1 Xam lige, xam vông i vin Apumtau Yesu Kɨlisi, wê il nêd levac dɨ xêseac kehe ge, om xam o lêc hôm xomxo wê lê levac ge lec dɨ vô nɨmim vô xomxo wê nên susu maên ge lêm. 2 Ên obêc tɨyi xocbê xam kɨtucma mɨ dô lê, lêc xomxo yuu mɨloc vô xam, xomxo ngwe ob mɨloc hɨxôn ngakwi yuu vunac vunac nivɨha, dɨ ngwe ob mɨloc hɨxôn nên ngakwi nipaên. 3 Mêd xam obêc hôm ngwe wê ngakwi nivɨha ge lec dɨ nêl vô i bêga bê, “Lam dô lec sia nivɨha tiga,” dɨ nêl vô xomxo susu maên ngweo bêga bê, “Ông loc le ganê, mad lam dô nêm vô a vɨxag ga.” 4 Xam obêc vông bêge ge od ge xam yaxên xomxo ya pɨyôp soên wê xam vông ge mɨ wê xomxo ya nivɨha dɨ wê ya nipaên.

5 Xam lige, xam ngô lê. Xomxo wê susu maên gê kɨbun ga ge wê Anutu vɨnoo he pyap nêb he i tu xomxo wê vông vinên xêkɨzêc ge, dɨ nêl nêb he ge wê ob la dô vac i ben lag puunê dɨ kô vɨzid nivɨha wê Anutu hɨlu pyap nêb ob vông vô xomxo wê he xêyaa vin lec i ge. 6 Om bêna lêc xam vông xomxo wê susu maên ge vô nipaên mɨ dô hɨxôn ni yocênê? Xam xovô ên xam nêbê vɨyin lam gê na vô xamê? Xam xovô bê xomxo wê susu tɨbeac yuu mone levac ge wê mi vông vɨyin vô xam dɨ kô xam mɨ la vac kot ge. 7 Xam vông i vin Yesu lê dɨ tu i nue, lêc xomxo wê mone levac ge wê mi so vya vô lê nivɨha tige, lêc bêna lêc xam kô he lecê?

8 Il Apumtau Anutu nêl kɨyang ti mɨ i yêp vac xolac bêga ên nêbê, “Ông xêmyaa i vin lec xomxo baba ge i tɨyi xocbê ông xêmyaa vin lec ôcông va ge.” Om xam obêc tɨmu vô kɨyang tige ge od xam vông môp nivɨha mêgê. 9 Lêc xam obêc hôm xomxo mangwe lec mɨ pɨmil he dɨ wê mangwe nipaên ge od xam vông ge so, dɨ xolac nêl xam nêm kɨtong nêbê xam vông nipaên. 10 Ên xomxo ti obêc tɨmu vô xolac vɨhati nivɨha, lêc vông bo ti la tɨyiên ma ge od tɨyi xocbê pwoo xolac vɨhati ge vac. 11 Ên Anutu nêl bêga nêbê, “Xam o lêc vông yôdac vêx yuu vux lêm,” dɨ nêl hɨxôn ên nêbê, “Xam o lêc hi xomxo i yib lêm.” Om yôdac vêx yuu vux obêc ma, lêc ông hi xomxo ti yib ge od ông vông xolac vɨhati vô nipaên. 12 Om xam vyac xovô dɨ vông môp yuu kɨyang vɨhati i tɨyi xocbê kɨyang wê yêp vac Anutu xolac ge. Ên xolac tige wê pɨwelac il vêl ên nipaên dɨ vông il lôm dô vac nivɨha ge, om buc tɨmuên Anutu obêc yaxên il nêd môp lec xolac tige. 13 Mêgem xomxo ti obêc xo vɨgwe pɨsiv ên xomxo baba lêm ge od Anutu obêc xo vɨgwe pɨsiv ên xomxo tibêge lec buc wê ob tɨtô il nêd kɨyang ge lêm. Lêc xomxo wê xo vɨgwe pɨsiv ên xomxo baba ge, ge wê obêc la dô nivɨha vô buc wê Anutu ob tɨtô il nêd kɨyang ge.

14 Xam lige, xomxo ti obêc nêb i xomxo vông vinên, lêc o vông môp nivɨha hɨxôn lêm ge od i nên vông vinên ge, mya nêl pɨleva dɨ o tɨyi wê ob vô i vêl ên nipaên dɨ vông i dô vac nivɨha ge lêm. 15 Xam lime wê ngakwi yuu yaên ma ge ti obêc mɨloc vô xam, 16 lêc xam ti obêc nêl vô i bêga bê, “Loc hɨxôn xêmyaa nivɨha, dɨ vɨnyum ngakwi lec ên lea dɨ wa yaên ên i den ông.” Xam obêc nêl bêge, lêc xam obêc vông yaên yuu ngakwi wê ob ngɨdu i ninɨvi xôn ge lêm ge od kɨyang tige ob vô nivɨha vô i tibêna? 17 Il nêd môp vông vinên tɨyi bêge. Ên vông vinên wê il vông ge obêc vông môp nivɨha ti lêm ge od il nêd vông vinên ge mayibên.

18 Lêc xomxo ti mêd obêc nêl bêga bê, “A ga wê a vông i vin dɨ ông ge wê ông mi vông môp nivɨha.” Lêc a ob nêl vô i bêga bê, “Ông nêb ông vông i vin lê, lêc ông o vông môp nivɨha ti hɨxôn lêm. Om ông nêm vông vinên ob yêp seac mɨ xe xê tibêna? Dom a ga, a vông i vin nôn, om môp nivɨha wê a mi vông ge nêl vông vinên wê a vông ge kɨtong seac.” 19 Ông vông i vin ên ông nêbê Anutu tibed. Ge nivɨha lê, lêcom vɨmwo nipaên êno vông i vin kɨyang tige dɨ xona mabu, lêc he o tu Anutu nue lêm. 20 Ông ge pɨyôp maên, ên ông vông i vin pɨleva dɨ ông o vông môp nivɨha hɨxôn lêm, om ông nêm vông vinên ge mayibên dɨ nôn ma. Lêc mêd ông nêb a nêl kɨyang tige kehe kɨtong vô ông, om ông ngô lê. 21 Ilage il bug Eblaham vông nu Aisak tu daa vô Anutu tɨyi xocbê Anutu nêl vô i ge, om Anutu yê môp wê i vông ge nêb i xomxo nivɨha. 22 Om ông xovô bêga bê Eblaham vông i vin Anutu dɨ vông môp nivɨha hɨxôn, om môp nivɨha wê ivông ge vông i nên vông vinên vô nôn lec. 23 Mêgem kɨyang wê yêp vac xolac ge vô nôn lec bêga nêbê, “Eblaham vông i vin Anutu om Anutu yê vông vinên wê i vông ge dɨ nêl nêbê i xomxo nivɨha.” Dɨ Anutu yê Eblaham nêbê i nu wê yuu xêyaa vin lecma ge. 24 Om il ob xovô bêga bê Anutu ob yê nêbê xomxo ti nivɨha lec vông vinên pɨleva lêm. Nge, Anutu obêc yê nôn nivɨha wê yêp seac vac vông vinên wê i vông ge od ob nêl bê i xomxo vông vinên nôn.

25 Tɨyi xocbê môp wê vêx yôdac Lehap vông ge. Ên xomxo yuu wê Josua vông yuu la ên nêb yuu loc yê vɨgwe ge, Lehap viac yuu nivɨha dɨ vông yuu lax mɨ la môp bangwe mɨ la, om Anutu yê vêx tige nivɨha lec yuac wê i vông ge. 26 Om il ob xovô bêga bê xomxo ti obêc vông i vin ya mya pɨleva dɨ o vông môp nivɨha hɨxôn lêm ge od vông vinên wê i vông ge mayibên, tɨyi xocbê xomxo ninɨvi wê myakɨlôhô la vêl dɨ ninɨvi vaci yêp ge.