, pâ: «Tèpa âboro gòropuu, âna pwacèwii blé na jèe po wâèà bwàti. Jèe tèepaa ê tòotù kâra piûnya! Gà tü paé i pwàci'gà, â gà tapàgà!» 
 é tüboo naa gòropuu i pwàci kêe wà pwini, â é piûnyari i gòropuu. 
Gée na càùé, â é còobé wà pwi jè angela, gée na wâra pwapwicîri, nidò napwéretòotù. Â wàé mwara, âna é cipa jè pwàci na dau éa. 
 nabwé, â é tèepaa me gée na *aamwari târa imeai, wà pwi jè angela, na é pitûâ naa goro ânye.  é tomara too tà wà i pwi a cipa i pwàci.  é ina têe pâ: «Po dau wâru pâ âboro, wâni gòropuu na rà èpà.  rà pwacèwii ê pâ nacici pwâra dipâa na jèe po dau târa.  gà tü paé i pwàci, â gà tapàgàra.» 
 é tüboo i pwàci kêe i pwi angela, naa gòropuu.  é tapàgà i pwâra dipâa wâ gòropuu.  é tü naa na aubigagai dipâa, naa gòroigé jii ê napô.  còogairà, â é nama joro ê dipâa. Ba wàépwiri ê pwâra putàmu kà Pwiduée.  o joro ê domii kà tèpa âboro èpà, â o tù too, ma tù jai caapwi âboro, naa na 300 kilomètres.